ភ្នំពេញ ៖ រដ្ឋាភិបាលជប៉ុន តារយៈស្ថានទូតរបស់ខ្លួនប្រចាំនៅកម្ពុជា បានផ្តល់​រថយន្ត​ចំនួន​បី​គ្រឿង​ដល់​អគ្គនាយកដ្ឋានអន្តោប្រវេសន៍ សម្រាប់បម្រើកិច្ចការងារ ខណៈការផ្តល់ និង​ទទួលនេះ​គឺ​បាន​ធ្វើ​ឡើង​នៅរសៀលថ្ងៃទី ៦ ខែមេសា ឆ្នាំ២០២៣នេះ។

ថ្លែងនៅក្នុងពិធីផ្តល់ និងទទួលនោះ នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ បានសម្ដែង​នូ​វ​សេចក្តីសោមន្សរីករាយ និងវាយ​តម្លៃខ្ពស់​ចំពោះ​រដ្ឋាភិបាលជប៉ុន​ដែល​បាន​ផ្តល់​ជំនួយ​ជារថយន្ត ចំនួន ៣គ្រឿង ជូនអគ្គនាយកដ្ឋានអន្តោប្រវេសន៍ តាមរយៈស្ថានទូតជប៉ុន​ប្រចាំ​កម្ពុជា នាពេលនេះ។ នាយឧត្តមសេនីយ៍ បាន​គូសបញ្ជាក់ថា ការផ្តល់ជូននូវរថយន្តនេះ គឺបានធ្វើ​ឡើងបន្ទាប់ពីការផ្តល់ជូនម៉ាស៊ីនស្កែន X-Ray ចំនួន ១១គ្រឿង និងម៉ាស៊ីនកុំព្យូទ័រយួរដៃ ចំនួន ៩គ្រឿង ដែលជាជំនួយឧបត្ថម្ភរបស់រដ្ឋាភិបាលជប៉ុន ជូនអគ្គនាយកដ្ឋានអន្តោប្រវេសន៍​ដើម្បី​ប្រើប្រាស់ក្នុងកិច្ចប្រតិបត្តិការរបស់ខ្លួន ចូលរួមចំណែកក្នុងការការពារសន្តិសុខ និងសុវត្ថិភាព ជូនសង្គម​ជាតិ​ឱ្យបានកាន់តែល្អប្រសើរឡើងថែមទៀត ។

នាយឧត្តមសេនីយ៍ គៀត ចន្ទថារិទ្ធ បានលើកឡើងទៀតថា ម៉ាស៊ីនស្កែន X-Ray ទាំងអស់ដែល​រដ្ឋាភិបាល​ជប៉ុនបាន​ផ្តល់នេះ គឺត្រូវបានរៀបចំបំពាក់នៅតាមច្រកទ្វារព្រំដែនអន្តរជាតិ ដើម្បី​ត្រួតពិនិត្យរកគ្រឿងញៀនខុសច្បាប់ អាវុធជាតិ​ផ្ទុះ និងសម្ភារៈខុសច្បាប់ផ្សេងៗទៀត។ នាយឧត្តមសេនីយ៍ អគ្គនាយកអន្តោប្រវេសន៍ ក៏បានថ្លែងអំណរគុណយ៉ាង​ជ្រាលជ្រៅ​ជូន​ចំពោះ​រដ្ឋាភិបាល​និងប្រជាជនជប៉ុន​ដែលតែងតែជួយឧបត្ថម្ភគាំទ្រដល់រាជរដ្ឋាភិបាល​ប្រជាជន ក៏ដូចជា​មន្ត្រីនគរបាលកម្ពុជា តាំងពីដើមរហូតមកដល់ពេលបច្ចុប្បន្ននេះ។

ថ្លែងនៅក្នុងពិធីនោះដែរលោក YAMAZAKI Masakazu បានធ្វើការកោតសរសើរ​ចំពោះ​កិច្ចសហប្រតិបត្តិការដ៏​ល្អរវាង​ស្ថានទូត​ជប៉ុនប្រចាំកម្ពុជា និងអគ្គនាយកដ្ឋានអន្តោប្រវេសន៍ នាពេលកន្លងមក។ លោកសង្ឃឹមថាអំណោយទាំងនេះនឹងជួយជម្រុញ និងសម្រួល​ដល់ការ​បំពេញ​ការងារ​របស់​អគ្គនាយកដ្ឋានអន្តោប្រវេសន៍​ឱ្យកាន់តែល្អប្រសើរឡើង៕ អត្ថបទ ៖ បាន ចក់