ភ្នំពេញ ៖ ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល ស្នើដល់អង្គការសុខភាពពិភពលោក និងដៃគូអភិវឌ្ឍន៍ទាំងអស់ សូមបន្តជួយបន្ថែម ទៀតទាំងធនធាន ទាំងស្មារតី ទាំងបច្ចេកវិទ្យាថ្មីៗ លើការងារ​សុខភាព​​បន្តពូជ មាតា ទារក កុមារ និងសុខភាពយុវវ័យ ដើម្បីឈានទៅសម្រេច​គោលដៅអភិវឌ្ឍ​ប្រកបដោយចីរភាព។

​ការថ្លែងរបស់ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល យ៉ាងដូច្នេះ ក្នុងឱកាសបិទ​សិក្ខា​សាលាពិនិត្យលទ្ធផល នៃការអនុវត្តផែនទីចង្អុលផ្លូវសម្រាប់ពន្លឿនការកាត់បន្ថយអត្រាស្លាប់របស់មាតា និងទារក ២០១៦-២០២០ និង ពិធីអបអរសាទរខួបលើកទី៧៥ឆាំ្ន របស់អង្គការសុខភាពពិភពលោក, នារសៀលថ្ងៃទី៧ ខែ​មេសា ឆ្នាំ២០២៣នេះ ដោយមានការចូលរួមពីលោកស្រីវេជ្ជបណ្ឌិត លី អាយឡែន តំណាងអង្គការសុខភាពពិភព​លោក ប្រចាំកម្ពុជា។

ឯកឧត្តមសាស្រ្តាចារ្យ ពិតជាមានសេចក្តីរីករាយ ដែលបានចូលរួមជាមួយ ឯកឧត្តម លោកជំទាវ លោក លោកស្រី នាងកញ្ញា ក្នុងពិធីចំនួនបី ដែលប្រារព្ធធ្វើក្នុងពេលតែមួយ គឺទី១) ពិធីអបអរសាទរខួបទី៧៥ឆ្នាំ នៃការបង្កើតអង្គការ​សុខភាពពិភពលោក ទី២) ទិវាសុខភាពពិភពលោកឆ្នាំ២០២៣ និងទី៣) ពិធីបិទ សិក្ខាសាលាពិនិត្យលទ្ធផល នៃការអនុវត្តផែនទីចង្អុលផ្លូវសម្រាប់ពន្លឿនការកាត់បន្ថយអត្រាស្លាប់របស់ មាតានិងទារក ឆ្នាំ២០១៦-២០២០ ដើម្បីរៀបចំផែនទីចង្អុលផ្លូវថ្មីសម្រាប់ឆ្នាំ២០២៣-២០៣០។

ឯកឧត្តមសាស្ត្រាចារ្យ ម៉ម ប៊ុនហេង បានថ្លែងទៀតថា រាជរដ្ឋាភិបាលកម្ពុជា ក្រោមការដឹកនាំប្រកបដោយស្មារតី​បុរេសកម្ម ចក្ខុវិស័យវែងឆ្ងាយ ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រកម្ពុជា សម្រេចបានសមិទ្ធផលធំធេងលើគ្រប់វិស័យ ជាពិសេសការរក្សាបានសន្តិភាព ស្ថិរភាព​នយោបាយ សន្តិសុខ សណ្តាប់ធ្នាប់និងសុវត្ថិភាពសង្គម ការគ្រប់គ្រងបានជំងឺកូវីដ-១៩ ការរក្សា-កំណើនសេដ្ឋកិច្ច និងលំនឹង ជីវភាពប្រជាជន ការលើកកម្ពស់កិត្យានុភាពកម្ពុជា នៅលើឆាកតំបន់ និងអន្តរជាតិ តាមរយៈនយោបាយ​ការបរទេសឯករាជ្យដោយផ្អែកលើច្បាប់ជាដើម។

ឯកឧត្តមសាស្រ្តាចារ្យ ក៏សូមសម្តែងនូវការអបអរសាទរក្នុងឱកាស​គម្រប់ខួបលើក៧៥ឆ្នាំ នៃការបង្កើតអង្គការ​សុខភាព​ពិភពលោក (WHO)។ រាជរដ្ឋាភិបាលកម្ពុជា ក៏សូមវាយតម្លៃខ្ពស់ និងកោតសរសើរ​ចំពោះការ​ខិតខំ​ប្រឹងប្រែង​​ប្រកបដោយស្មារតីទទួលខុសត្រូវខ្ពស់របស់បុគ្គលិកថែទាំសុខភាពសហគមន៍ មន្ត្រីសុខាភិបាលគ្រប់​លំដាប់ថ្នាក់ សហគមន៍ និងប្រជាជនកម្ពុជាទាំងអស់ ដែលបានសហការយ៉ាង​ជិតស្និទ្ធ​ជាមួយ​អង្គការ​សុខភាពពិភពលោក និងដៃគូសុខាភិបាលជាច្រើនផ្សេងទៀត ក្នុងការចូលរួមចំណែក​ធ្វើឱ្យ​ប្រជាជន​កម្ពុជាកាន់តែមានសុខសុវត្ថិភាព និងសុខភាពល្អប្រសើរ។

ឯកឧត្តម រដ្ឋមន្រី្ត ចាំថា នៅឆ្នាំ២០០៩ យោង​តាមរបាយការណ៍អង្កេតប្រជាសាស្ត្រ និងសុខភាពឆ្នាំ២០០៥ បានបង្ហាញអត្រាមរណ​ភាពមាតា​ខ្ពស់ណាស់​គឺ៤៧២ករណី ក្នុង១០០.០០០កំណើតរស់ និងអត្រាមរណភាព​ទារកទើបកើត គឺ២៨ករណី ក្នុង១០០០កំណើតរស់ ទើបក្រសួងសុខាភិបាល បានរៀបចំផែនទីចង្អុលផ្លូវ សម្រាប់ពន្លឿនការកាត់បន្ថយមរណ ភាពមាតា និងទារក ២០១០-២០១៥ និង២០១៦-២០២០ ក្នុងគោលបំណងពន្លឿនការកាត់បន្ថយ អត្រាមរណភាពមាតា និងទារកទើបកើត ដើម្បីសម្រេចបានគោលដៅ​អភិវឌ្ឍសហស្សវត្សរ៍ឆ្នាំ២០១៥ និងគោលដៅអភិវឌ្ឍប្រកបដោយចីរភាព។ ការអនុវត្តផែនទីចង្អុលផ្លូវនេះ រួមជាមួយយុទ្ធសាស្ត្រសុខាភិបាល ធ្វើឱ្យយើងទទួលបានជោគជ័យនៅឆ្នាំ២០១៤ គឺកម្ពុជា សម្រេចបានគោលដៅអភិវឌ្ឍសហស្សវត្សរ៍ទី៤ និងទី៥ ហើយក្រសួងសុខាភិបាលក៏ទទួលបានពានរង្វាន់ 2014 Resolve Award from Global Leaders Council for Reproductive-Health ផងដែរ។

ភាពជោគជ័យទាំងអស់នេះឈរនៅលើការ វិនិយោគលើឆ្មបជំនាញ និងការអនុវត្តយុទ្ធសាស្ត្រដ៏ត្រឹមត្រូវ និងចំគោលដៅរបស់រាជរដ្ឋាភិបាល ក្នុងការអភិវឌ្ឍធនធានមនុស្សសុខាភិបាល ពង្រឹងនិងពង្រីក ហេដ្ឋារចនាសម្ព័ន្ធសុខាភិបាល ពង្រីកការគ្របដណ្តប់សេវាសុខាភិបាលឱ្យកាន់តែកៀកនឹងប្រជាពលរដ្ឋ ក៏ដូចជាការផ្គត់ផ្គង់ឱសថ បរិក្ខារ ឧបករណ៍វេជ្ជសាស្ត្រ។ គោលការណ៍គន្លឹះ ដែលអាចពន្លឿនការកាត់បន្ថយ ការស្លាប់របស់មាតា និងទារកទើបកើត គឺ៖ ឆ្មប-ឆ្មប-ឆ្មប។ ឆ្មបទី១ គឺបង្កើនចំនួនឆ្មបទៅតាមតម្រូវការ ឆ្មបទី២ គឺបញ្ចូលក្របខណ្ឌ និងពង្រាយទៅតាមមូលដ្ឋានសុខាភិបាលរហូតដល់តំបន់ដាច់ស្រយាល និងឆ្មបទី៣ គឺបង្កើនសមត្ថភាពជំនាញឆ្មបក្នុងការសម្រាលកូន និងថែទាំសុខភាពមាតា និងទារក។ នៅឆ្នាំ២០១២ ក្រសួងក៏បានបង្កើតក្រុមការងារធ្វើបច្ចុប្បន្នភាព និងកែសម្រួលរចនាសម្ព័ន្ធក្នុងការអនុវត្ត ការងារថែទាំទារក​នៅតាមមន្ទីរពេទ្យ និងមជ្ឈមណ្ឌលជាតិ ហើយនៅឆ្នាំ២០១៤ ក្រុមការងារនេះត្រូវបាន កែសម្រួលជាក្រុមការងារ​ថែទាំទារក និងសមាហរណកម្មទទួលបន្ទុកពិនិត្យព្យាបាលជំងឺកុមារ និងបន្ត ការបណ្តុះបណ្តាល​រហូតមកដល់បច្ចុប្បន្ន៕ អត្ថបទ៖ រដ្ឋា​