ភ្នំពេញ ៖ បណ្តុំយុវជន អង្គការ សមាគម សង្គមស៊ីវិល ថ្កោលទោសចំពោះយុវជនមួយក្រុមតូច ជាពិសេសអង្គការ​មិនមែន​រដ្ឋាភិបាល (NGOs) មួយចំនួនបាននឹងកំពុងពង្វក់ និងយកយុវជនខ្មែរមកធ្វើជាឈ្នាន់នយោបាយ ក្នុងការកេងចំណេញរូបភាព និងសកម្មភាព ដើម្បី​សរសេររបាយការណ៍រកជំនួយពីបរទេស មកបំពេញ​មហិច្ឆតាផ្ទាល់ខ្លួន ដែលមិនបានសបញ្ជាក់​ពី​សកម្មភាពដើម្បី​ចូលរួមរក​យន្តការ​ដោះស្រាយពិតប្រាកដ។

ក្រុមយុវជនសង្គមស៊ីវិល បានអង្កេតឃើញថា ក្រុមយុវជនកូនកាត់ ជាពិសេសអង្គការមិនមែនរដ្ឋាភិបាលមួយ​ចំនួនតូចនោះតែង​តែ​ធ្វើ​សកម្មភាពក្នុងន័យក្រឡៃការពិត ដើរបង្ករភាពអនាធិបតេយ្យ បង្កើតរូបភាពមិនគប្បី ដើម្បីផ្តិតយករូបភាព សកម្មភាពឲ្យ​មហា​ជន​ជាតិ-អន្តជាតិ មើលឃើញប្រទេសខ្លួនក្នុងផ្លូវអាក្រក់ សូម្បីតែមិនមាន​បញ្ហាក៏គេអាចចាក់​ឆ្កឹះឆ្កៀលដើម្បី​បង្កជាបញ្ហាបានដែរ។

ជាការពិត រូបភាពទាំងនោះកើតពីបុគ្គល និងអង្គការដែលរណបបរទេសជារឿយៗបានសរសេរព័ត៌មាន និង​របាយការណ៍​​ពី​ប្រទេស​កម្ពុជា ក្នុងគោលបំណងមិនល្អ ទាំងដឹងថាប្រទេសខ្លួន​បាននឹងកំពុងខិតខំ​បំពេញ​បេសកកម្មក្នុងការកសាង​ជាតិបានជាលទ្ធផលរីកចម្រើនលើគ្រប់វិស័យក៏ដោយ។  

ក្រុមយុវជន បានអំនាវនាវដល់យុវជនមួយក្រុមតូចនោះ មេត្តាកែប្រែចិត្តគំនិត រើបម្រាស់ពី  ​មនោគម៍វិជ្ជា​ខ្មៅកង្វក់​របស់ជនអគតិ ឬអ្នកនយោបាយអគតិមួយចំនួនចេញឲ្យបាន និងសូមកុំបណ្តោយឲ្យអនាគតខ្លួន ក្រុមគ្រួសារ និងប្រទេសជាតិជួបបញ្ហាដោយសារសកម្មភាពខ្វះការពិចារណារបស់អ្នកឲ្យសោះ។ យើងខ្ញុំក៏សុំប្រឆាំងយ៉ាងដាច់ខាតចំពោះបុគ្គលណា យុវជនណា ឬអង្គការណាដែលយករឿងបរិស្ថាន និងសិទ្ធិមនុស្ស​មកធ្វើជាវិច្ឆេទកម្មនយោបាយ៕ ដោយ ៖ ដារា