ទូរទស្សន៍ព័ត៌មាន BTV នៃអគ្គនាយកដ្ឋានវិទ្យុ និងទូរទស្សន៍បាយ័ន ទទួលបានពានរង្វាន់ និង​ប័ណ្ណ​សរសើរ​ក្នុងការជំរុញការផ្សព្វផ្សាយលើវិស័យទឹកស្អាត និងអនាម័យ ពីអង្គការ Water Aid Cambodia ។ ពិធីប្រគល់ពានរង្វាន់បានធ្វើឡើងនាថ្ងៃទី៧ ខែមេសា ឆ្នាំ២០២៣ ក្នុង​ពិព័រណ៍​សារ​ព័ត៌មាន «ពន្លឿនការផ្លាស់ប្ដូរ៖ ទឹកស្អាត និងអនាម័យដែលមានភាពធន់នឹងអាកាសធាតុ និង​ប្រកបដោយបរិយាបន្ន»។

ក្នុងឱកាសនោះដែរ អ្នកសារព័ត៌មាននៃទូរទស្សន៍ព័ត៌មាន BTV ចំនួន ២រូបក៏ទទួលបានបណ្ណ​សរសើរ​ពី​ការ​ប្រកួតប្រជែងស្នាដៃព័ត៌មានពាក់ព័ន្ធនឹងការជំរុញការផ្សព្វផ្សាយពីវិស័យទឹកស្អាត និង​អនាម័យនៅក្នុងប្រទេសកម្ពុជាមានភាពប្រសើរឡើង។ ក្នុង​នោះ​ទទួល​បាន​ចំណាត់​ថ្នាក់​លេខ២​ពី​កម្មពិធីទៅលើស្នាដៃព័ត៌មានបែបបទយកការណ៍ជាវីដេអូ ដែលផលិតដោយ កញ្ញា ចេន សុជាតា ស្ដីពីការប្រើប្រាស់ទឹកស្អាតនៅលើបឹងទន្លេសាបក្នុងភូមិសាស្រ្តភូមិពាមបាង ឃុំពាមបាង ស្រុក​ស្ទោង ខេត្តកំពង់ធំ។ ដោយឡែក ព័ត៌មានជាវីដេអូជាក្រុមដែលចូលរួមផលិតដោយ លោក ហុង វាស្នា ភ្នាក់ងារព័ត៌មានBTV ប្រចាំខេត្តកំពង់ឆ្នាំង ស្ដីពី​ដែល​បាន​ចូលរួម​យ៉ាង​សកម្ម​ក្នុង​គម្រោង «ពន្លឿនការផ្លាស់ប្តូរ ទឹកស្អាត និងអនាម័យដែលមានភាពធន់នឹងអាកាសធាតុ និង​ប្រកប​ដោយ​បរិយាបន្ន ដើម្បីអោយប្រទេសកម្ពុជាសម្រេចបានប្រកបដោយចីរភាព។

កន្លងទៅ ទូរទស្សន៍ព័ត៌មាន BTV តែង​បាន​ចូលរួម​ផ្សព្វ​ផ្សាយ​យ៉ាង​ផុស​ផុល​ពាក់ព័ន្ធ​នឹង​វិស័យ​ទឹកស្អាត និងអនាម័យ មិនថាចូលរួមជាមួយរាជរដ្ឋាភិបាលកម្ពុជា ក្រសួងអភិវឌ្ឍន៍ជនបទ អង្គការ Water Aid Cambodia និងអង្គការដទៃទៀត ដើម្បីរួមចំណែក​ធ្វើ​អោយ​ប្រទេស​កម្ពុជា​សម្រេច​បាន​គោលដៅអភិវឌ្ឍន៍ប្រកបដោយចីរភាព៕ អត្ថបទ៖ ហុង វាស្នា