ក្រុមអ្នកគោរពបូជា បានមកចូលរួមការអធិដ្ឋានកាលពីថ្ងៃសុក្រនៅវិហារឥស្លាម Al-Aqsa នៅ​ទី​ក្រុង Old City ហ៊ុំព័ទ្ធដោយរបងខ្ពស់នៅទីក្រុងហ្សេរុយសាឡឹម ដែលបានទាក់ទាញ​អ្នក​គោរព​បូជា​រាប់​ម៉ឺននាក់ ក្នុងអំឡុងខែដ៏ពិសិដ្ឋRamadan របស់សាសនាអ៊ីស្លាម និង​ជាកន្លែង​ដែល​អ៊ីស្រាអែល​បាន​ដាក់ពង្រាយកងកម្លាំងនគរបាលដ៏ច្រើន ដែល​បាន​ឆ្លង​កាត់​ដោយ​គ្មាន​ឧប្បត្តិ​ហេតុ​ធំដុំ។

ស្ត្រីជនជាតិអ៊ីស្រា អែលពីរនាក់ បានស្លាប់នៅក្នុងការបាញ់ប្រហារនៅតំបន់ West Bank កាល​ពី​ថ្ងៃ​សុក្រ ហើយអ៊ីស្រាអែលបានពង្រឹងកងទ័ពនៅជិតព្រំដែនរបស់ខ្លួន បន្ទាប់​ពី​អំពើ​ហិង្សា​ឆ្លង​ព្រំដែន និងការវាយឆ្មក់របស់នគរបាលនៅវិហារអ៊ីស្លាម Al-Aqsa ទីក្រុងហ្សេរុយសាឡឹម ដែល​បាន​ធ្វើ​ឱ្យ​មានការព្រួយបារម្ភអំពីជម្លោះកាន់តែរីកធំ។

ទោះបីជា​ក្រុម​សកម្មប្រយុទ្ធ បានបាញ់គ្រាប់រ៉ុក្កែតពីប្រទេសលីបង់ និងតំបន់ហ្គាហ្សា កាលពី​ពីរ​បី​ថ្ងៃ​មុន ហើយយោធាអ៊ីស្រាអែល បានឆ្លើយតបដោយការវាយប្រហារតាមអាកាសក៏ដោយ ក៏​គ្មាន​អ្នក​រង​របួសធ្ងន់ធ្ងរផ្សេងទៀតត្រូវបានរាយការណ៍នៅតាមព្រំដែននោះទេ ហើយភាគី​ទាំង​ពីរ​ពុំ​ចង់​បង្កើន​ការ​ប្រយុទ្ធគ្នានោះទេ។

មន្ត្រីម្នាក់នៅជាមួយក្រុមសកម្មប្រយុទ្ធប៉ាឡេស្ទីនបានប្រាប់សារព័ត៌មាន Reuters ថា ពួក​គេ​ត្រៀម​ខ្លួន​ជា​ស្រេចដើម្បីរក្សាភាពស្ងប់ស្ងាត់ ប្រសិនបើអ៊ីស្រាអែលធ្វើដូចគ្នា។

ក្រៅពី​ការគប់ដុំថ្ម នគរបាលបាននិយាយថា បរិវេណនោះស្ងប់ស្ងាត់។ ពលរដ្ឋប៉ាឡេស្ទីន និ​ង​ហ្ស៊ក​ដានី ដែលជាអ្នកថែរក្សាទីតាំងបរិសុទ្ធនៅទីក្រុងហ្សេរុយសាឡឹមខាងកើត បដិសេធ​មិន​ឲ្យ​មាន​វត្ត​មាន​នគរបាលអ៊ីស្រាអែលណាមួយនៅក្នុងបរិវេណព្រះវិហារនេះឡើយ។