ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកឡើងថា ការផ្តួច​ផ្តើម​ឲ្យ​មាន​ព្រឹត្តិការណ៍អង្គរសង្ក្រាន្តគម្រប់ខួប១០ឆ្នំា គឺជាការគាស់រំលើងនូវប្រពៃណី វប្បធម៌ខ្មែរ ឲ្យ​រស់​រវើក​ឡើង​វិញ និង​បង្កើតភាពសប្បាយរីកជូនប្រជាពលរដ្ឋគ្រប់ទិសទី ខណៈ​ដែល​ព្រឹត្ដិការណ៍​មាន​កម្ម​វិធី​៤៤កម្មវិធី និងចំនួន៦ ទីតាំងក្នុងក្រុងសៀមរាប។

ឯកឧត្ដម បានថ្លែងបែបនេះ នាឱកាសចុះពិនិត្យវឌ្ឍនភាព​ការ​សាងសង់​សំណង់​នានា​សម្រាប់​ព្រឹត្តិការណ៍​អង្គរ​សង្ក្រាន្ត កាលពីព្រឹកថ្ងៃទី០៨ ខែមេសា ឆ្នាំ២០២៣នេះ។ ឯកឧត្ដម​មាន​ប្រសាសន៍​ថា ចាប់តាំងពីមានការរៀបចំព្រឹត្តិការណ៍អង្គរសង្ក្រាន្តកាលពីឆ្នាំ២០១៣មក ក៏​ដូច​ជា​ឆ្នាំ​២០២៣នេះ ស្មារតីជារួមរបស់អង្គរសង្ក្រាន្ត គឺលើកស្ទួយប្រពៃណីវប្បធម៌ខ្មែរ ក្នុងនោះ​ការ​សាង​សង់​សំណង់នានាក៏ត្រូវគោរពតាមរចនាបទខ្មែរដែរ។ ឯកឧត្តមបញ្ជាក់ថា “ព្រឹត្តិការណ៍​អង្គរ​សង្ក្រាន្ត​ពី​ឆ្នាំ២០១៣ ដល់ ឆ្នាំ២០១៨ ហើយនឹងបច្ចុប្បន្ន២០២៣ ស្មារតីជារួម គឺការលើកស្ទួយ វប្បធម៌​ប្រពៃណីខ្មែរ ហើយក្នុងនោះរចនាបទខ្មែរក៏ដូចគ្នាដែរ ហើយនៅទិដ្ឋភាពនៅទីតាំងនីមួយៗ តែង​តែ​ធ្វើការជាមួយក្រសួងវប្បធម៌ និងវិចិត្រសិល្បៈ លោកគ្រូ​អ្នកគ្រូ​ នៃ​សាលា​វិចិត្រ​សិល្បៈ​ដែល​គ្រប់​រចនាបទរបស់យើង ដូចជាទីតាំងដែលយើងកំពុងឈរនៅភូមិខ្ញុំ ទីលានជល់ដំរី មុខ​ប្រាសាទ​បាយ័ន​ គឺ​យើងគិតគូរថាសម័យកាលណា ហើយសម្លៀកបំពាក់ណា ដំបូលរបៀបម៉េច? ពេល​ខ្លះ​យើង​មាន​សម័យ​កាលតែមួយឬលើសពីមួយទាំងអស់នេះយើងតែងតែឆ្លងសួរនាំ និងតែងមាន​ការ​ណែនាំ​ពិគ្រោះ​យោបល់ពី​លោក​គ្រូ​ អ្នក​គ្រូ​ សាលា​វិចិត្រ​សិល្បៈ​ មុន​យើង​សម្រេច​ការ​សាងស​ង់​ជា​រច​នា​បទ​ឲ្យស្របទៅនឹងដំណាក់កាល ហើយដោយសារ​ជា​ព្រឹត្តិការណ៍​មួយ​ដែល​លើក​ស្ទួយ​របៀប​របប​ប្រពៃណីវប្បធម៌យើង ដូចនេះរចនាបទទាំង​អស់​ស្ទើរ​តែទាំង​ស្រុង​ទៅ​ក្នុង​ការ​យក​គំរូ​តាម​អ្វី​ដែល​ជា​រចនាបទខ្មែរ។ ប៉ុន្តែឯកឧត្ដមបញ្ជាក់ថា កន្លែងខ្លះក៏មានច្នៃប្រឌិតដែរ ឧទាហរណ៍​ដូច​ជា​នៅ​ត្រពាំង​សេស ដែលមានតំបន់តោះៗលេងទឹកឬក៏អី ដែលវាជាកន្លែងកម្សាន្ត មិនអាច​ទាំង​ស្រុង​​ដូច​រចនាបទទេ“ ។

សូមជម្រាបថា សម្រាប់ព្រឹត្តិការណ៍អង្គរសង្ក្រាន្តឆ្នាំ២០២៣ ដែលខួប​គម្រប់​១០​ឆ្នាំ​នៃ​ព្រឹត្តិការណ៍នេះ ក្រុមការងារនៃស.ស.យ.ក. បានពង្រីកទីតាំងលេងកម្សាន្តដល់៦ទីតាំង និង​មាន​ល្បែង​លេង​កម្សាន្តដល់ទៅ៤៤ប្រភេទ សម្រាប់ទទួល​អ្នក​មក​កម្សាន្ត។​ ជាមួយ​នឹង​ការ​ពង្រីក​ទំហំ​ព្រឹត្តិការណ៍​នេះ ក៏មានយុវជនស្ម័គ្រចិត្តជាង៥០០០នាក់មកចូលរួមផងដែរ៕