នគរបាលប្រទេសឥណ្ឌូណេស៊ី បានចាប់ខ្លួនបុរសម្នាក់កាលពីដើមខែនេះ ដែលបានសម្លាប់​មនុស្សយ៉ាង​ហោចណាស់ ១២នាក់ បន្ទាប់​ពី​នគរបាល​បាន​រកឃើញ​សាកសព​ដែលត្រូវ​បាន​កប់​នៅ​ក្នុង​សួនច្បាររបស់លោក ហើយត្រូវបានចោទប្រកាន់ពីបទឃាតកម្មគិតទុកជាមុន។

លោក Slamet Tohari អាយុ ៤៥ ឆ្នាំបាន​សន្យា​ជាមួយ​អតិថិជន​របស់​លោក​ថា​លោក​អាច​បង្កើន​ប្រាក់​ដោយការ​ប្រើ​មន្តអាគម។

មុនពេលចាប់ខ្លួន បុរសអាយុ ៥៤ ឆ្នាំម្នាក់ឈ្មោះ Paryanto ជាជនរងគ្រោះម្នាក់ ត្រូវ​បាន​គេរាយការណ៍​ដោយ​កូនប្រុសរបស់លោកថា ឪពុករបស់គាត់បានបាត់ខ្លួន បន្ទាប់​ពី​បានជួប​ជា​មួយ​លោក Tohari ដើម្បីសុំលុយរបស់គាត់មកវិញ។

នគរបាលនិយាយថា ជនរងគ្រោះត្រូវបានគេសន្យាថា លោក Tohari អាចប្រើ​វេទមន្ត​បង្កើន​ចំនួន​ប្រាក់​របស់​ពួកគេពី ៧០ លានរូពី ស្មើរនឹង ៤៦០០ដុល្លារអាមេរិក ឲ្យកើនដល់ ៥ពាន់លានរូពី។ យោងតាមនគរបាលបានឲ្យដឹងថា តាមការចោទប្រកាន់ លោក Tohari បានចាប់​ផ្តើម​សម្លាប់​អតិថិជន​របស់​លោកក្នុងឆ្នាំ ២០២០ ។ បុរសនេះត្រូវបានចាប់ខ្លួនជាច្រើនលើកមកហើយពីបទឧក្រិដ្ឋ ក្លែងបន្លំប្រាក់ និងបាន​ជាប់​ពន្ធនាគារ​ក្នុង​ឆ្នាំ ២០១៩ លើករណីដូចគ្នា។