អ៊ីស្រាអែល ៖ កាលពីថ្ងៃសៅរ៍ម្សិលមិញ ក្រុមបាតុកររាប់ម៉ឺននាក់ បានធ្វើបាតុកម្ម​ប្រឆាំងផែនការ​របស់​នាយករដ្ឋមន្រ្តី​អ៊ីស្រាអែល​លោក Benjamin Netanyahu ក្នុងការរឹតបន្តឹងការគ្រប់គ្រងតុលាការកំពូល បើទោះបី​ជាមានក្តី​កង្វល់​ពី​សន្តិសុខកើនឡើងក៏ដោយ ក្រោយការវាយ​ប្រហារ​សម្លាប់មនុស្ស ២លើកកាលពីរយៈពេល ១ថ្ងៃមុន ។ 

នៅកណ្តាលទីក្រុងតែលអាវីវ ក្រុមបាតុករគ្រវីទង់ជាតិអ៊ីស្រាអែលពណ៌ខៀវ និងស.ដែលក្លាយជា​សញ្ញាសំគាល់​នៃបាតុកម្មរយៈពេលជាង ៣ខែកន្លងមកនេះ បានជួបជុំគ្នាដើម្បីបង្ហាញការប្រឆាំងនឹងផែនការដែលពួកគេយល់ឃើញថា​ជាការគំរាមកំហែង​ដល់លទ្ធិប្រជាធិបតេយ្យ​អ៊ីស្រាអែល ។ 

បាតុកម្មចុងក្រោយប្រឆាំងនឹងផែនការដែលផ្អាកកាលពីខែមុនថ្វីត្បិតតែមានរលកកូដកម្មកក៏ដោយនោះ បានកើតមានឡើង ពេលដែលអ៊ីស្រាអែល​ប្រឈមនឹងភាពតានតឹងកើនឡើងភ្លាមៗនៅតាម​តំបន់ជួរ​មុខជាច្រើនអំឡុងខែបុណ្យតមអាហាររ៉ាម៉ាដានរបស់ប្រជាជនមូស្លីម ។ 

នៅជុំវិញព្រះវិហារ Al-Aqsa ក្រុមអ្នកបួងសួងរាប់ពាន់នាក់ បានចូលរួមពិធីថ្វាយបង្គុំព្រះពេលល្ងាច ខណៈដែលមានក្តីកង្វល់ពីលទ្ធភាពនៃការវាយឆ្មក់ម្តងទៀតរបស់ក្រុមនគរបាលនៅក្នុងសប្តាហ៍នេះ បន្ទាប់ពីការបាញ់គ្រាប់រ៉ុក្កែតចូលទឹកដីអ៊ីស្រាអែល ហើយនិងការវាយប្រហារតាមច្រកអាកាស​របស់អ៊ីសា្រអែលចូលទៅក្នុងតំបន់កាន់កាប់ហ្គាហ្សាស្រ្ទីប និងតំបន់ភាគខាងត្បូងលីបង់ ៕ ដោយ ៖ សារ៉ាត់