អ៊ុយក្រែន ៖ ក្រុមមនុស្សធម៌និយាយកាលពីថ្ងៃសៅរ៍ថា កុមារជាង ៣០នាក់ បានជួបជុំគ្នាវិញ​ជាមួយ​គ្រួសាររបស់​ពួកគេនៅប្រទេសអ៊ុយក្រែន ក្នុងសប្តាហ៍នេះ ក្រោយប្រតិបត្តិការជួយសង្រ្គោះយ៉ាងយូរ ដើម្បីនាំពួក​គេវិលត្រឡប់​មកពីរុស្ស៊ីវិញ ។ 

ទីក្រុងគីវ ប៉ានស្មានថា កុមារអ៊ុយក្រែនជិត ១៩.៥០០នាក់ ត្រូវបាននាំទៅកាន់ប្រទេសរុស្ស៊ី ចាប់តាំងពីទីក្រុងម៉ូស្គូ វាយលុកកាលពីខែកុម្ភៈ ឆ្នាំមុន គឺជាទង្វើដែលពួកគេចាត់ទុកថាជាការនិរទេសខុសច្បាប់ ។ 

ទីក្រុងម៉ូស្គូ ដែលគ្រប់គ្រងតំបន់ភាគខាងកើត និងភាគខាងត្បូងអ៊ុយក្រែន បានច្រានចោការចាប់ពង្រាត់កុមារ ហើយពួកគេនិយាយថា កុមារទាំងនេះ ត្រូវបានបញ្ជូនចេញសម្រាប់សុវត្ថិភាពផ្ទាល់ខ្លួនរបស់ពួកគេតែប៉ុណ្ណោះ ។ 

លោក Mykola Kuleba គឺជាស្ថាបនិកបង្កើតអង្គការមនុស្សធម៌សង្រ្គោះអ៊ុយក្រែន និយាយថា បច្ចុប្បន្នបេសកកម្ម​សង្រ្គោះទី ៥ ជិតបានបញ្ចប់ហើយ ។ វាពាក់ព័ន្ធជាពិសេសចំនួនកុមារដែលពួកយើងអាចជួយឲ្យវិលត្រឡប់មកប្រទេសកំណើតវិញ ។ 

អង្គការមួយនេះ បានជួយសាច់ញាតិកុមារអ៊ុយក្រែនដែលត្រូវបាននាំយកទៅកាន់រុស្ស៊ី ជាមួយភស្តុភារ ការដឹកជញ្ជូន និងរៀបផែនការដែលត្រូវការចាប់ផ្តើមដំណើរផ្លូវឆ្ងាយ ដើម្បីនាំកុមារវិលត្រឡប់មកវិញ ។ 

ទោះបីជាយ៉ាងណាក៏ដោយ ក្រសួងការបរទេសរុស្ស៊ី ពុំបានឆ្លើយតបភ្លាមៗនោះទេចំពោះសំណើសុំសេចក្តីអធិប្បាយ ពាក់ព័ន្ធនឹងការវិលត្រឡប់មកវិញរបស់កុមារអ៊ុយក្រែនទាំងនេះ ៕ ដោយ ៖ សារ៉ាត់