ភ្នំពេញ ៖ នាព្រឹកថ្ងៃទី០៩ ខែមេសា ឆ្នាំ២០២៣នេះ គណបក្សប្រជាជនកម្ពុជា សាខារាជធានីភ្នំពេញ បានធ្វើ​ពិធីប្រកាសសាខាគណបក្សប្រជាជនកម្ពុជាចល័តតាមមូលដ្ឋាន ភ.ព.ព.ស និងបញ្ចូលសមាជិក-សមាជិកា ថ្មីចំនួន៧០០នាក់បន្ថែម ដែលសុទ្ធសឹងតែជាសមាជិក បានបញ្ឈប់ខ្លួនពីគណបក្សនយោបាយផ្សេងៗ ហើយ​វិលមករួមរស់ជីវភាពនយោបាយ ជាមួយគណបក្សប្រជាជនកម្ពុជា ។

អង្គពិធីខាងលើនេះ ធ្វើឡើងក្រោមអធិបតីភាព ឯកឧត្តមបណ្ឌិត លី សាម៉េត ទីប្រឹក្សាផ្ទាល់ និង​ជាតំណាងដ៏ខ្ពង់ខ្ពស់​របស់ សម្តេចអគ្គមហាសេនាបតី តេជោ ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា និងជា​ប្រធានគណបក្សប្រជាជនកម្ពុជា និងវត្តមានឯកឧត្តមលោកជំទាវ អស់លោកលោក​ស្រីថ្នាក់ដឹក​នាំជា​ច្រើនរូបទៀតផងដែរ ។

ក្នុងអង្គពិធីខាងលើ ឯកឧត្តមបណ្ឌិត លី សាម៉េត បានសម្តែងនូវអារម្មណ៍រីករាយ និងស្វាគមន៍បំផុត ចំពោះការ​សម្រេចចិត្តដ៏ត្រឹមត្រូវរបស់បងប្អូនសមាជិកសមាជិកាថ្មី ទាំង៧០០នាក់ ដែលបានចូលមករួម​រស់នយោបាយ​ជាមួយគណបក្សប្រជាជនកម្ពុជាកម្ពុជា ដែលជាគណបក្សមួយតែងគិតគូរដល់ពលរដ្ឋ និងប្រឹងប្រែងរកសុខសន្តិភាព និងការអភិវឌ្ឍន៍នានា ជូនមាតុភូមិជាតិ ដែលផ្ទុយពីគណបក្សនយោបាយមួយចំនួន បានតែស្រែក បានតែនិយាយ ប៉ុន្តែមិនមានបានជួយអ្វីដល់ពលរដ្ឋ និងសង្គមជាតិរបស់ខ្លួននោះឡើយ ។

ឯឧត្តមបណ្ឌិត បានមានប្រសាសន៍បន្ត ថា ៖ សម្តេចតេជោ គឺជាទេវតារស់នាពេលបច្ចុប្បន្ននេះ ដែលសម្តេចបានជួយ​សង្រ្គោះប្រជាពលរដ្ឋខ្មែរនៅទូទាំងប្រទេស ឲ្យរស់នៅក្រោមដំបូល នៃសុខសន្តិភាព និងការអភិវឌ្ឍន៍លើគ្រប់វិស័យ ។ ឯកឧត្តមបញ្ជាក់ថា សុខសន្តិភាព ដែលកំពុងមាននាពេលបច្ចុប្បន្ន នៅក្នុងប្រទេសកម្ពុជា គឺសម្តេចបានលះបង់​កម្លាំងកាយពល និងហ៊ានលះបង់ជីវិតផ្ទាល់របស់សម្តេច ដើម្បីទៅប្តូរយកសន្តិភាពមកជូនពលរដ្ឋ និងប្រទេសជាតិ​ទាំងមូល ។ ដូច្នោះហើយ ឯកឧត្តម សូមអំពាវនាវអោយបងប្អូនពលរដ្ឋកម្ពុជាទាំងអស់ សូមចូលរួមថែរក្សា​សុខសន្តិភាព ដែលសម្តេចនាយករដ្ឋមន្ត្រីខិតខំរកដោយភាពលំបាក អោយបានគង់វង្សផង ដើម្បីឲ្យប្រទេស​ជាតិយើង បន្តការអភិវឌ្ឍន៍និងរីកចម្រើន ជាបន្ត និងនិរន្តទៅមុខ នាថ្ងៃអនាគត់ ។

ក្នុងឱកាសដដែលនោះដែរ ឯកឧត្តមបណ្ឌិត ដួង តារា ជំនួយការផ្ទាល់សម្តេចតេជោ និងជារដ្ឋលេខាធិការ​ទីស្តីការគណ:រដ្ឋមន្ត្រី​ បានមានប្រសាសន៍ ណែនាំដល់សមាជិកគណបក្សប្រជាជកម្ពុជា ត្រូវត្រៀមឯកសារ ឲ្យបានគ្រប់គ្រាន់ សម្រាប់ការបោះឆ្នោត នៅខែកក្កដាខាងមុខ ។ ឯកឧត្តម បានមានប្រសាសន៍ អោយបងប្អូន​គិតគូរអោយបានច្បាស់លាស់ចំពោះការសម្រេចចិត្តចូលរួមរស់ជាមួយគណបក្សនយោបាយណាមួយនោះ ហើយត្រូវដឹងការពិតថា គណបក្សណាដែលជួយដល់ពលរដ្ឋពិតប្រាកដ និង ជួយដល់សង្គមជាតិអោយ​មានការរីកចម្រើនឥតឈប់ឈរ នោះ គឺមានតែគណបក្សប្រជាជនកម្ពុជាតែមួយនោះទេ ។

ជាមួយគ្នានោះ ឯកឧត្តម នួន ផារ័ត្ន សមាជិកគណៈកម្មាធិការកណ្តាល គណបក្សប្រជាជនកម្ពុជា និង​ជាអភិបាលរងរាជធានីភ្នំពេញ បានបញ្ជាក់ថា បច្ចុប្បន្ន គណបក្សប្រជាជនកម្ពុជា មានសមាជិក នៅទូទាំង​រាជធានីភ្នំពេញ ជាង៧០ម៉ឺននាក់ និងជាង៦លាននាក់ នៅទូទាំងប្រទេស។

ឯកឧត្តម បានលើកឡើងបន្តថា ការចូលរួមជាសមាជិក របស់គណបក្សនយោបាយណាមួយនោះ ត្រូវស្វែងយល់​ឲ្យបានច្បាស់ ពីប្រវត្តិរបស់គណបក្ស គោលនយោបាយ មេដឹកនាំ ធនធានមនុស្ស និងហិរញ្ញវត្ថុរបស់របស់គណបក្ស នេះទើបជាការសម្រេចចិត្តដ៏ត្រឹមត្រូវ សម្រាប់ខ្លួនឯងផ្ទាល់ និងប្រទេសជាតិ ៕ អត្ថបទ ​៖ លី ហេង