ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី១០ ខែមេសា ឆ្នាំ២០២៣នេះ បានរៀបចំពិធីដាក់ឲ្យដំណើរការជាផ្លូវការនូវការដាក់បញ្ចូលកម្មវិធី  បណ្តុះបណ្តាល​ទេសន្តរ​ប្រវេសន៍​ដោយ​សុវត្ថិភាពទៅ​ក្នុងកម្មវិធីសិក្សាអប់រំបណ្តុះបណ្តាលបច្ចេកទេស និងវិជ្ជាជីវៈ ហៅ​កាត់ អ.ប.វ. ឬហៅកាតជាភាសាអង់គ្លេស ធីវ៉េត (TVET)។

កម្មវិធីនេះ បានប្រព្រឹត្តទៅក្រោមអធិបតី ឯកឧត្តមបណ្ឌិត ពេជ សោភ័ន រដ្ឋមន្ត្រី​ប្រតិភូ​អម​នាយករដ្ឋ​មន្ត្រី និងជារដ្ឋលេខាធិការប្រចាំការ នៃក្រសួងការងារ និងបណ្តុះបណ្តាលវិជ្ជាជីវៈ និង​ជា​អនុប្រធានគណៈកម្មាធិការជាតិបណ្តុះបណ្តាល ដែលរៀបចំឡើង ក្រោមកិច្ចសហការ រវាង​ក្រសួង​ការងារ និងអង្គការអន្តរជាតិទេសន្តរប្រវេសន៍។

កម្មវិធីនេះ​ត្រូវបានរៀបចំឡើងក្នុងគោលបំណង ដើម្បដាក់​ឲ្យ​ដំណើរ​ការ​ជា​ផ្លូវការ​នូវ​ការ​អនុវត្ត​កម្ម​វិធី​បណ្តុះបណ្តាលទេសន្តរប្រវេសន៍ដោយសុវត្ថិភាពនៅក្នុងកម្មវិធីសិក្សារបស់ អ.ប.វ. និង​បង្ហាញ​ជូន​ដល់​ភាគីពាក់ព័ន្ធនានាអំពីសារៈសំខាន់នៃការដាក់បញ្ចូល និងអនុវត្តកម្មវិធី​បណ្តុះបណ្តាល​ទេសន្តរ​ប្រវេសន៍​ដោយសុវត្ថិភាពនេះ, ដើម្បី​បង្ហាញ​សេចក្តី​ណែនាំ​សម្រាប់​ការ​អនុវត្ត​កម្ម​វិធី​បណ្តុះ​បណ្តាល​ទេសន្តរប្រវេសន៍ដោយសុវត្ថិភាព និងការប្រើប្រាស់សេចក្តីណែនាំនេះ ទៅដល់​អ្នក​ចូល​រួម ជាពិសេសគ្រូបង្គោលមកពីគ្រឹះស្ថានអ.ប.វ.ទាំង៣៨, ដើម្បី​ផ្តល់​ជូន​វគ្គ​បណ្តុះ​បណ្តាល​ឡើង​វិញ​លើ​មេរៀនទេសន្តរប្រវេសន៍ដោយសុវត្ថិភាពដល់គ្រូបង្គោលនៃគ្រឹះស្ថានអ.ប.វ. និងដើម្បី​ឱ្យ​សាធារណ​ជន​ចាប់​អារម្មណ៍​ពី​សារៈសំខាន់​ នៃ​ការ​លើក​កម្ពស់​ការ​យល់​ដឹងអំពី​ទេសន្តរ​ប្រវេសន៍​ដោយ​សុវត្ថិភាព។