ភ្នំពេញ៖ ព្រឹទ្ធសភាជាតិ បានពិនិត្យ និងឲ្យយោបល់ ដោយ​បានឯកសារ​ទាំងស្រុង​ទៅ​លើ​សេចក្តី​ព្រាងច្បាប់ស្តីពី សន្ធិសញ្ញាកំណត់ព្រំដែន រវាងប្រទេសកម្ពុជា និងប្រទេសឡាវ ដោយ​ឥត​កែ​ប្រែ​ចំនួន ៥៨សំឡេង និងបានចាត់ទុកថា ជាឯកសារ​ផ្លូវ​ច្បាប់​ប្រវត្តិសាស្ត្រ​ដ៏​មាន​សារៈ​សំខាន់​មួយ​ សម្រាប់ប្រទេសទាំងពីរ ។

បន្ទាប់ពីសម័យប្រជុំលើកទី១០ ព្រឹទ្ធសភានីតិកាលទី៤ ក្រោមអធិបតីភាពសម្ដេចវិបុលសេនាភក្តី សាយ ឈុំ ព្រឹទ្ធសភាជាតិ នៅថ្ងៃទី១០ ខែមេសា ឆ្នាំ២០២៣ ដើម្បីពិនិត្យ​ឲ្យ​យោបល់​សេចក្តី​ព្រាង​ច្បាប់​ខាង​លើ ឯកឧត្តម ម៉ម ប៊ុននាង អ្នកនាំពាក្យព្រឹទ្ធសភា មានប្រសាសន៍ថា សេចក្តីព្រាង​ច្បាប់​នេះ តាក់តែងឡើង ក្នុងគោលបំណងកសាងខ្សែព្រំដែនសន្តិភាព ស្ថិរភាព មិត្តភាព សហ​ប្រតិបត្តិការ​ដែន​ដីគ្នា គោរពផលប្រយោជន៍គ្នាទៅវិញទៅមក និងដើម្បី​បង្កើន​ឥត​ឈប់​នូវ​ទំនាក់​ទំនង​ជិត​ខាងល្អ សាមគ្គីភាពជាប្រពៃណី រវាងកម្ពុជា-ឡាវ ក្នុងការខិតខំបោះបង្គោលព្រំដែន ។

ឯកឧត្តមបានបន្តថា សន្ធិសញ្ញាកំណត់ព្រំដែនរដ្ឋរវាងកម្ពុជា-ឡាវ ជា​កំណត់​ត្រា​ទទួល​យក​លទ្ធផល នៃការត្រួតពិនិត្យខ្សែព្រំដែនរួម ប្រមាណជា ៨៦ភាគរយ ដែល​ប្រទេស​ទាំងពីរ​សម្រេច​បាន​លើ​ការងារព្រំដែន និងដែលត្រូវបានប្រមុខរាជរដ្ឋាភិបាលប្រទេសទាំងពីរ បានចុះ​ហត្ថ​លេខា​កាល​ពី​ថ្ងៃ​ទី១៣ ខែកុម្ភៈ ឆ្នាំ២០២៣ កន្លងទៅ ។

ឯកឧត្តម ម៉ម ប៊ុននាង បានបន្ថែមថា សន្ធិសញ្ញានេះ ក៏ជាឯកសារ​ផ្លូវ​ច្បាប់​ប្រវត្តិសាស្ត្រដ៏​មាន​សារៈ​សំខាន់​បំផុតមួយ ដែលកម្ពុជា និងឡាវ បានចុះហត្ថលេខា​ទទួល​ស្គាល់​ជា​ផ្លូវ​ការ​លើ​ខ្សែ​​បន្ទាត់​ព្រំដែន ដែលអាណានិគមបានបន្សល់ទុកឲ្យ បន្ទាប់ពីប្រទេសទាំងពីរ ទទួលបានឯករាជ្យ ជា​ឯកសារផ្លូវការមូលដ្ឋានដ៏សំខាន់បំផុត ក្នុងការ​បន្ត​រក​ដំណោះ​ស្រាយ​តំបន់​ព្រំដែន​នៅ​សល់​ប្រមាណ​ជាង ១៤ភាគរយទៀត ដែលភាគីទាំងពីរមិនទាន់សម្រេចបាន និងជាឯកសារ​គ្រឹះ​ការពារ​បាន​បូរណភាពទឹកដីកម្ពុជា ដោយមានខ្សែព្រំដែនច្បាស់លាស់ ។

 គួរបញ្ជាក់ថា សេចក្តីព្រាងច្បាប់នេះ ត្រូវបានរដ្ឋសភាជាតិ អនុម័តយល់ព្រមចំនួន ១០៥សំឡេង នៃសមាជិករដ្ឋសភាទាំងមូល កាលពីថ្ងៃទី៣០ ខែមីនា ឆ្នាំ២០២៣ នាសម័យ​ប្រជុំរដ្ឋសភា​លើក​ទី៩ នីតិកាលទី៦ ៕ អត្ថបទ៖ បាន សុខរិទ្ធិ