ភ្នំពេញ ៖ សមិទ្ធផលថ្មីមួយទៀតហើយ គឺស្ពានបេតុងខ្សែកាបឫស្សីកែវ ដែលជា​ស្ពាន​ថ្មី​ស្រឡាង​មួយ ត្រូវបានរដ្ឋបាលរាជធានីភ្នំពេញ ដាក់ឲ្យដំណើរការប្រើប្រាស់ជាបណ្តោះអាសន្នហើយ នៅ​ព្រឹក​ថ្ងៃទី១០ ខែមេសា ឆ្នាំ២០២៣នេះ សម្រាប់ពលរដ្ឋទាំងក្នុង និងក្រៅតំបន់ទាំងអស់ អាច​ធ្វើ​ដំណើរ​ទៅ​មកបានយ៉ាងងាយស្រួល ពីក្រុងរណបជ្រោយចង្វា និងផ្លូវជាតិលេខ៦ ឆ្លងកាត់​ទន្លេសាប​ឆ្ពោះ​ទៅ ខណ្ឌឫស្សីកែវ រាជធានីភ្នំពេញ ។

ស្របទៅនឹងការបើកអោយដំណើរការប្រើប្រាស់ស្ពានថ្មីខាងលើនេះដែរ ស្ពានបេឡេឫស្សីកែវ ដែល​នៅ​ស្របគ្នាជាមួយស្ពាននេះនោះ ត្រូវបានអាជ្ញាធររាជធានី សម្រេច​ផ្អាក​លំហូរ​ចរាចរណ៍​បណ្តោះ​អាសន្ន មិនអោយមានការឆ្លងកាត់នោះឡើយ ។

នៅព្រឹកថ្ងៃខែដដែលនេះ គេសង្គេតឃើញថា មានបងប្អូនប្រជាពលរដ្ឋអ្នកដំណើរជាច្រើន​បាន​បើក​ធ្វើ​ដំណើរ​ឆ្លងកាត់ស្ពានថ្មី ប្រកបដោយក្តីរំភើប និងអារម្មណ៍សប្បាយរីករាយ ពេល​បាន​ឃើញ​នូវ​សមិទ្ធផលថ្មី បានលិចចេញនូវរូបរាងជាបន្តបន្ទាប់ ។

ពលរដ្ឋអ្នកដំណើរបានលើកឡើងថា ពួកគាត់សប្បាយចិត្ត ពេលមានស្ពានមួយនេះ ព្រោះស្ពាន​បេតុង​ថ្មី​នេះ ស្អាត ហើយមានលក្ខណៈធំទូលាយល្អ ងាយអោយ​ពួក​គាត់​អាច​ធ្វើ​ដំណើរ​ទៅ​មក​ពីតំបន់​មួយ​ទៅតំបន់មួយបានលឿនរហ័ស មិនបង្កការកកស្ទះ ។ ពួកគាត់ បន្តថា ពីមុន​តំបន់​ជ្រោយ​ចង្វា និងឫស្សីកែវ តែងជួបនូវការកកស្ទះខ្លាំងណាស់ ដែលតែង​រំខាន​ដល់​ការ​ចេញ​ដំណើរ​ទៅ​បំពេញ​កិច្ចការងារផ្សេងៗជាដើម ប៉ុន្តែនៅពេលពួក​គាត់​បាន​ឃើញ​ស្ពាន​បេតុងថ្មី​នេះ​ហើយ​នោះ ពួកគាត់គិតថាបញ្ហាកកស្ទះ នឹងលែងជាកង្វល់របស់ពួកគាត់ទាំងអស់គ្នាទៀតហើយ ។

សូមបញ្ជាក់ថា ស្ពានបេតុងនេះ ស្ថាបនានៅអមជាមួយស្ពានបេឡេ មានប្រវែង ៩២២ ម៉ែត្រ មានទទឹង ២០,៥ ម៉ែត្រ។ ដោយឡែក ចិញ្ចើមស្ពានសម្រាប់ថ្មើរជើង មានទទឹង ១,២៥ ម៉ែត្រ​សង​ខាង។ កម្ពស់សរសរស្ពានសម្រាប់ព្យួរខ្សែកាបធៀបនឹងកម្រាលស្ពាន ៣៤ ម៉ែត្រ។ គន្លងខ្សែ​យាន​យន្ត​មានទទឹង៣.៧៥ ម៉ែត្រ។ គន្លងធ្វើចរាចរណ៍ ២ខ្សែទៅ ២ខ្សែមក។ កម្ពស់នាវា​ចរ​ក្រោម​ស្ពាន​អតិបរមានៅរដូវវស្សា ១០.៥ ម៉ែត្រ។ កម្ពស់នាវាចរក្រោមស្ពានអប្បរមានៅរដូវប្រាំង ២០,៥ ម៉ែត្រ ដោយមានបំពាក់បង្គោលភ្លើងបំភ្លឺ និងដាក់ស្លាកសញ្ញាចរាចរណ៍ ៕