សៀមរាប ៖ ជាការផ្ដួចផ្ដើម ឬគម្រោងមួយដែលមានឈ្មោះថា បេះដូងនៃក្ដីសង្ឃឹម (Paper Heart) បានមានវត្តមាន​ក្រោម យុទ្ធនាការ #BeyondTheGames ក្រោមទិសស្លោក “បេះដូងលោតក្នុងចង្វាក់តែមួយ” ក្នុងន័យគាំទ្រ​លើក​ទឹកចិត្ត និងបង្ហាញសេចក្ដីស្រឡាញ់ដល់កីឡាករ គ្រូបង្វឹក និងអ្នកគាំទ្រផងដែរ គ្រប់ដំណាក់កាល​តាំងពី​ការត្រៀម​ប្រកួត ការប្រកួត និងក្រោយការប្រកួតនៃព្រឹត្តិការណ៍កីឡាអាស៊ីអាគ្នេយ៍(SEA Game) និងកីឡា​ប៉ារ៉ាហ្គេម​ឆ្នាំ២០២៣ ដែលព្រះរាជាណាចក្រកម្ពុជាធ្វើជាម្ចាស់ផ្ទះនៅសល់ប៉ុន្មានថ្ងៃខាងមុខទៀតនេះ។

បេះដូងក្រដាសទាំងនេះ កំពុងយកផ្គុំជាផ្ទាំងពាក្យ ឬឃ្លានៅក្នុងបរិវេណប្រាសាទអង្គរវត្ត​ដើម្បីបំបែក​ឯតទគ្គកម្ម​ពិភព​លោក និងតាំងបង្ហាញអបអរសាទរខួប១០ឆ្នាំ ​នៃព្រឹត្តិការណ៍អង្គរសង្ក្រាន្ដ ដែលបច្ចុប្បន្ននេះ​ក្រុមការងារ​កំពុងតែ​រៀបចំតាំងបង្ហាញបេះដូងក្រដាសដែលប្រមូលពីសាធារណៈជនសម្រាប់​ត្រៀម​បំបែកឯតទគ្គកម្ម​ពិភពលោក​យ៉ាង​សស្រាក់សស្រាំ។

គួរបញ្ជាក់ដែរថា ការបំបែកកំណត់ត្រាពិភពលោកនេះ នឹងធ្វើឡើងជាផ្លូវការនៅថ្ងៃទី១១ ខែមេសា ឆ្នាំ២០២៣ នេះ នៅក្នុងបរិវេណប្រាសាទអង្គរវត្ត ក្រោមអធិបតីភាពឯកឧត្តម ហ៊ុន ម៉ានី។សាធារណៈជនទូទៅក៏អាចចូលរួមដើម្បីជាសក្ខីភាពក្នុងបំបែកឯតទគ្គកម្មពិភពលោកនេះដែរ៕ រូបភាព ៖ សសយក