កោះកុង៖ កងកម្លាំងនគរបាលស្រុកស្រែអំបិល បានត្រៀមរាល់ជាស្រេចហើយនូវការល្បាតការ​ពារ​សន្តិសុខសណ្តាប់ធ្នាប់ជូនពលរដ្ឋ ក៏ដូចជាអ្នកទេសដែលមកលេងកម្សាន្តក្នុងមូលដ្ឋាន​គ្រប់គ្រង​របស់ខ្លួន នាពិធីបុណ្យចូលឆ្នាំខ្មែរ នាពេលខាងមុខ។

លោកវរសេនីយ៍ឯក ហួន នុន អធិការនគរបាលស្រុកស្រែអំបិល ​បានឲ្យដឹងនៅថ្ងៃទី១១ ខែមេសា​ឆ្នាំ២០២២នេះថា យោងតាមបទបញ្ជារបស់អគ្គស្នងការនគរបាលជាតិ ​រដ្ឋបាលខេត្តកោះកុង និង​ស្នងការដ្ឋានខេត្ត លោក​បាន​ចាត់ចែង​ដាក់ផែនការដល់កងកម្លាំងជំនាញតាមផ្នែក និងរដ្ឋបាល ដោយ​ត្រូវធ្វើយ៉ាងណាធានាបានសុវត្ថិភាពសន្តិសុខសណ្តាប់ធ្នាប់ល្អប្រសើរជូនដល់អ្នកទេសចរ និងប្រជាពលរដ្ឋទៅគោលដៅនីមួយៗអស់ហើយ។

បើតាមលោកអធិការស្រុកស្រែអំបិល កម្លាំងដែលបានត្រៀមមានប្រមាណជិត២០០នាក់ ​ហើយ​កម្លាំង​ទាំងអស់នោះពង្រាយតាមតំបន់ទេសចរណ៍​កម្សាន្ត​ វត្តអារាម និងរមណីយដ្ឋាននានា។

លោកវរសេនីយ៍ឯក ហួន នុន ក៏បានដាក់បទបញ្ជាដល់មន្រ្តីនគរបាលដែល​នឹងឈរតាមគោលដៅ ចាំបាច់ផ្តោតការយកចិត្តទុកដាក់ចំពោះភារកិច្ច​ និងទទួលខុស​ត្រូវខ្ពស់លើការងារដឹកនាំបញ្ជាកម្លាំង ដើម្បី​ការពារសន្តិសុខ​ រក្សាសណ្តាប់ធ្នាប់សាធារណៈ ​កុំឱ្យមានកើតបទល្មើសកើតឡើង ជា​ពិសេសធានា​ឱ្យបានក្នុងការការពារអាយុជីវិត ​ទ្រព្យ​សម្បត្តិ​ប្រជាពលរដ្ឋ និងទប់ស្កាត់សកម្មភាព​បង្កការរំខានណាមួយ ដែលប៉ះពាល់ដល់ការកម្សាន្តសប្បាយរីករាយរបស់ប្រជាពលរដ្ឋ។

ទន្ទឹមនោះ ដើម្បីបង្ការគ្រោះអគ្គីភ័យជាយថាហេតុ ​អធិការដ្ឋាននគរបាលស្រុកស្រែអំបិល បាន​ត្រៀម​រថយន្តពន្លត់អគ្គីភ័យចំនួន២គ្រឿង​ ដោយប្រចាំបញ្ជា២៤ម៉ោង​ ករណី​មានបញ្ហាឆាបឆេះផ្ទះ និងតំបន់រមណីយដ្ឋានទេសចរណ៍។

ចំពោះសុវត្ថិភាពចរាចរណ៍វិញ ​មន្រ្តីជំនាញ​ ស្នើឲ្យមានការបង្កើនប្រុងប្រយ័ត្នផងដែរ ប្រសិនស្រវឹង​កុំបើកបរ ឬបង្កអំពើហិង្សាដែលធ្វើប៉ះពាល់សន្តិសុខសណ្តាប់​អំឡុង​ថ្ងៃបុណ្យចូលឆ្នាំខ្មែរ ប្រពៃណីជាតិ៕