ព្រះវិហារ៖ នៅរសៀលថ្ងៃទី១០ ខែមេសា ម្សិលមិញនេះ ឯកឧត្តម គីម រិទ្ធី អភិបាលនៃគណៈអភិបាលខេត្ត បានចុះសួរសុខទុក្ខ និងនាំយក អំណោយចែកជូនកងកម្លាំងទាំងបី ក្នុងក្រុងព្រះវិហារ រួមមានកម្លាំងបញ្ជាការដ្ឋានតំបន់ប្រតិបត្តិ ការសឹករងព្រះវិហារ ស្នងការដ្ឋាននគរបាលខេត្ត និងបញ្ជាការដ្ឋានកងរាជអាវុធហត្ថខេត្ត ក្នុង ឱកាសបុណ្យចូលឆ្នាំថ្មីប្រពៃណីជាតិឆ្នាំ២០២៣ ។

ក្នុងឱកាសចុះសួរសុខទុក្ខនាពេលនោះ ឯកឧត្តម គីម រិទ្ធី បានពាំនាំនូវផ្តាំផ្ញើរសួរសុខ ទុក្ខ និង​ក្តីនឹករលឹកពីសំណាក់ប្រមុខថ្នាក់ដឹកនាំរាជរដ្ឋាភិបាល ជូនដល់កងកម្លាំងទាំងអស់ ដែលជានិច្ចកាល​តែងតែបានគិតគូរអំពីសុខទុក្ខ និងជីវភាពរស់នៅរបស់កងកម្លាំងការពារទាំង អស់ដែលបាន​លះបង់កម្លាំងកាយចិត្ត ក្នុងបុព្វហេតុការពារជាតិមាតុភូមិ ​បូរណភាពទឹកដី​ និង រក្សាសុខសន្តិភាព ជូនប្រទេសជាតិ និងប្រជាជនទាំងមូល ។

ឯកឧត្តមក៏បានថ្លែងកោតសរសើរ នឹងវាយតម្លៃខ្ពស់ចំពោះលទ្ធផលការងារ ​ដែលកងកម្លាំងទាំងបី សម្រេច​បាននាពេលកន្លងមក ​ក្នុងការចូលរួមយ៉ាងសកម្មក្នុងការការពារនូវសុខ​ សន្តិភាព ស្ថិរភាព​ការអនុវត្តគោលនយោបាយ ភូមិ-ឃុំមានសុវត្ថិភាព​ស្របតាមតួនាទី​ និងភារកិច្ចរៀងៗខ្លួន ប្រកប​ដោយស្មារតីទទួលខុស​ ត្រូវខ្ពស់​ក្នុងការបង្ការ ​និងទប់ស្កាត់​បញ្ហាដែលកើត​មានឡើងក្នុងភូមិ​សាស្ត្រ​របស់ខ្លួន ។

ទន្ទឹមនេះ ឯកឧត្តម​ក៏បានជំរុញបន្ថែមដល់កងកម្លាំងទាំងអស់ ត្រូវបន្តយកចិត្តទុកដាក់អនុវត្ត​នូវភារកិច្ច ​ស្នូលរបស់ខ្លួន ​និងចូលរួមថែរក្សាឲ្យបាននូវសុខសន្តិភាព​ ស្ថិរភាពនយោបាយ ដោយ​បន្តគាំទ្រ ​ការដឹកនាំ​របស់​សម្តេចតេជោជាបន្តទៀត​ ក្នុងឱកាសបោះឆ្នោត​ជ្រើសរើស​តំណាង​រាស្ត្រ​នីតិកាលទី៧ខាងមុខនេះ​ និង​គាំទ្រ​ឯកឧត្តមបណ្ឌិត ហ៊ុន ម៉ាណែត​ ជាបេក្ខភាពនាយករដ្ឋមន្ត្រី​នាពេលអនាគត។

ក្នុងឱកាសចុះសាកសួរសុខទុក្ខនោះដែរ ​ឯកឧត្តមក៏បានឧបត្ថម្ភ​ដល់អង្គភាពទាំងបីរួម មាន ក្នុង​មួយអង្គភាពៗ​ទទួលបានស្រាបៀកម្ពុជា​ ៥០កេស ​ទឹកសុទ្ធអរុណា​ ៥០កេស ថវិកា៥​ លានរៀល និង​ជូនកងកម្លាំងក្នុងម្នាក់ៗ ​៤ម៉ឺនរៀល​ និងបានជូនពរក្នុងឱកាស ​ចូលឆ្នាំថ្មីប្រពៃ ណីជាតិខ្មែរ​ឆ្នាំ២០២៣ ៕