សៀមរាប៖ Guinness world record ចាប់ផ្តើមពិនិត្យ និងរាប់បេះដូង ខណៈ ឯតទគ្គកម្ម «បេះដូងច្រើនជាងគេលើពិភពលោក» របស់កម្ពុជានឹងប្រកាសផ្លូវការនៅម៉ោង៤រសៀលនេះ។

ក្រោយការរៀបចំតំរៀបបេះដូងរួចរាល់ នៅព្រឹកថ្ងៃទី១១ ខែមេសា ឆ្នាំ២០២៣នេះ ការរាប់ និងត្រួតពិនិត្យ​បេះដូង​បានចូលមកដល់ ដោយមានការចុះពិនិត្យដោយផ្ទាល់ពីមន្ត្រី នៃ​គណៈកម្មាការកំណត់​ត្រាឯតទគ្គកម្មពិភពលោក ​Guinness world record ។

ឯកឧត្តម សុខ សប្បាយណា ប្រធានក្រុមការងារប្រតិបត្តិនៃយុទ្ធនាការ#Beyond the Game បានថ្លែងថា បេះដូងដ៏ច្រើនដែលបានយកមករៀបចំបង្ហាញនៅសួនបេះដូងមុខប្រាសាទអង្គរវត្តនេះ គឺជាបេះដូងក្រដាសដែលបានចូលរួមបត់កន្លងមក ​ដោយប្រជាពលរដ្ឋខ្មែរ ក្មេងចាស់ ប្រុសស្រី ទូទាំង​ប្រទេសចូលរួមលើកទឹកចិត្តដល់កីឡាករ​ កីឡាការិនី ជាពិសេស​ ខណៈដែលកម្ពុជា​ធ្វើ​ជាម្ចាស់ផ្ទះនៃការប្រកួតស៊ីហ្គេមលើកទី៣២ ​និងអាស៊ានប៉ារ៉ាហ្គេម លើកទី១២ ជាលើកដំបូង។

ឯកឧត្តមបន្តថា ​សហភាពសហព័ន្ធកម្ពុជា (សសយក) គ្រាន់តែជា ទទួល​ អ្នក​ប្រមូល​រៀបចំ ​និង​ដាក់​បង្ហាញទឹកចិត្ត ​បេះដូងរបស់ប្រជាពលរដ្ឋខ្មែរទូទាំងប្រទេស ​មកពីគ្រប់ទិសទី ​ដើម្បីរៀបចំបំបែក​កំណត់​ត្រាពិភពលោក ​ជាបេះដូងច្រើនជាងគេ ​ដែលកើតចេញពីកម្លាំងសាមគ្គី រួមគ្នា​របស់​ពលរដ្ឋ​ខ្មែរ។ ហើយបេះដូងមួយមានតម្លៃ៥០០រៀល ​ដែល​មានការចូលរួមឧបត្ថម្ភពីក្រុមហ៊ុន​មួយ​ចំនួន ហើយ​នឹងយកថវិកានេះទៅជួយដល់កីឡាករ ​កីឡាការិនី ​មានពិការភាពផងដែរ។

សូមបញ្ជាក់ថា កម្ពុជាគ្រោងបត់បេះដូង ​បំបែកកំណត់ត្រាពិភពលោក ​អោយបាន១លានបេះដូង ខណៈបច្ចុប្បន្ន ​មានការបំបែកកំណត់ត្រាប្រភេទនេះ នៅប្រទេស ​អង់គ្លេស ​ដែលមានបេះដូងបត់ និងបានដាក់បង្ហាញចំនួន ៥៣៧០៤ បេះដូង ។

ហើយតាមការអោយដឹងពីក្រុមការងារចូលរួមរាប់បេះដូង ដែលត្រូវបានជ្រើសរើសដោយ Guinness world Record បានអោយដឹងថា ​គិតមកដល់ពេលនេះ ការរាប់បេះដូងបានលើសពីមួយលានហើយ តែចំនួនប៉ុន្មានអោយជាក់លាក់ ​និងប្រកាសជាផ្លូវការនៅម៉ោង៤រសៀលនេះ ​ដោយតំណាងខាង Guinness world record ។ បេះដូងទាំងអស់បានយកមករៀបចំជាសួនបេះដូង នៅមុខប្រាសាទ​អង្គរវត្ត នៅសងខាងក្តារបែន ដោយខាងជើងក្តារបែនមានរូប «បេះដូង» ដែលផ្គុំពីបេះដូងតូចៗ និង​ខាងត្បូងក្តារបែនមានរូបដែលចេញអក្សរថា«ខ្មែរ»​ ផ្គុំពីបេះដូងតូចៗ ហើយបេះដូង​ផ្សេងទៀត​នៅសល់ពីការតំរៀបផ្គុំនេះ ​បានយកមកចង​ និងតំរៀបនៅរានហាលមុខអង្គរ ដើម្បីបង្ហាញ​ជូន​ដល់សាធារណជន ទេសចរជាតិ និងអន្តរជាតិ រហូតដល់ចប់ព្រឹត្តិការណ៍អង្គរសង្ក្រាន្តផងដែរ៕

អត្ថបទ៖ ពៅ រក្សា