ភ្នំពេញ៖ គ្រឹះស្ថានអប់រំ និងសាកលវិទ្យាល័យ ក្នុងប្រទេសកម្ពុជា រួមជាមួយសាកលវិទ្យាល័យ នៃប្រទេសចិនសរុបចំនួន២០ នឹងចូលរួមបង្កើតកម្មវិធីពិព័រណ៍អាហារូបករណ៍ និងការសិក្សា ដល់សិស្សនិស្សិត ។

ពិព័រណ៍នេះនឹងប្រព្រឹត្តទៅនៅថ្ងៃទី២៣ ខែមេសា ឆ្នាំ២០២៣ ចាប់ពីម៉ោង១២ថ្ងៃត្រង់ ក្នុង​បរិវេណ​សាលារៀន “គ្រូយើង” នៅតាមបណ្ដោយផ្លូវ២៧១ សង្កាត់ផ្សារដើមថ្កូវ ខណ្ឌចំការមន រាជ​ធានីភ្នំពេញនឹងមានការអញ្ជើញចូលរួមជាអធិបតីពីសំណាក់ឯកឧត្តមបណ្ឌិត ស្រេង វង្សហៀង អនុរដ្ឋលេខាធិការក្រសួងមហាផ្ទៃ និងឯកឧត្តម លោកជំទាវ លោកគ្រូ អ្នកគ្រូ ដែល​ជា​សាស្ត្រាចារ្យ នៃសាកលវិទ្យាល័យ វិទ្យាល័យនានាផងដែរ ។

ទិសដៅ​នៃកម្មវិធី រួមមាន ការផ្តល់ជាព័ត៌មានក្នុងការដាក់ពាក្យស្នើសុំអាហារូបករណ៍ របៀប​ដាក់​ពាក្យ ព្រមជាមួយការផ្ដល់ជាអាហារូបករណ៍ ដល់សិស្សនិស្សិតដែលមានទាំងថ្នាក់ បាក់​ឌុប​អន្តរជាតិ បរិញ្ញាបត្រ អនុបណ្ឌិត និងបណ្ឌិត ជាច្រើនកន្លែង ។ បន្ថែម​ពី​នេះ​កម្ម​វិធី​ក៏​មាន​ការ​ចាប់ឆ្នោត​ផ្សង​សំណាង​ឈ្នះ​រង្វាន់​ទៅ​ទស្សនកិច្ច​សិក្សា​នៅ​ប្រទេស​ចិន​រយៈពេល​មួយ​សប្ដាហ៍​ចំនួន​៣រ​ង្វាន់ថែមទៀតផង ។

ពិព័រណ៍អាហារូបករណ៍ និងការសិក្សានេះ មានការរៀបចំ​ឡើង​ដោយ​សមាគម​និស្សិត​សាកលវិទ្យាល័យ រាជធានីភ្នំពេញ និងបណ្ដាខេត្ត (PPSA) ដែលសហការដោយ សាលាគ្រូយើង និង សាលារៀន Step Forward Abroad School និងចូលរួមសហការណ៍បន្ថែមពី សាលា​ជំនាន់ថ្មី, វិទ្យាល័យព្រះស៊ីសុវតិ្ថ, វេទិកាពិភាក្សាឯករាជ្យ IR’s TALK, ក្រុមហ៊ុនវិនិយោគ, សមាគម​អតីត​និស្សិតកម្ពុជាពីសាកលវិទ្យាល័យបច្ចេកវិទ្យាហាប៊ីនជាដើម ។

PPSA ជាសមាគមដែលឯករាជ្យ អព្យាក្រឹត និងមិនមានទាក់ទងក្នុងកិច្ចការនយោបាយ ឬធ្វើសកម្មភាពនយោបាយណាមួយឡើយ បង្កើតឡើង​ដើម្បីចូលរួម​ក្នុង​ការដោះ​ស្រាយ​បញ្ហា​នានា ដល់និស្សិតគ្រប់ខេត្ត ដែលបានឡើងមកបន្ដការសិក្សានៅភ្នំពេញ លើកិច្ចការ​សម្រប​សម្រួល​ឯកសាររដ្ឋបាលចូលសិក្សា កន្លែងស្នាក់នៅ សុខុមាលភាព ស្វែងរកការងារក្រៅម៉ោង បណ្ដុះបណ្ដាលចំណេះដឹង តម្រង់ទិសសិក្សា និងផ្សព្វផ្សាយ​ព័ត៌មាន​ពី​ការ​សិក្សា​របស់​សាកលវិទ្យាល័យនានាក្នុងរាជធានីភ្នំពេញ ក៏ដូចជាអាហារូបករណ៍ក្នុងស្រុក និងក្រៅស្រុក ។

បើតាមតំណាង PPSA បានឲ្យដឹងថា ចក្ខុវិស័យរួមរបស់សមាគម គឺកំពុងព្យាយាមក្នុងការផ្សព្វផ្សាយព័ត៌មានពីការសិក្សានៅសាកលវិទ្យាល័យ និងអាហារូបករណ៍ក្រៅស្រុក ហើយចូលរួមដោះស្រាយនូវបញ្ហានានា ដែលនិស្សិតកំពុងជួបប្រទះជាក់ស្ដែង ដូចជាកង្វះខាតកន្លែងស្នាក់នៅ ថវិកា និងសម្ភារៈសិក្សាជាដើម ។ ជាការពិតណាស់សមាគមក៏នឹងកំពុងព្យាយាម ចូលរួមចំណែកចែករំលែកនូវរាល់ចំណេះដឹងទាំងនេះ និងពង្រឹងសមត្ថភាពនិស្សិតទាំងអស់ នៅទូទាំងប្រទេសដោយមានការបង្កើតនៅកម្មវិធីជាច្រើន ជាក់ស្ដែងដូចជាកម្មវិធី ពិព័រណ៍អាហារូបករណ៍ និងការសិក្សានេះជាដើម ។

តំណាងដដែលបន្តថា សមាគមមានបេសកកម្ម គ្របដណ្តប់លើ សសរស្ដម្ភសំខាន់ៗចំនួនបួន គឺទី១. ការគ្រប់គ្រងប្រព័ន្ធស្នាក់នៅ និងការងារក្រៅម៉ោង ដែលធ្វើការសម្រួលដល់សិស្សនិស្សិតក្នុងការស្វែងរកកន្លែងស្នាក់នៅ ដែលមានសុខសុវត្ថិភាព និងតម្លៃសមរម្យ ព្រមទាំងជួយសម្របសម្រួលស្វែងរកការងារក្រៅម៉ោង ឬកិច្ចហាត់ការនានា ដល់សិស្សនិស្សិតមានបញ្ហាហិរញ្ញវត្ថុ និងចង់បានបទពិសោធន៍ការងារបន្ថែមដើម្បីងាយស្រួលរកការងារធ្វើពេលរៀនចប់, ទី២. ការគ្រប់គ្រងប្រព័ន្ធផ្សព្វផ្សាយព័ត៌មានសកលវិទ្យាល័យ និងកម្មវិធីសិក្សា ដែលធ្វើការសម្របសម្រួលព័ត៌មាន ពីកម្មវិធីសិក្សា ជំនាញដែលល្បីៗ និងមាននៅតាមស្ថាប័នអប់រំ និងសាកលវិទ្យាល័យទូទាំងប្រទេស ហើយសិស្សានុសិស្សក៏អាចស្នើសុំការពិគ្រោះយោបល់ពីអ្នកជំនាញប្រឹក្សាយោបល់របស់សមាគមផងដែរ, ទី៣. ការគ្រប់គ្រងសុខុមាលភាពដំណោះស្រាយ និងប្រតិកម្មរហ័ស ដែលធ្វើការជួយសម្រួលដល់សិស្សនិស្សិត ដែលជួបប្រទះផលវិបាកផ្សេងៗ ទាក់ទងទៅលើសុខមាលភាព និងចូលរួមផ្ដល់ជាដំណោះស្រាយជូននិស្សិតដែលជួបគ្រោះទុរភិក្ស ជួបឧបទ្ទវហេតុ ការបៀតបៀន ការគំរាមកំហែង និងការរើសអើងផ្សេងៗ និងទី៤. ការគ្រប់គ្រងវិស័យអប់រំ និងអាហារូបករណ៍ ដែលធ្វើការ ទៅលើការបង្ហាត់បង្ហាញបទពិសោធន៍សិក្សា ការចែករំលេកចំណេះដឹង ភាពជាអ្នកដឹកនាំ ការតម្រង់ទិសសិក្សាផ្សេងៗ និងផ្សព្វផ្សាយអាហារូបករណ៍ក្នុងស្រុក និងក្រៅស្រុក ស្ថាប័ន សាកលវិទ្យាល័យក្នុងរាជធានីភ្នំពេញ តាមបណ្តាខេត្តនានា និងក្រៅប្រទេស ៕ អត្ថបទ៖ បាន សុខរិទ្ធិ