អ៊ីស្រាអែល៖ បាតុករ​អ៊ីស្រាអែល​រាប់រយ​នាក់បាន​ប្រមូល​ផ្តុំគ្នា​នៅ​ទីក្រុង Tel Aviv កាលពី​យប់​ថ្ងៃ​ចន្ទ ទី​១០ ខែមេសា ដើម្បី​តវ៉ា​ប្រឆាំង​រដ្ឋាភិបាល​អ៊ីស្រាអែល បន្ទាប់ពី​នាយករដ្ឋមន្ត្រីលោក Benjamin Netnayhau ថ្លែង​សុន្ទរកថា​តាម​ទូរទស្សន៍​ទាក់ទង​នឹង​ស្ថានភាព​សន្តិសុខ​ជាតិ​។

​ក្រុមបាតុករដែល​បានធ្វើ​បាតុកម្ម​ប្រចាំ​សប្តាហ៍​ ជុំវិញ​ការកែប្រែ​ប្រព័ន្ធតុលាការ​របស់​អ៊ីស្រាអែល និង​គោលនយោ​បាយ​រដ្ឋាភិបាល​ផ្សេងទៀតបាន​ចោទប្រកាន់លោក Netanyahu ពី​ការដាក់​កំហុស​លើ​គណបក្សប្រឆាំង និង​ក្រុមបាតុករ​ចំពោះ​ការ​ឲ្យ​ទទួលខុសត្រូវ​បញ្ហា​សន្តិសុខ​នាពេល​ថ្មីៗ​នេះ ដោយ​ចាត់ទុក​សកម្មភាព​រប​ស់​រដ្ឋាភិបាល​ថា​ជា «​ការ​ញុះញង់​»​។ ក្រុមបាតុករបាន​ស្រែក​ពាក្យ​ផ្សេងៗ និង​បិទផ្លូវ​នានា​ក្បែរផ្លូវ​ហាយវ៉េ​ក្នុង​ទីក្រុង Tel Aviv​។​ ​កាលពី​ពេលមុន លោក Netanyahu បាន​និយាយថា លោក​នឹង​ទុក​រដ្ឋមន្ត្រី​ការពារជាតិលោក Yoav Gallant ឲ្យ​នៅ​តំណែង​ដដែលបណ្តាល​ឲ្យ​មាន​វិបត្តិ​សន្តិសុខ​កាន់តែ​រីកធំឡើង ដោយ​លុបចោល​សេចក្តីសម្រេច​ក្នុង​ការបណ្តេញ​រដ្ឋមន្ត្រី​រូបនេះ បង្កឱ្យមាន​ការតវ៉ា​ និង​ធ្វើឱ្យមាន​ការភ្ញាក់ផ្អើល​នៅ​បរទេស​។

​លោក​និយាយថា ភាគី​ទាំង​ពីរបាន​ដោះស្រាយ​ការខ្វែងគំនិត​គ្នា​របស់​ពួកគេ​ ជុំវិញ​ការអំពាវនាវ​ជា​សាធារណៈ​របស់លោក Gallant កាលពី​ខែ​មុន សម្រាប់​ការបញ្ឈប់​ផែនការ​ផ្លាស់ប្តូរ​ប្រព័ន្ធតុលាការ​ដែលមាន​ការ​តវ៉ា​ជាច្រើន ដែល​លោក Gallant និយាយថា ​បាន​ក្លាយទៅជា​ការគំរាមកំហែង​ដល់​សន្តិសុខ​របស់​ប្រទេស​អ៊ីស្រាអែល​។ កាលពី​សប្តាហ៍​មុន លោក Netanyahu បានប្រកាសថា លោក​នឹង​ពន្យារពេល​ការបណ្តេញចេញ​រដ្ឋមន្ត្រី​ការពារ​ជាតិ​រូបនេះ៕

អត្ថបទ៖ ប៊ុនថន