បន្ទាយមានជ័យ៖ នគរបាលអន្តោប្រវេសន៍ច្រកទ្វារព្រំដែនអន្តរជាតិប៉ោយប៉ែត សហការ​ជា​មួយ​ភាគីថៃ ដើម្បីពន្លឿនការប្រថាប់ត្រាលិខិតឆ្លងដែនជូនពលករកម្ពុជា ធ្វើ​ដំណើរចូលមកលេងស្រុក​កំណើត​ឱ្យឆាប់រហ័ស ​ក្នុងឱកាសបុណ្យចូលឆ្នាំប្រពៃណីខ្មែរ។

ដោយអនុវត្តតាមការណែនាំ​របស់​លោកឧត្ដមសេនីយ៍ត្រី អ៊ី ចំរើន នាយប៉ុស្តិ៍ នគរបាល​អន្តោ​ប្រវេសន៍​ច្រកទ្វារព្រំដែនអន្តរជាតិប៉ោយប៉ែត ​និង​មានការឯកភាពពីភាគីថៃ​ផងនោះ​ ដើម្បី​សម្រួល​និងពន្លឿនការប្រថាប់ត្រាលិខិតឆ្លងដែនជូនបងប្អូនពលករកុំឲ្យមានការរងចាំយូរនៅឯច្រកទ្វារព្រំដែនអន្តរជាតិខ្លងលឹក មន្រ្តីនគរបាលអន្តោប្រវេសន៍ក្រុមការងាររបស់ប៉ុស្តិ៍ ​បានសហការជាមួយ​អាជ្ញាធរក្រុង បាន​យករថយន្តដឹកជញ្ជូន​ពលករខ្មែរ​ដែលមក​ដល់​ច្រកទ្វារព្រំដែន​អន្តរជាតិខ្លង​លឹក​ ដែលរង់ចាំយូរ ដោយមូលហេតុមកពីនគរបាលអន្តោប្រវេសន៍ថៃ នៅច្រកទ្វារព្រំដែន​អន្តរជាតិ​ខ្លងលឹក ​ដែលជាកន្លែងផ្ដល់ទិដ្ឋាការ RE-ENTRY PERMIT ជូនគាត់មិនទាន់​មូលហេតុ (ម៉ាស៊ីនមានតែមួយ)​បាន​ជាបណ្តាលឲ្យបងប្អូន​ពលករដែលឆ្លងដែន​មកមានការកក់ស្ទះរង​ចាំយូរ​យ៉ាងដូច្នេះ។

លោកឧត្តមសេនីយ៍ត្រី អ៊ី ចំរើន ​នាយប៉ុស្តិ៍នគរបាលអន្តោប្រវេសន៍​ច្រកទ្វារព្រំដែន​អន្តរជាតិ​ប៉ោយប៉ែត ​បាន​បន្តទៀតថា ​ដូចនេះដើម្បីសម្រួល និងពន្លឿនការផ្ដល់ទិដ្ឋាការ ​RE-ENTRY PERMIT ជូន​ដល់ពួកគាត់ឱ្យបានលឿន ​និងឆាប់រហ័សនោះក្រុមការងារយើងបានជួយ​ដឹកពួកគាត់​ត្រឡប់​ទៅ​ស្រុកអារញ្ញប្រាថេតវិញ ដើម្បីធ្វើទិដ្ឋាការ RE-ENTRY PERMIT ជូនគាត់នៅទីនោះមួយកន្លែងទៀត​ដែល​ជាភាពងាយស្រួលសម្រាប់ពួកគាត់ក្នុងការឆ្លងដែនមក ។​ ការអនុវត្តរបៀបនេះ ងាយស្រួល​ដល់​ពួកគាត់នៅពេល​ដែល​គាត់​បាន​ទិដ្ឋាការ​ RE-ENTRY PERMIT​នេះហើយ ​ពេលមកដល់​ច្រកទ្វារគ្រាន់​តែ​នគរបាលអន្តោប្រវេសន៍ថៃ​ប្រថាប់ត្រាលិខិតឆ្លង​ដែនចេញ​ជូនគាត់​ជាការស្រេច។

សូម​បញ្ជាក់ថា ​ក្រៅ​ពីការ​ជួយ​សម្របសម្រួល​គ្រប់​មធ្យោបាយ​ជូន​បងប្អូនពលករខ្មែរទាំងអស់ ក្រុម​ការងារ​បានចែកបាយនឹងទឹកសុទ្ធជូនដល់បងប្អូនដែល​ធ្វើដំណើរ​មក​ដល់​ច្រកទ្វារខ្លងលឹក​ជា​បន្តបន្ទាប់ផង​ដោយដោយមិនគិតពីចំនួនអ្វីនោះឡើយ ​ដើម្បីខ្មែរជួយខ្មែរធ្វើយ៉ាង​ឲ្យបងប្អូនទាំងអស់​បានឆាប់វិលត្រលប់មកដល់ផ្ទះ​សម្បែង​ដើម្បី​ជួបជុំ​សាច់ញាតិ​និង​ចូល​រួមក្នុង ឱកាសបុណ្សចូលឆ្នាំ​ផងដែរ ៕