ភ្នំពេញ៖ ឯកឧត្តម ឃួង ស្រេង អភិបាលរាជធានីភ្នំពេញ បានជំរុញឱ្យមន្ត្រី និងមន្ទីរពាក់ព័ន្ធ​ធ្វើការស្ដារប្រឡាយជើងឯកឱ្យបានលឿន ​និងឱ្យបានធំទូលាយ ​ដើម្បីនាំទឹកចេញ​ពី​រាជធានី​នារដូវវស្សាមកដល់​នាពេលខាងមុខ។

ខណៈអញ្ជើញដឹកនាំអាជ្ញាធរ ​និងមន្ទីរជំនាញចុះពិនិត្យមើលស្ថានភាពប្រឡាយជើងឯក នាព្រឹកថ្ងៃទី១១ ខែមេសា ឆ្នាំ២០២៣ ឯកឧត្តម ឃួង ស្រេង អភិបាលរាជធានីភ្នំពេញ បាន​ជំរុញឱ្យមន្ត្រី និងមន្ទីរពាក់ព័ន្ធធ្វើការស្ដារប្រឡាយជើងឯកឱ្យបានលឿន ​និងឱ្យបានធំទូលាយ ដើម្បីនាំទឹកចេញពីរាជធានីនារដូវវស្សាខាងមុខ។

ឯកឧត្តម បានលើកឡើងថា ការងារដែលត្រូវអនុវត្តពាក់ព័ន្ធនិងការស្ដារប្រឡាយនេះ នៅមាន​ពេល៤ខែ ពិសេសនៅក្នុងរដូវប្រាំងនេះព្រោះងាយស្រួលក្នុងការស្ដារ ក៏ដូចជាពង្រីកតួប្រឡាយ​ឱ្យបានធំ ធ្វើយ៉ាងណាពេលរដូវវស្សាមកដល់ គឺអាចរុញ​ទឹកចេញពីរាជធានីភ្នំពេញបានលឿន កាត់បន្ថយបាននូវការលិចលង់លំនៅឋានប្រជាពលរដ្ឋនៅក្នុងរាជធានី ។

លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យថា ប្រឡាយ​ជើងឯក មានតួនាទីសំខាន់ណាស់នៅក្នុងការរំដោះទឹកចេញពីរាជធានីភ្នំពេញ ដោយហូរចាក់​មក​ស្ថានីយបូមទឹកបឹងត្របែក ដែលមានប្រវែងប្រមាណ១២គីឡូម៉ែត្រ ​ចាប់ពីស្ថានីយបូមទឹកបឹងត្របែក ឆ្លងកាត់ខណ្ឌមានជ័យ ខណ្ឌដង្កោ បន្តរហូតដល់ភូមិស្ទឹងជ្រៅ នៅក្នុងសង្កាត់ដើមមៀន ក្រុងតាខ្មៅ ខេត្តកណ្ដាល ។

លោក សាំ ពិសិដ្ឋ បន្តថា តាមការណែនាំរបស់ ឯកឧត្តម ឃួង ស្រេង គឺតម្រូវឱ្យក្រុមការងារធ្វើ​ការស្ដារ ​និងកាយប្រឡាយនេះឱ្យបានទំហំទទឹងចាប់ពី២០ម៉ែត្រ ទៅ៦០ម៉ែត្រ ទៅតាមស្ថានភាព​ជាក់ស្ដែង។ ក្រុមការងារត្រូវបន្តអនុវត្តការងារនេះជាប្រចាំ​ និងឱ្យរួចរាល់នៅមុនរដូវវស្សាមកដល់ មានន័យថា ​ពេលរដូវវស្សាមកដល់ ប្រឡាយនេះ ត្រូវតែដើរតួរយ៉ាងសំខាន់​ក្នុងការរំដោះទឹក​ចេញពីរាជធានីភ្នំពេញបានល្អ៕អត្ថបទ ៖ ប្រាក់ វ៉ាន់ដា