កំពង់ស្ពឺ៖ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃ​កង​យោធពល​ខេមរៈភូមិន្ទ នៅថ្ងៃទី១១ ខែមេសា ឆ្នាំ២០២៣ តំណាងដ៏ខ្ពង់ខ្ពស់សម្ដេចតេជោ ហ៊ុន សែន នាយករដ្ឋមន្ត្រី បាននាំយកអាវភ្លៀងជាច្រើន ដែលជាអំណោយ​របស់សម្តេច​ចែក​ជូន​នាយនាវី នាយនាវីរង និងពលនាវីចំណុះបញ្ជាការដ្ឋានការពារកោះ-ឆ្នេរ។

ថ្លែងក្នុងពិធីចែកអាវភ្លៀងនោះ នាយឧត្តមសេនីយ៍ ឥត សារ៉ាត់ មានប្រសាសន៍ថា ប្រមុខ​រាជ​រដ្ឋាភិបាល​កម្ពុជា សម្តេចតេជោ ហ៊ុន សែន តែងតែយកចិត្តទុកដាក់ដោះស្រាយរាល់ការលំបាក និង​ទំនុក​បំរុង ផ្គត់ផ្គង់គ្រប់បែបយ៉ាងដល់កងយោធពលខេមរភូមិន្ទ ជាពិសេស​ចែក​ជូន​អាវ​ភ្លៀង​ដល់​កង​ទ័ពទាំងជើងទឹក និងជើងគោក ជារៀងរាល់រដូវកាល មិនថាដូវភ្លៀងផ្តល់អាវភ្លៀង និង​រដូវ​រងារ​ផ្តល់​ជូនអាវរងារ។

នាយឧត្តមសេនីយ៍ ឥត សារ៉ាត់ បញ្ជាក់ថា ការផ្តល់អំណោយអាវភ្លៀងជូននាយនាវី នាយនាវីរង និង​ពលនាវី គឺជាការឆ្លើយតបចំពោះមុខជូនកងកម្លាំងទាំងអស់ ដោយសារ​អំឡុង​បំពេញ​កាតព្វកិច្ច​របស់​ខ្លួន ដើម្បីការពារកោះ ឆ្នេរក្នុងរដូវវស្សា ជាភាពចាំបាច់​សម្រាប់​បង្ក​លក្ខណៈ​​ងាយ​ស្រួល​ដល់កម្លាំងមានសម្ភារៈប្រើប្រាស់គ្រប់គ្រាន់។

នាឱកាសនោះ នាយឧត្តមសេនីយ៍ ឥត សារ៉ាត់ ក៏បានឆ្លៀតពន្យល់ពីគុណតម្លៃ ក៏ដូច​ជា​សារៈសំខាន់ នៃ​សន្តិភាព សម្រាប់ការកសាង និងអភិវឌ្ឍប្រទេសលើគ្រប់វិស័យ និង​បាន​លើក​ពី​ឧបាយកល​ទុច្ចរិត និងសកម្មភាពក្បត់ជាតិម្តងហើយម្តងទៀត របស់ជនអគតិ ដែលតែងតែ​ប៉ុនប៉ង​ធ្វើវិទ្ធង្សនា ដល់ការអភិវឌ្ឍតាមរយៈបំផុសបំផុល មួលបង្កាច់ បង្កចលាចល​តាម​គ្រប់​រូបភាព ដើម្បីបង្កអស្ថិរភាពដល់សង្គមកម្ពុជា។

នាយឧត្តមសេនីយ៍ ឥត សារ៉ាត់ បានរំលឹកដល់កងទ័ពឲ្យបន្តលើកកម្ពស់មនសិការស្នេហាជាតិ ស្មោះត្រ​ង់ជាមួយរាជរដ្ឋាភិបាល រួមកម្លាំងសាមគ្គី ការពារសន្តិភាព ទប់ស្កាត់ និងបង្រ្កាប​ទាន់​ពេល​វេលា​ចំពោះ​ជនអគតិទាំងឡាយ ដែលមានឧបាយកលចង់បំផ្លាញសុខសន្តិភាព និងបន្តថែរក្សា​រាល់​សមិទ្ធផលនានា ដែលប្រសូត្រចេញពីនយោបាយឈ្នះ-ឈ្នះ របស់មគ្គុទ្ទេស សន្តិភាព សម្តេច​តេជោ ហ៊ុន សែន ដើម្បីនាំមកនូវវឌ្ឍនភាព និងវិបុលភាពថែមទៀតសម្រាប់ប្រជាជន និង​សង្គមជាតិ។

នាយឧត្តមសេនីយ៍ ឥត សារ៉ា់ត់ បានថ្លែងអំណរគុណ ដល់កងកម្លាំងទាំងអស់ ដែល​បាន​ចូលរួម​ក្នុង​ការ​ងារ​ជួយ​សង្រ្គោះ​ប្រជាពលរដ្ឋ​ពី​គ្រោះមហន្ត​រាយ​ដោយ​ជំនន់​ទឹក​ភ្លៀង​នា​ពេល​កន្លង​ទៅថ្មី​ៗ​នេះ តាមបទបញ្ជារបស់ប្រមុខរាជរដ្ឋាភិបាល ក្រសួងការពារជាតិ និងអគ្គបញ្ជាការ៕