ភ្នំពេញ៖ ឯកឧត្តម សេង សុមុនី អ្នកនាំពាក្យ និងជារដ្ឋលេខាធិការតំណាងឯកឧត្តម ឈិត សុខុន រដ្ឋមន្រី្តក្រសួងធម្មការ និងសាសនា បានលើកឡើងប្រាប់បណ្តាញBTV ព័ត៌មាន នាព្រឹកថ្ងៃទី១១ ខែមេសានេះថា ក្រសួងធម្មការ និងសាសនា បានណែនាំឲ្យមនី្ទរធម្មការ និងវត្តអារាម បណ្តារាជធានី ខេត្ត រៀបចំតុបតែងលម្អ និងលេងល្បែងប្រជាប្រិយខ្មែរ នាឱកាសបុណ្យចូលឆ្នាំថ្មី ឆ្នាំថោះ ដើម្បីឲ្យប្រជាពុទ្ធបរិស័ទ មកកាន់វត្តអារាម បានស្គាល់ពីអត្តសញ្ញាណជាតិ។

ឯកឧត្តម សេង សុមុនី បានលើកឡើងទៀតថា ការចូលឆ្នាំថ្មី ឆ្នាំថោះ ប្រពៃណីជាតិនេះ គឺជាការកំណត់​សម្គាល់នូវអត្តសញ្ញាណជាតិ ​ដែលហៅថាប្រពៃណី វប្បធម៌ ទំនៀមទម្លាប់ គ្រប់គ្រង​ថែរក្សានូវអត្តសញ្ញាណជាតិខ្មែររបស់យើង ​ដែលមិនអាចអាក់ខានបាននោះទេ។ ត្រង់ចំណុចនេះក្រសួងធម្មការ និងសាសនា បានចេញសេចកី្តណែនាំ ក៏សូមថ្លែងអំណរគុណ ទុកជាមុនចំពោះអាជ្ញាធរដែលបានរក្សានូវសុខសន្តិភាព ​សុវតិ្ថភាពជូនប្រជាពលរដ្ឋតាមមូលដ្ឋាន ជាពិសេសតាមវត្តអារាម។ សុំមេត្តាបន្តថែរក្សានូវសុវតិ្ថភាពជូនប្រជាពលរដ្ឋពុទ្ធបរិស័ទ ដែលអញ្ជើញទៅបំពេញបុណ្យឲ្យបានល្អប្រសើរ។ ក្នុងសេចកី្តណែនាំដ៏ដែលនោះ មានការជឿជាក់ និងទុកចិត្ត យ៉ាង​មុតមាំ​ ចំពោះគណៈសង្ឃ និងមនី្ទរធម្មការ និងសាសនា រួមនិងមន្រី្តពាក់ព័ន្ធ​ទាំងអស់ ពិតជាសហការគ្នាបានល្អ ដើម្បីបម្រើដល់ពិធីបុណ្យចូលឆ្នាំថ្មី ​ឲ្យបានល្អប្រសើរ ហើយ​រក្សាបាននូវអ្វីៗដែលជា​កេរ្តិ៍មរតក​ជាតិ ការពារបាននូវសុខសន្តិភាព ​ខិតខំថែរក្សាពូនផ្តុំ នូវរាល់​ចំណុចដ៏ល្អរបស់ជាតិ ឲ្យកាន់តែល្អប្រសើរ ដើម្បីទុក​កេរ្តិ៍មរតក​ជូនកូនចៅជំនាន់ក្រោយ។

ឯកឧត្តម សេង សុមុនី បានបញ្ជាក់ទៀតថា​ អ្វីដែលជាមនសិកាជាតិនោះ ​គឺយើងទាំងអស់គ្នាកុំភ្លេច​គុណសន្តិភាព គឺសម្តេចតេជោ ហ៊ុន សែន នាយករដ្ឋមន្រី្ត ដែលសម្តេចតេជោ បានផ្តល់ជូនប្រជាពលរដ្ឋទាំងអស់គ្នា។

ដូច្នេះក្នុងឱកាសបុណ្យចូលឆ្នាំថ្មី ឆ្នាំថោះ ប្រពៃណីជាតិ យើងសប្បាយរីករាយ យើងក៏ត្រូវនឹកឃើញ​គុណូបការៈ​ទាំងអស់នេះផង ​ដូនតាយើងក៏នឹក ​គ្រូបាធ្យាយ​យើងក៏នឹក ពលីជនដែលបាន​បូជា​សាច់ស្រស់ ឈាមស្រស់ ​ដើម្បីជាតិមាតុភូមិ ​រំដោះយើងឲ្យរស់នោះ យើងត្រូវនឹកគុណជូន​បុណ្យលោក ​ហើយអ្នកនៅរស់ ​ដែលបានដឹកនាំប្រទេស​ សម្បូរសប្បាយ ក៏យើងមិនត្រូវភ្លេច​គុណផងដែរ៕អត្ថបទ រដ្ឋា