​អាមេរិក៖ មន្ទីរ​បញ្ច​កោន​បាន​និយាយ​កាលពី​ថ្ងៃ​ចន្ទ​ថា ការ​បែក​ធ្លា​យឯក​សារ​សហរដ្ឋអាមេរិក​ស​ម្ងា​ត់​បំផុត​ដ៏​រសើប ដែល​ភាគច្រើន​នៃ​ឯកសារជាប់​ពាក់ព័ន្ធ​នឹង​ជម្លោះ​នៅ​អ៊ុយ​ក្រែ​ន បង្ហាញ​ពី​ហា​នី​ភ័យ​ធ្ងន់ធ្ងរ​ចំពោះ​សន្តិសុខ​ជាតិ​សហរដ្ឋអាមេរិក​។

អ្នកនាំពាក្យ​សេត​វិមានលោក John Kirby បាន​និយាយ​កាលពី​ថ្ងៃ​ចន្ទ​ថា ប្រធានាធិបតី​សហរដ្ឋអាមេរិកលោក Joe Biden ត្រូវបាន​គេ​រាយការណ៍​ជូន​ដោយ​សង្ខេប អំពី​ការ​បែកធ្លាយ​ឯកសារ​យោធា​អាមេរិក​ដែល​សម្ងាត់​បំផុត​កាលពី​សប្តាហ៍​មុន​។ ក្នុងអំឡុងពេល​សន្និសីទ​សារព័ត៌មានកាលពី​ថ្ងៃ​ចន្ទ លោក Kirby បាន​និយាយថា​ ឯកសារ​មួយចំនួន​ទំនងជា​ជាប់ទាក់ទង​ដោយផ្ទាល់​ទៅនឹង​ការព្រួយបារម្ភ​ពី​សន្តិសុខ​ជាតិ និង​ការ​ស៊ើបការណ៍​សម្ងាត់​។ យោងតាម​លោក Kirby បាន​ឲ្យ​ដឹងថា រដ្ឋាភិបាល​សហរដ្ឋអាមេរិកដឹងថា​ ឯកសារ​មួយចំនួន​ត្រូវបាន​កែ​ខ្លឹមសារ ប៉ុន្តែ​លោក​បាន​បដិសេធ​មិន​និយាយ​អំពី​សុពលភាព​នៃ​អ្វីដែល​បាន​បែកធ្លាយ​នោះទេ​។ មន្ត្រី​អាមេរិក ៣​រូប​បាន​និយាយថា ភ្នាក់ងារ​សន្តិសុខ​ជាតិ​របស់​សហរដ្ឋអាមេរិកកំពុង​ពិនិត្យមើល​ឡើងវិញ​ ពី​របៀប​ដែល​ពួកគេ​ចែករំលែក​រឿង​សម្ងាត់​ដ៏​រសើប​បំផុត​របស់​ពួកគេ​នៅក្នុង​រដ្ឋាភិបាល​សហរ​ដ្ឋ​អាមេរិក និង​ដោះស្រាយ​ការបែកបាក់​ផ្នែក​ការទូត​ពី​ការចេញផ្សាយ​ឯក​សារ​សម្ងាត់​ជាច្រើន​។​

​មន្ត្រី​ម្នាក់​បាន​និយាយថា ក្រុម​អ្នកស៊ើប​អង្កេតកំពុងធ្វើការ​ដើម្បី​កំណត់ថា ​តើ​មនុស្ស ឬ​ក្រុម​ណាខ្លះ​ដែលមាន​សមត្ថភាព និង​ការជំរុញ​ទឹកចិត្ត​ក្នុងការ​ឲ្យ​ចេញផ្សាយ​របាយការណ៍​ស៊ើបការណ៍​សម្ងាត់​។ ការ​បែកធ្លាយ​នេះ​អាចជា​ការចេញផ្សាយ​ព័ត៌មាន​របស់​រដ្ឋាភិបាល​សហរដ្ឋអាមេរិក ​ដែលមាន​ការខូចខាត​ខ្លាំង​បំផុត​ចាប់តាំងពី​ការចេញផ្សាយ​ឯកសារ​រាប់ពាន់​នៅលើ​គេហទំព័រ WikiLeaks កាលពី​ឆ្នាំ២០១៣​។ សារព័ត៌មាន​រ៉​យ​ទ័​រ​បាន​ពិនិត្យ​ឯកសារ​ជាង ៥០ ដែលមាន​ស្លាក «​សម្ងាត់​» និង «​សម្ងាត់​បំផុត​» ដែល​បានបង្ហាញ​ជា​លើកដំបូង​នៅលើ​គេហទំព័រ​បណ្តាញ​ផ្សព្វផ្សាយ​សង្គម​កាលពី​ខែមីនា ហើយ​បង្ហាញ​ព័ត៌មាន​លម្អិត​អំពី​ភាព​ងាយ​រងគ្រោះ​របស់​យោធា​អ៊ុយ​ក្រែ​ន និង​ព័ត៌មាន​អំពី​សម្ព័ន្ធមិត្ត រួមមាន​ទាំង​អ៊ីស្រាអែល កូរ៉េខាងត្បូង និង​ប្រទេស​ទួរគី៕

អត្ថបទ៖ ប៊ុនថន