សៀមរាប៖ ព្រឹត្តិការណ៍បំបែកឯតទគ្គកម្ម "បេះដូងច្រើនជាងគេលើពិភពលោក"បានចាប់ផ្តើមហើយ នៅរសៀលថ្ងៃទី

១១ ខែមេសា ឆ្នាំ២០២៣នេះ នៅប្រាសាទអង្គរវត្ត។

តំណាងស្ថាប័ន Guinness World Records ដែលជាស្ថាប័នកំពូលចុះវត្តមានវត្ថុ ស្នាដៃ និងព្រឹត្តិការណ៍នានា ក្នុង​កំណត់ត្រាបំបែកឯតទគ្គកម្មពិភពលោក បានមកដល់ក្រុងសៀមរាប និងបានពិនិត្យមើលការតាំងរៀប និង​រាប់​បេះ​ដូង​ នៅព្រឹកថ្ងៃ ១១ ខែ មេសា ឆ្នាំ ២០២៣ ដែលតាំងបង្ហាញនៅប្រាសាទអង្គរវត្ត។

គួរបញ្ជាក់ថា ព្រឹត្តិការណ៍នេះជាការផ្ដួចផ្ដើម ឬកម្មវិធីបេះដូងច្រើនជាងគេលើពិភពលោក ដែលមាន​វត្តមាន​ក្រោម​យុទ្ធនាការ BeyondTheGames ក្រោមទិសស្លោក “បេះដូងលោតក្នុងចង្វាក់តែមួយ” ក្នុងន័យគាំទ្រ លើកទឹកចិត្ត និងបង្ហាញសេចក្ដីស្រឡាញ់ដល់កីឡាករ គ្រូបង្វឹក និងអ្នកគាំទ្រផងដែរ គ្រប់ដំណាក់កាលតាំងពីការត្រៀមប្រកួត ការប្រកួត និងក្រោយការប្រកួតនៃព្រឹត្តិការណ៍កីឡាអាស៊ីអាគ្នេយ៍(SEA Games) និងកីឡាអាស៊ានប៉ារ៉ាហ្គេមឆ្នាំ២០២៣ ដែលព្រះរាជាណាចក្រកម្ពុជានឹងធ្វើជាម្ចាស់ផ្ទះក្នុងពេលដ៏ខ្លីខាងមុខនេះ។

បេះដូងក្រដាសបានយកទៅផ្គុំជាផ្ទាំងពាក្យ ឬឃ្លានៅក្នុងបរិវេណប្រាសាទអង្គរវត្តដើម្បីបំបែ​កកំណត់ត្រា​ឯតទគ្គកម្ម​ពិភពលោក និងតាំងបង្ហាញអបអរសាទរខួប១០ឆ្នាំ នៃព្រឹត្តិការណ៍អង្គរសង្ក្រាន្ដ ដែលបច្ចុប្បន្ននេះក្រុម​ការងារបាន​រៀបចំតាំងបង្ហាញបេះដូងក្រដាសដែលប្រមូលពីសាធារណៈជនសម្រាប់បំបែកឯតទគ្គកម្ម​ពិភពលោក​យ៉ាងសស្រាក់សស្រាំ។

ការបំបែកកំណត់ត្រាពិភពលោកនេះ នៅក្នុងបរិវេណប្រាសាទអង្គរវត្ត ក្រោមអធិបតីភាពឯកឧត្តម ហ៊ុន ម៉ានី ប្រធានសហភាពសហព័ន្ធកម្ពុជា ព្រមទាំងបើកទូលាយឱ្យសាធារណៈជនទូទៅអាចចូលរួមដើម្បីជាសក្ខីភាព

ក្នុងការបំបែកឯតទគ្គកម្មពិភពលោកនេះ៕