អន្ដរជាតិ៖ កាលពីថ្ងៃចន្ទសហរដ្ឋអាមេរិក បានសម្រេចថា ប្រទេសរុស្ស៊ីបាន "ឃុំខ្លួនអ្នកយកព័ត៌មានរបស់សារព័ត៌មាន Wall Street Journal ជាជនជាតិអាមេរិកឈ្មោះ Evan Gershkovich ដោយខុសឆ្គង" ដោយ អះអាងថា ការចោទប្រកាន់ពីបទចារកម្ម គឺជាការក្លែងបន្លំ ហើយថាករណីនេះ គឺជារឿងនយោបាយ។

អ្នកនាំពាក្យក្រសួងការបរទេស លោក Vedant Patel បាននិយាយនៅក្នុងសេចក្តីថ្លែងការណ៍មួយថា "វិជ្ជាជីវៈសារព័ត៌មានមិនមែនជាឧក្រិដ្ឋកម្មទេ។

យើងថ្កោលទោសចំពោះការបន្តគាបសង្កត់របស់វិមាន Kremlin ទៅលើសំឡេងឯករាជ្យនៅក្នុងប្រទេសរុស្ស៊ី និងសង្រ្គាមដែលកំពុងបន្តប្រឆាំងនឹងការពិត"។

លោក Patel បាននិយាយថា រដ្ឋាភិបាលសហរដ្ឋអាមេរិកនឹងផ្តល់ការគាំទ្រសមស្របដល់លោកGershkovich និងគ្រួសាររបស់គាត់។

លោកPatel ក៏បានអំពាវនាវឱ្យរុស្ស៊ីដោះលែងលោក Paul Whelan អតីតទាហានម៉ារីនអាមេរិក ដែលកំពុងជាប់ពន្ធនាគាររយៈពេល ១៦ឆ្នាំ នៅក្នុងពន្ធនាគាររុស្សី ហើយក៏ត្រូវបានទីក្រុងវ៉ាស៊ីនតោនចាត់ទុកថាជា "ការឃុំឃាំងដោយខុសឆ្គង" ផងដែរ។

សេវាសន្តិសុខ FSB របស់រុស្ស៊ីបាននិយាយ កាលពីថ្ងៃទី៣០ ខែមីនាថា ខ្លួនបាន​ចាប់ខ្លួនលោក Gershkovich ដោយចោទប្រកាន់គាត់ពីបទប្រមូលព័ត៌មានអំពីក្រុមហ៊ុនការពារជាតិរុស្ស៊ីដែលជាការសម្ងាត់របស់រដ្ឋ។

ស្ថានទូតរុស្ស៊ីនៅទីក្រុងវ៉ាស៊ីនតោន មិនបានឆ្លើយតបភ្លាមៗ ចំពោះសំណើសុំការអត្ថាធិប្បាយលើបញ្ហានេះទេ។

សារព័ត៌មាន Wall Street Journal បានបដិសេធថា លោក Gershkovich មិនបានធ្វើចារកម្មទេ។ សេតវិមានបានហៅការចោទប្រកាន់ចារកម្ម ដែលអាចជាប់ពន្ធនាគាររហូតដល់ ២០ឆ្នាំនោះ ថាជារឿងគួរឲ្យអស់សំណើច។

ប្រធានាធិបតីសហរដ្ឋអាមេរិកលោក Joe Biden បានអំពាវនាវឱ្យមានការដោះលែងលោក Gershkovich ហើយរដ្ឋមន្ត្រីការបរទេស លោកAntony Blinken នៅក្នុងការសន្ទនាតាមទូរស័ព្ទកាលពីថ្ងៃទី២ ខែមេសា ជាមួយសមភាគីរុស្ស៊ីលោក Sergei Lavrov ដោយបានលើកឡើងពីការព្រួយបារម្ភរបស់ទីក្រុងវ៉ាស៊ីនតោនជុំវិញ"ការឃុំខ្លួនអ្នកសារព័ត៌មាន"ដែលមិនអាចទទួលយកបាននេះ។

លោក Patel បានប្រាប់អ្នកសារព័ត៌មានមុននេះថា ទីក្រុងមូស្គូបានជូនដំណឹងជាផ្លូវការដល់ទីក្រុងវ៉ាស៊ីនតោនអំពីការឃុំខ្លួនលោក Gershkovich កាលពីចុងសប្តាហ៍ ប៉ុន្តែមិនទាន់បានអនុញ្ញាតឱ្យមន្ត្រីកុងស៊ុលអាមេរិកចូលជួបអ្នកកាសែតនោះទេ។

អ្នកបោះពុម្ពផ្សាយ និងនិពន្ធនាយករបស់សារព័ត៌មាន Wall Street Journal បាននិយាយថាការកំណត់"ការឃុំឃាំងដោយខុសឆ្គង នឹងបើកផ្លូវទៅរកដំណោះស្រាយ និងការយកចិត្តទុកដាក់បន្ថែមនៅកម្រិតខ្ពស់បំផុតរបស់រដ្ឋាភិបាលសហរដ្ឋអាមេរិកក្នុងការធានាការដោះលែងគាត់" ។