ប៉េកាំង ៖ ព្យុះខ្សាច់ដ៏ក្រាស់បានបោកបក់ទៅលើរដ្ឋធានីប៉េកាំងរបស់ប្រទេសចិន នៅពីថ្ងៃអង្គារ (១១ មេសា)នេះ ហ៊ុព័ទ្ធទីក្រុងដោយស្រទាប់ធូលីពណ៌ប្រផេះយ៉ាងក្រាស់។

គិតត្រឹមព្រឹកថ្ងៃអង្គារនេះ អាជ្ញាធរក្រុងប៉េកាំងបានចេញការព្រមានពណ៌លឿងអំពីព្យុះខ្សាច់នេះ ដែលជាកម្រិតខ្ពស់បំផុតទីបីនៃប្រព័ន្ធព្រមាន​អាកាសធាតុបួន​ពណ៌របស់ប្រទេសចិន។ សន្ទស្សន៍គុណភាពខ្យល់តាមពេលវេលាជាក់ជាក់របស់ទីក្រុង បានបង្ហាញពីកម្រិតនៃការបំពុលយ៉ាងធ្ងន់ធ្ងរ នេះបើយោងតាម​គេហទំព័ររបស់មជ្ឈមណ្ឌលត្រួតពិនិត្យអេកូឡូស៊ី និងបរិស្ថានក្រុងប៉េកាំង។

លោក Tian បុគ្គលិកផ្នែកព័ត៌មានវិទ្យាក្នុងតំបន់ម្នាក់ បាននិយាយថា រូបលោកពាក់ម៉ាស KF94 និងអាវរងារក្រាស់ៗដើម្បីការពារខ្លួនពីការវាយលុកនៃធូលីដី។

លោកបាននិយាយថា៖ «ពេលខ្ញុំចេញទៅក្រៅព្រឹកនេះ ខ្ញុំបានពាក់អាវរងារក្រាស់ៗនិងមួក ព្រោះខ្ញុំគិតថាខ្លួនខ្ញុំទាំងមូលមានក្លិនធូលីបន្ទាប់ពីព្យុះខ្សាច់បានបោកបក់មក»។

ទីក្រុងប៉េកាំងមានព្យុះខ្សាច់ជាទៀងទាត់នៅក្នុងខែមីនា និងខែមេសា ដោយសារវានៅជិតវាលខ្សាច់ដ៏ធំGobi។ មជ្ឈមណ្ឌលឧតុនិយមកណ្តាល បាននិយាយថា ខេត្តចំនួនដប់ រួមមាន Shaanxi, Shanxi, Hebei, Shandong, Jiangsu, Anhui, Henan, Hubei, Inner Mongolia និង Metropolis Shanghai នឹងរងផលប៉ះពាល់ដោយព្យុះខ្សាច់ និងធូលីធំៗរហូតដល់ម៉ោង៨ នៅព្រឹកថ្ងៃពុធ (១២ មេសា)។