យោងតាមរបាយការណ៍របស់សារព័ត៌មានក្នុងស្រុក និងសាក្សីដែលសារព័ត៌មាន AFP បានទាក់ទង មនុស្សរាប់សិបនាក់ នៅក្នុងតំបន់ភាគកណ្ដាលរបស់សហភាពមីយ៉ាន់ម៉ាបានស្លាប់ ក្នុងការវាយប្រហារតាមអាកាសកាលពីថ្ងៃអង្គារ ខណៈអង្គការសហប្រជាជាតិបាន​ជំរុញរបប​សឹក​ឲ្យបញ្ឈប់យុទ្ធនាការហិង្សារបស់ខ្លួន។

ប្រទេសនៅក្នុងតំបន់អាស៊ីអាគ្នេយ៍មួយនេះ បានធ្លាក់ចូលក្នុងភាព​ចលាចល​ខាងនយោបាយ និងវិបត្តិសេដ្ឋកិច្ច ​ចាប់តាំងពីយោធាបានដណ្ដើម​អំណាច​ក្នុងរដ្ឋប្រហារ​កាលពីថ្ងៃទី១ ខែកុម្ភៈ ឆ្នាំ២០២១មក។

ប្រធានផ្នែកឃ្លាំមើលសិទ្ធិមនុស្សរបស់អង្គការសហប្រជាជាតិ លោក Volker Turk បាននិយាយថា លោកពិតជាតក់​ស្លុតខ្លាំង​ណាស់ចំពោះការវាយប្រហារ​តាម​អាកាសដ៏ព្រៃផ្សៃ ដែលលោក​បាន​និយាយថា ​ជនរងគ្រោះទាំងនោះ ​ក៏មានកុមារសិស្សសាលាដែលកំពុងសម្ដែងក្នុងកម្មវិធីមួយផងដែរ ស្របពេលអង្គការពិភពលោកមួយនេះ ​អំពាវនាវឲ្យនាំអ្នកប្រព្រឹត្តិទាំងនោះមកកាត់ទោស។

ចំនួនអ្នកស្លាប់ពីការវាយប្រហារតាមអាកាស កាលពីព្រឹកថ្ងៃអង្គារនៅទីប្រជុំជនដាច់ស្រយាល Kanbalu ក្នុងតំបន់ Sagaing នៅមិនទាន់ច្បាស់នៅឡើយទេ។

សារព័ត៌មាន BBC មីយ៉ាន់ម៉ា និងសារព័ត៌មាន Irrawaddy បានរាយការណ៍ថា មនុស្សយ៉ាងហោច​ណាស់ ៥៣នាក់រួមទាំងជនស៊ីវិល​ បានស្លាប់ និងរាប់សិបនាក់ផ្សេងទៀតរបួស​នៅក្នុងការ​វាយប្រហារនេះ។ ​ខណៈចំនួនអ្នកស្លាប់ពិតប្រាកដនៅពុំទាន់​បាន​បញ្ជាក់នៅឡើយ អង្គការ​សហប្រជាជាតិ បាននិយាយថា​ ជនស៊ីវិលមួយចំនួនបានស្លាប់៕