កងកម្លាំងរុស្ស៊ីបានបាញ់ផ្លោងមកលើទីក្រុងខ្សែត្រៀមជួរមុខនៅភាគខាងកើតប្រទេសអ៊ុយក្រែន ដោយការវាយប្រហារតាមអាកាស និងការវាយប្រហារដោយកាំភ្លើងធំ ខណៈមន្ត្រីសហរដ្ឋអាមេរិក​បានបង្កើនកិច្ចខិតខំប្រឹងប្រែងស្វែងរកប្រភពនៃការបែកធ្លាយឯកសារសម្ងាត់បំផុតរបស់សហរដ្ឋអាមេរិក រួមមានទាំងឯកសារស្តីពីផែនការវាយបករបស់អ៊ុយក្រែនផងដែរ។

អ៊ុយក្រែន និយាយកាលពីថ្ងៃអង្គារថា រុស្ស៊ីបានបន្តការវាយលុករបស់ពួកគេនៅក្នុងតំបន់ Donetsk ភាគខាងកើត ជាកន្លែងដែលទីក្រុងនានា រងការទម្លាក់គ្រាប់បែកយ៉ាងខ្លាំង។ កងកម្លាំងអ៊ុយក្រែន​បានវាយរុញច្រានការវាយប្រហារជាច្រើនលើក ខណៈយោធារុស្ស៊ីបានបន្តកិច្ចខិតខំរបស់ខ្លួន​ដើម្បីគ្រប់គ្រង​ទីក្រុង Bakhmut ។ មេបញ្ជាការជាន់ខ្ពស់អ៊ុយក្រែន​បានចោទទីក្រុងមូស្គូថា បានប្រើយុទ្ធវិធី«បំផ្លាញឲ្យទៅជាផេះផង់»។

មេបញ្ជាការកងកម្លាំងជើងគោកអ៊ុយក្រែន បាននិយាយអំពីទីក្រុង Bakhmut ថាសត្រូវបានផ្លាស់ប្ដូរ​ទៅជាអ្វីដែលគេហៅថាយុទ្ធវិធីបំផ្លាញឲ្យទៅជាផេះផង់ដូចនៅប្រទេសស៊ីរី។ ការប្រយុទ្ធដណ្តើមយកទីក្រុងតូច ហើយបច្ចុប្បន្នត្រូវបានបំផ្លាញស្ទើរ​ខ្ទេចខ្ទាំ​ទាំង​ស្រុង​នៅ​ជាយដែនដី​ដែលគ្រប់គ្រង​ដោយរុស្ស៊ី នៅក្នុងទីក្រុង Donetsk ជាឆាក​ប្រយុទ្ធដ៏បង្ហូរឈាមបំផុត​នៃ​សង្រ្គាមរយៈពេល១៣ ខែមកនេះខណៈទីក្រុងមូស្គូព្យាយាមបង្កើនសន្ទុះក្នុង​យុទ្ធនាការ​របស់ខ្លួនបន្ទាប់ពីការបរាជ័យកាលពីពេលថ្មីៗនេះ។

ភាគីទាំងពីរមានអ្នកស្លាប់ និងរងរបួសធ្ងន់ធ្ងរនៅក្នុងការប្រយុទ្ធគ្នានៅទីក្រុង Bakhmut ប៉ុន្តែមេបញ្ជា​ការកង​កម្លាំងជើងគោកអ៊ុយក្រែន បាននិយាយថា​ស្ថានភាពពិបាកខ្លាំងប៉ុន្តែអាចគ្រប់គ្រងបាន។ ទូរទស្សន៍ CNN របស់សហរដ្ឋអាមេរិក​បាននិយាយថា អ៊ុយក្រែនត្រូវបានបង្ខំឱ្យកែសម្រួល​ផែនការ​យោធាមួយចំនួនមុនពេលការវាយបកដែលរំពឹងទុកជាយូរមកហើយដោយសារតែមានការបែកធ្លាយឯកសារសម្ងាត់ជាច្រើន។

មន្ត្រីសហរដ្ឋអាមេរិកកំពុងព្យាយាមតាមដានប្រភពនៃការបែកធ្លាយនេះ ដោយពិនិត្យឡើងវិញ​ពីរបៀប​ដែល​ពួក​គេចែករំលែកឯកសារសម្ងាត់ផ្ទៃក្នុង ​និងដោះស្រាយការបែកបាក់ផ្នែកការទូត។

ឯកសារទាំងនោះរៀបរាប់លម្អិតអំពីប្រធានបទដូចជា​ ព័ត៌មានស្តីពីជម្លោះនៅអ៊ុយក្រែន ដែល​ទីក្រុងវ៉ាស៊ីនតោនបានផ្គត់ផ្គង់សព្វាវុធយ៉ាងច្រើនសន្ធឹកសន្ធាប់ដល់ទីក្រុង Kyiv និងបានដឹកនាំការថ្កោលទោសអន្តរជាតិចំពោះការឈ្លានពានរបស់ទីក្រុងមូស្គូ។