ភ្នំពេញ៖ នៅថ្ងៃទី១២ ខែមេសានេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានទទួលជួប​ពិភាក្សា​ជាមួយ ឯកឧត្តម UENO ATSUSHI ​ឯកអគ្គរាជទូតវិសាមញ្ញ និងពេញសមត្ថភាពជប៉ុន ប្រចាំនៅកម្ពុជា។

ក្នុងជំនួបនេះ ឯកឧត្តម UENO ATSUSHI ថ្លែងថា កម្ពុជាជាប្រទេសមួយក្នុងចំណោមប្រទេស​ចំនួន២០ ដែលរដ្ឋាភិបាលជប៉ុន​ អនុញ្ញាតឲ្យធ្វើទិដ្ឋាការ ឬការធ្វើ e-VISA ​តាមប្រព័ន្ធអនឡាញ ទៅទស្សនាប្រទេសជប៉ុន។

ថ្លែងក្រោយជំនួបឯកឧត្តមរដ្ឋមន្ត្រី ថោង ខុន មានប្រសាសន៍ថា រដ្ឋាភិបាលជប៉ុន បានប្រកាស​បើក​ផ្លូវការ​ឲ្យគ្រប់​ភ្ញៀវទេសចរកម្ពុជានានា ​អាចធ្វើទិដ្ឋាការ VISA នៅប្រព័ន្ធអនឡាញ ​ទៅទស្សនាជប៉ុន តាំងពីថ្ងៃទី២៧ ខែកុម្ភៈឆ្នាំ២០២៣នេះ ​តាមរយៈការបើកធ្វើe-VISAនេះ​ នឹងជំរុញកំណើន​ទេសចរ​កម្ពុជា ​ទៅប្រទេសជប៉ុន និងផ្សព្វផ្សាយទេសចរជប៉ុនមកទស្សនាកម្ពុជាវិញ​មាន​កំណើនល្អ​ប្រសើរ​ឡើងវិញ ​ជាពិសេសនោះ ​គឺការជំរុញក្រុមហ៊ុនអាកាសចរ ANA ​របស់ប្រទេសជប៉ុន បើកជើងហោះ​ត្រង់កម្ពុជា ជប៉ុនឡើងវិញផងដែរ។

នៅក្នុងជំនួបនេះដែរ ឯកឧត្តម UENO ATSUSHI ក៏បានថ្លែងព្រមព្រៀងថា នឹងបន្តបង្កើនកិច្ច​សហប្រតិបត្តិការអភិវឌ្ឍ​វិស័យទេសចរណ៍ ​ជាពិសេសជំរុញការអភិវឌ្ឍ​វិស័យធនធាន​មនុស្សក្នុង​វិស័យ​ទេសចរណ៍ ​ការបន្តជំរុញការអភិវឌ្ឍទីក្រុងឆ្លាវៃ SMART CITY ​នៅខេត្តសៀមរាប និងជំរុញ​ផ្សព្វផ្សាយ​ទេសចរណ៍កម្ពុជាទៅកាន់ប្រទេសជប៉ុន​ ទាក់ទាញ ​អ្នកវិនិយោគទុនជប៉ុន និង​ទេសចរជប៉ុន​មកកម្ពុជា​មាន​កំណើនល្អប្រសើរឡើងវិញ។

សូមបញ្ជាក់ថា អំឡុងមុន ​បរិបទកូវីដ១៩ ទេសចរជប៉ុនមកទស្សនាកម្ពុជា ​មានរង្វង់២០ម៉ឺននាក់ ហើយ​កម្ពុជា ​ទៅទស្សនាជប៉ុនមានប្រមាណ២ម៉ឺននាក់ ដែលការផ្លាស់ប្តូរទំនាក់ទំនង​ប្រជាជន កម្ពុជា ​ជប៉ុន បានធ្វើឲ្យកម្ពុជាទទួលបានអភិវឌ្ឍន៍​ជាច្រើនជាពិសេសក្នុងវិស័យទេសចរណ៍ សេដ្ឋកិច្ច ​និង​ហេដ្ឋារចនាសម្ព័ន្ធ​គាំទ្រ​វិស័យ​ទេសចរណ៍ជាដើម៕ អត្ថបទ ស៊ុម សុខជា