ហូឡង់ ៖☻ កំហឹងប្រឆាំងនឹងច្បាប់កំណែទម្រង់សោធននិវត្តន៍មិនសូវមានការគាំទ្ររបស់លោកនៅក្នុងប្រទេសបារាំងបានកើតឡើង បន្ទាប់ពីលោកប្រធានាធិបតីបារាំង Emmanuel Macron ទៅកាន់ប្រទេសហូឡង់ ជាទីដែលក្រុមអ្នកតវ៉ា បានស្រែករំខាន​សុន្ទរកថាមួយកាលពីថ្ងៃអង្គារទី១១មេសា នៅថ្ងៃចាប់ផ្ដើមដំណើរទស្សនកិច្ចផ្លូវរដ្ឋរយៈពេល២ថ្ងៃ ។

លោក Macron ដែលគ្រោងនឹងថ្លែងសុន្ទរកថា នៅលើទឹកដីអឺរ៉ុប បានប្រឈមការតវ៉ាយ៉ាងគគ្រើកជាច្រើនសប្ដាហ៍ នៅក្នុងប្រទេសរបស់ខ្លួន ប្រឆាំងនឹងច្បាប់សោធននិវត្តន៍ ដែលនឹងបង្កើនអាយុចូលនិវត្តន៍របស់បុគ្គលិករដ្ឋបារាំង។

លោកMacron បានបន្តសុន្ទរកថារបស់លោកបន្ទាប់ពីក្រុមអ្នកតវ៉ាត្រូវបានអូសចេញពីសាលប្រជុំនោះ។ 

អំឡុងសុន្ទរកថារបស់លោក លោកបានការពារច្បាប់សោធនិវត្តន៍របស់លោក ដែលនឹងបន្ថែមអាយុចូលនិវត្តិន៍ ពីរឆ្នាំទៀត ពោលគឺ ពី៦២ ឡើងដល់៦៤ឆ្នាំ ។ 

កាលពីព្រឹកថ្ងៃអង្គារ  មុនពេលប្រារព្ធពិធីដាក់កម្រងផ្កានៅខាងក្រៅព្រះបរមរាជវាំង លោក Macron ត្រូវបានប្រឈមដោយក្រុមអ្នកតវ៉ា ដែលបានកាន់ផ្ទាំងបដាប្រឆាំងកំណែទម្រង់សោធននិវត្តិ៍។  

ក្រុមសហជីពបារាំង គ្រោងចេញតវ៉ាទូទាំងប្រទេសជាថ្មីនៅថ្ងៃព្រហស្បតិ៍ស្អែកនេះ ប្រឆាំងច្បាប់នេះ។ការស្ទង់មតិបង្ហាញ ថា ភាគច្រើននៃអ្នកបោះឆ្នោតប្រឆាំងនឹងកំណែទម្រង់នេះ និងគាំទ្រការតវ៉ា៕ ដោយ ៖ សុខ មាន