មីយ៉ាន់ម៉ា ៖ សាច់ញាតិជនរងគ្រោះនៅតែបន្តស្វែងរកសាកសពនិងអវយវៈ ដែលឆេះរោលរាលក្នុងការវាយ​ប្រហារតាមអាកាស​របស់យោធាលើភូមិមួយនៅភាគកណ្តាលសហភាពមីយ៉ាន់ម៉ា នៅថ្ងៃពុធ មួយថ្ងៃបន្ទាប់​ពីការវាយប្រហារដ៏សាហាវបំផុតនៅក្នុងប្រទេសនេះ ចាប់តាំងពីរបបយោធា​បានកាន់កាប់អំណាច​ក្នុងរដ្ឋប្រហារកាលពីពីរឆ្នាំមុន។

សាក្សីឃើញផ្ទាល់ភ្នែកម្នាក់ដែលបានលាក់ខ្លួននៅក្នុងផ្លូវរូងក្រោមដីក្នុងអំឡុងពេលនៃការវាយប្រហារ បានរៀបរាប់ពីទិដ្ឋភាពដ៏រន្ធត់នោះ នៅពេលដែលគាត់បានទៅជិតទីតាំង​នៃការវាយប្រហារតាម​អាកាសរបស់​យោធា “មានក្មេងៗស្លាប់ ស្ត្រីស្រែកយំ ហើយមានសាកសពជាច្រើននៅលើដី”។

យោងតាម​សាក្សី​ជាច្រើននាក់ និងរដ្ឋាភិបាលស្រមោលនៃរដ្ឋបាលដែលត្រូវបានបណ្តេញចេញ ព្រមទាំង​ប្រព័ន្ធផ្សព្វផ្សាយ​​ក្នុងស្រុកបាននិយាយថា មនុស្សប្រហែល 100 នាក់ រួមមានស្ត្រី និងកុមារ ត្រូវបានសម្លាប់ បន្ទាប់ពីរបបយោធាមីយ៉ាន់ម៉ាបានទម្លាក់គ្រាប់បែកនៅទីប្រជុំជន Kantbalu ក្នុងតំបន់ Sagaing កាលពីថ្ងៃអង្គារ ខណៈពេលកំពុងប្រារព្ធពិធីបើកការិយាល័យរដ្ឋបាលក្នុងតំបន់មួយ ។

សាក្សីជាច្រើននាក់ បានប្រាប់CNN និងប្រព័ន្ធផ្សព្វផ្សាយក្នុងស្រុកមួយថា នៅមុនម៉ោង ៨ ព្រឹក យន្តហោះរបស់របប​យោធាបានទម្លាក់គ្រាប់បែកលើភូមិដែលរៀបចំពិធីនោះ។ បន្ទាប់មកឧទ្ធម្ភាគចក្រ Mi35 បានហោះជុំវិញ និងបើកការបាញ់ប្រហារទៅលើភូមិមួយនាទីក្រោយមក។

អ្នកនាំពាក្យរបបយោធាមីយ៉ាន់ម៉ា លោកឧត្តមសេនីយ៍ទោល Zaw Min Tun បានបញ្ជាក់អំពីការវាយប្រហារ​តាមអាកាសលើភូមិ Pazigyi ហើយបាននិយាយថា ប្រសិនបើការស្លាប់ជនស៊ីវិលកើតឡើងនោះ គឺដោយសារតែពួក​គេត្រូវបានបង្ខំចិត្តទៅជួយ “ក្រុមភេរវករ”។