ឧត្តរមានជ័យ៖ ខណៈថ្ងៃបុណ្យចូលឆ្នាំជិតចូលមកដល់​ គេសង្កេតឃើញថា ​ប្រជាពលរដ្ឋខ្មែរ ដែលកំពុងធ្វើការនៅក្នុង ប្រទេសថៃ ​បាននាំគ្នាវិលត្រឡប់មកស្រុកកំណើតវិញជាបន្តបន្ទាប់ ដើម្បីចូលឆ្នាំថ្មី ប្រពៃណីខ្មែរ។

នៅឯច្រកទ្វារព្រំដែនអន្តរជាតិអូរស្មាច់ និងច្រកជាំសាងាំ ក្នុងភូមិសាស្រ្តខេត្តឧត្តរមានជ័យ មាន​ពលករខ្មែរវិលត្រឡប់មកពីប្រទេសថៃវិញ ​ជារៀងរាល់ថ្ងៃ ​រយៈពេលជិតពីរសប្ដាហ៍មកហើយ ដែលមានចំនួនរាប់ពាន់នាក់ ​ដើម្បីមកចូលរួមអបអរពិធីបុណ្សចូលឆ្នាំថ្មីប្រពៃណីខ្មែរ ដែលនឹងត្រូវប្រារព្ធឡើងនៅចុងសប្ដាហ៍នេះ ។

លោក ឯម បញ្ជារិទ្ធ ប្រធានស្នាក់ការច្រកទ្វារព្រំដែនអន្តរជាតិអូរស្មាច់ ​បានឲ្យដឹងថា ខណៈថ្ងៃ​បុណ្យចូលឆ្នាំ​កាន់តែខិតជិតមកដល់ ​ពលករខ្មែរធ្វើការនៅថៃ ​កាន់តែវិលត្រឡប់មកវិញដែរ គឺក្នុងមួយថ្ងៃ ​មានចំនួនមិនក្រោម ៥០០នាក់នោះទេ ។

ប្រជាពលតដ្ឋ ដែលបានវិលត្រឡប់មកពីប្រទេសថៃ ​បានសម្ដែងនូវក្ដីសប្បាយរីករាយ ​ដែលឆ្នាំនេះ ពិធីបុណ្យចូលឆ្នាំត្រូវបានប្រារព្ធឡើងវិញ ​ក្រោមដំបូលសន្តិភាព និងការទប់ស្កាត់បាននូវជំងឺកូវីដ-១៩ ។

ប្រធានច្រកព្រំដែនអូរស្មាច់​ លោក ឯម បញ្ជារិទ្ធ ​បានបញ្ជាក់ថា ​អាជ្ញាធរ​មាន​សមត្ថកិច្ចពាក់ព័ន្ធទាំង អស់ ​ដែលឈរជើងប្រចាំការនៅច្រកទ្វារព្រំដែនអូរស្មាច់ ​បានជួយសម្រួលរាល់បញ្ហាប្រឈមផ្សេងៗ ធ្វើ​យ៉ាងណាឱ្យប្រជាពលរដ្ឋទាំងអស់ ​បានធ្វើដំណើរទៅលេងស្រុកបានឆាប់រហ័ស ៕អត្ថបទ៖ ឃិន សារិទ្ធ