ឥណ្ឌា ៖ កងទ័ព និយាយថា ឧបទ្ទវហេតុផ្ទុះអាវុធ បានសម្លាប់មនុស្ស ៤នាក់នៅមូលដ្ឋានទ័ពស្ថិតក្នុងរដ្ឋព្រំដែន Punjab ប្រទេសឥណ្ឌានៅព្រឹកថ្ងៃពុធនេះ ហើយប្រតិបត្តិការរុករក កំពុងធ្វើឡើង ។ 

សារព័ត៌មានរាយការណ៍ថា អ្នកបាញ់ប្រហារមិនដឹងចំនួនពិតប្រាកដ នៅមិនទាន់ចាប់ខ្លួនបាននោះទេ នៅក្នុង​មូលដ្ឋានទ័ព Bathinda ហើយពួកគេមានគ្រាប់រំសេវនៅជាប់ខ្លួន ។ 

កងទ័ពនិយាយនៅក្នុងសេចក្តីថ្លែងការណ៍ថា ក្រុមប្រតិកម្មរហ័សរបស់មូលដ្ឋានទ័ព បានចេញធ្វើសកម្មភាពរបស់ខ្លួន ហើយតំបន់មួយនេះ ត្រូវបានឡោមព័ទ្ធ និងបិទជិត ។ ប្រតិបត្តិការរុករក កំពុងបន្ត ហើយសេចក្តីលម្អិតបន្ថែមទៀត នឹងប្រកាសឲ្យដឹងតាមក្រោយ ។ ឧបទ្ទវហេតុផ្ទុះអាវុធនេះដែរ បានកើតឡើងនៅវេលាម៉ោង ៤ និង ៣៥នាទីព្រឹក ម៉ោងក្នុងស្រុក ។

សារព័ត៌មានក្នុងស្រុក រាយការណ៍ថា គ្មានមូលហេតុភេរវកម្មនោះទេនៅពីក្រោយការប្រហារនេះទេ ហើយច្រកចូលបន្ទាយកងទ័ពទាំងអស់ ត្រូវបានបិទជិត ។ 

មូលដ្ឋានទ័ពដែលត្រូវចំណាយពេលធ្វើដំណើរ ៦ម៉ោង ពីភាគខាងជើងទីក្រុងញូវដែល្លីនេះ ជាកន្លែងស្នាក់​នៅរបស់ក្រុមគ្រួសារទាហាន និងជាមូលដ្ឋានកងទ័ពរស់នៅ ៕