អាមេរិក ៖ រដ្ឋមន្រ្តីការពារជាតិសហរដ្ឋអាមេរិកលោក Lloyd Austinនិយាយថា ក្រុមមន្រ្តីការទូត និងការពារជាតិជាន់ខ្ពស់​មកពី​សហរដ្ឋអាមេរិក និងហ្វីលីពីន បានព្រមព្រៀងគ្នាបញ្ចប់ផែនទីវិថីជំនួយសន្តិសុខសហរដ្ឋអាមេរិកដល់ហ្វីលីពីន សម្រាប់រយៈពេល ៥ឆ្នាំ ទៅ ១០ឆ្នាំក្រោយ ។

លោក Austin និយាយថា សម្ព័ន្ធមិត្តយូរអង្វែងទាំង ២ បានពិភាក្សាលើការចែកចាយកម្មវិធីការពារជាតិអាទិភាព ដែលរួមទាំង​ប្រព័ន្ធរ៉ាដា យានដ្រូន យន្តហោះដឹកជញ្ជូនយោធា និងប្រព័ន្ធការពារតំបន់ឆ្នេរ និងដែនអាកាស នៅជំនួប 2+2(ពីរបូកពីរ) ក្នុងទីក្រុងវ៉ាស៊ីងតោន ដែលមានការចូលរួមផងដែរពីរដ្ឋមន្រ្តីការបរទេសសហរដ្ឋអាមេរិកលោក Antony Blinken និងសមភាគីហ្វីលីពីន។  

 រដ្ឋមន្រ្តីការបរទេសហ្វីលីពីន លោក Enrique Manalo និយាយប្រាប់សន្និសីទសារព័ត៌មានរួមគ្នាថា ភាគីទាំង ២ បានបង្កើនទ្វេដង​ការប្តេជ្ញាចិត្តរបស់ខ្លួនលើការធ្វើទំនើបកម្មសម្ព័ន្ធភាពហ្វីលីពីន-អាមេរិក ជាការទទួលស្គាល់ថា ភាពជាដៃគូរបស់ខ្លួនត្រូវការរួមចំណែក​ខ្លាំងជាងមុន ក្នុងការរក្សាការពារសណ្តាប់ធ្នាប់​អន្តរជាតិដោយផ្អែក​ច្បាប់អន្តរជាតិ ។ 

ក្រុមអ្នកជំនាញដែលរួមទាំងអតីតក្រុមមន្រ្តីការពារជាតិសហរដ្ឋអាមេរិក និយាយថា សហរដ្ឋអាមេរិកមើលឃើញហ្វីលីពី​ថាជាទីតាំងដ៏មានសក្តានុពលសម្រាប់ប្រព័ន្ធរ៉ុក្កែត មីស៊ីល និងកាំភ្លើងធំ ដើម្បីប្រឈមនឹងការឈ្លានពានក្រោមទឹកទាំង​លើគោករបស់ចិនលើកោះតៃវ៉ាន់ ដែលទីក្រុងប៉េកាំង អះអាងថាជារបស់ខ្លួន ។ 

លោក Austin និយាយថា វាដូចជាលឿនពេកក្នុងការពិភាក្សាលើគ្រឿងយុទ្ធោបករណ៍អ្វីខ្លះដែលសហរដ្ឋអាមេរិក​ចង់ដាក់នៅមូលដ្ឋានយោធាក្នុងប្រទេសហ្វីលីពីន ក្រោមកិច្ចព្រមព្រៀងបង្កើន​កិច្ចសហប្រតិបត្តិការ​ការពារជាតិ(EDCA)៕