ឃីកបុកស៊ីង៖ សហព័ន្ធកីឡាកីឡាប្រដាល់ឃីកបុកស៊ីងកម្ពុជា បានបង្ហាញក្រុមគ្រូបង្វឹក និងកីឡាករ-កីឡាការិនីចំនួន ១៣នាក់ ដែលមជ្ឈមណ្ឌលជាតិហ្វឹកហ្វឺនកីឡាបានចាប់ផ្ដើមហ្វឹកហាត់តាមរយៈអនឡាញ ដើម្បីត្រៀមខ្លួនចូលរួមព្រឹត្តិការណ៍ការប្រកួតកីឡា SEA GAMES 2021 នៅទីក្រុងហាណូយ ប្រទេសវៀតណាមនាខែវិច្ឆិកា ឆ្នាំ២០២១ ខាងមុខនេះ។
ឯកឧត្តម ហេង សុឃន ប្រធានសហព័ន្ធកីឡាប្រដាល់ឃីកបុកស៊ីងកម្ពុជា បានប្រសាសន៍ថានេះជាឆ្នាំដំបូងសម្រាប់សហព័ន្ធត្រូវបានក្រសួងអប់រំ យុជន និងកីឡាអនុញ្ញាតឲ្យចូលរួមជម្រើសជាតិឆ្នាំ២០២១ ក្នុងនោះគ្រូបង្វឹកមានចំនួន ៣រូប និងកីឡាករ-កីឡាការិនីចំនួន ១០រូបក្នុងនោះកីឡាការិនី ៣នាក់។ ចំពោះក្រុមអត្តពលិកទាំង ១០នាក់នេះមិនទាន់ដឹងថា អ្នកណាម្នាក់ត្រូវចេញទៅប្រកួតកីឡា SEA GAMES 2021 នៅទីក្រុងហាណូយ ប្រទេសវៀតណាមនាខែវិច្ឆិកា ឆ្នាំ២០២១ ខាងមុខនេះទេ ដោយនឹងធ្វើការប្រកួតជម្រុះតាមប្រភេទទម្ងន់ ដើម្បីចម្រាញ់រកកីឡាករ-កីឡាការិនីឆ្នើមចូលរួមដណ្ដើមមេដាយជូនជាតិ។ ឯកឧត្ដមបន្តទៀតថា កីឡាប្រដាល់ឃីកបុកស៊ីង ជាប្រភេទកីឡាស្ថិតក្នុងប្រភេទកីឡាមានសក្ដានុពល ក្នុងចំណោមកីឡាទាំង ១៤ប្រភេទរបស់ប្រទេសកម្ពុជា ចំណែកសហព័ន្ធបានត្រៀមកម្លាំងរួចជាស្រេច សម្រាប់ព្រឹត្តិការណ៍ការប្រកួតកីឡា SEA GAMES ដែរ។
ប្រភេទកីឡាប្រដាល់ឃីកបុកស៊ីងនេះ គឺជាប្រភេទកីឡាមានប្រជាប្រិយភាពខ្លាំងគួរសម ដោយសារតែការប្រកួតកីឡា SEA GAMES 2017 និង២០១៩ កន្លងមកធ្លាប់ទទួលមេដាយជាច្រើនគ្រឿងជូនប្រទេសជាតិ។ ចំពោះការប្រកួតកីឡា SEA GAMES 2021 នៅប្រទេសវៀតណាម និង SEA GAMES 2023 ដែលកម្ពុជាធ្វើម្ចាស់ផ្ទះ ក៏សង្ឃឹមទទួលបានមេដាយជាច្រើនដូចគ្នា។ ចំពោះបង្វឹកទាំង ៣រូបរួមមានលោកគ្រូបង្គោល ជា រិទ្ធ, លោកគ្រូជំនួយ រុំ ឆាវជ័យ និងលោកគ្រូ សៅ ប៊ុនធឿន រីឯកីឡាការិនី ៣នាក់ដូចជា កីឡាការិនី នូវ ស្រីពៅ ប្រភេទទម្ងន់ ៥១គីឡូក្រាម, កីឡាការិនី ស៊ីថា ស្រីលីន ប្រភេទទម្ងន់ ៥៤គីឡូក្រាម និងកីឡាការិនី វី ស្រីខួច ប្រភេទទម្ងន់ ៦៤គីឡូក្រាម។ ចំណែកកីឡាករ ៧នាក់រួមមាន កីឡាករ វន គឹមចេង ប្រភេទទម្ងន់ ៥១គីឡូក្រាម, កីឡាករ សុខ រិទ្ធ ប្រភេទទម្ងន់ ៥៤គីឡូក្រាម, កីឡាករ ខេម ចាន់ ប្រភេទទម្ងន់ ៥៤គីឡូក្រាម, កីឡាករ ហ៊ឹម សេរី ប្រភេទទម្ងន់ ៥១គីឡូក្រាម, កីឡាករ ទួច រ៉ាឆាន់ ប្រភេទទម្ងន់ ៥៧គីឡូក្រាម, កីឡាករ ឈុត វ៉ាន់ថង ប្រភេទទម្ងន់ ៦០គីឡូក្រាម និងកីឡាករ សាន រ៉ាគឹម ប្រភេទទម្ងន់ ៦០គីឡូក្រាម៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
