សកម្មជនរាប់រយនាក់ បានប្រមូលផ្ដុំគ្នាកាលពីថ្ងៃអង្គារ នៅខាងមុខទីបញ្ជាការកងទ័ពហ្វីលីពីន ក្នុងក្រុងកេហ្សូន(Quezon City) ដែលស្ថិតនៅជាយរដ្ឋធានីម៉ានីលដើម្បីតវ៉ានឹងសមយុទ្ធយោធារួម​ជា​បន្ដបន្ទាប់រវាងហ្វីលីពីន ​និងសហរដ្ឋអាមេរិក ​ដែលបានចាប់ផ្ដើមធ្វើនៅថ្ងៃតែមួយ។

ទាហានហ្វីលីពីនជាង៥,000នាក់ និងទាហានអាមេរិក១២,000នាក់ នឹងចូលរួមធ្វើសមយុទ្ធជា​មួយ​គ្នា​រយៈពេល១៨ថ្ងៃ ​មានឈ្មោះថា បាលីកាតាន់២០២៣ ជាសមយុទ្ធរួមដ៏ធំបំផុតរវាងហ្វីលីពីន​និងអាមេរិក ​ដែលធ្លាប់ត្រូវបានធ្វើឡើ​ងជាច្រើន​ទសវត្សរ៍​មកហើយ។

សមាជិកប្រហែលជា១០០នាក់មកពីកងកម្លាំងប្រដាប់អាវុធរបស់អូស្រ្ដាលី នឹងចូលរួមនៅក្នុង​សមយុទ្ធនេះ ខណៈ១២ប្រទេសទៀត រួមមានជប៉ុន ​និងប្រទេសអង់គ្លេស ក៏បានចូលរួមផងដែរ​ក្នុងនាមជាអ្នកសង្កេតការណ៍។

ក្រុមអ្នកតវ៉ា បានប្រឆាំងនឹងសមយុទ្ធនេះ និងបានទទូចឲ្យជនជាតិហ្វីលីពីន ចូលរួមប្រឆាំងនឹង​សកម្មភាពរបស់អាមេរិក នៅក្នុងតំបន់អាស៊ី។ ​ដោយឡែក អ្នកតវ៉ាភាគច្រើន ​បានកាន់បដា ដែល​សសេរទាមទារ​ឲ្យអាមេរិកដកទ័ពចេញពីឥឡូវនេះទៅ។

បាតុកម្មក៏បានប្រឆាំងនឹងការបើកមូលដ្ឋានយោធាថ្មីចំនួន៤កន្លែង​ ដែលនឹងត្រូវប្រើប្រាស់​ដោយកង​ទ័ពអាមេរិក​ ដោយស្ថិតនៅក្នុងក្របខណ្ឌកិច្ចព្រមព្រៀងពង្រឹងកិច្ច​សហប្រតិបត្ដការ ​និងវិស័យ​ការពារជាតិ៕