ប្រទេសជប៉ុនបានប្រកាសកាលពីថ្ងៃអង្គារពីផែនការផលិត និងអភិវឌ្ឍន៍មីស៊ីលរយៈចម្ងាយឆ្ងាយដ៏ទំនើប ខណៈពង្រឹងវិស័យការពារជាតិរបស់ខ្លួន ស្របពេលភាពតានតឹងជាមួយចិន ដែលជាប្រទេសជិតខាងរបស់ខ្លួនចេះតែកើនឡើង។

ក្រសួងការពារជាតិជប៉ុន និយាយថា ខ្លួនបានចុះហត្ថលេខាលើកិច្ចសន្យាជាមួយក្រុមហ៊ុន Mitsubishi Heavy Industries ដើម្បីអភិវឌ្ឍន៍ និងផលិតអាវុធធុនធ្ងន់ក្រោមការពង្រីកផែន ការរហូតដល់ឆ្នាំ២០២៧។

កិច្ចព្រមព្រៀងនានាដែលមានទំហំទឹកប្រាក់ ២.៨ពាន់លានដុល្លារអាមេរិក ក្រោយសេចក្ដី​ប្រកាស​របស់លោកនាយករដ្ឋមន្ត្រី Fumio Kishida កាលពីខែធ្នូ ថាលោកគ្រោងបង្កើនកញ្ចប់ចំណាយ​ផ្នែកការពារជាតិ​និងធ្វើឲ្យជប៉ុនមានលទ្ធភាពវាយបកសត្រូវដោយខ្លួនឯង សមត្ថភាពវាយប្រហារដោយផ្ទាល់លើដែនដីរបស់ប្រទេសមួយផ្សេងទៀត ក្នុងករណីបន្ទាន់ និងក្រោមកាលៈទេសៈជាក់លាក់។

ក្រសួងនិយាយថា ក្រោមកិច្ចព្រមព្រៀងនានា ក្រុមហ៊ុន Mitsubishi Heavy Industries នឹងចាប់ផ្ដើម​ការផលិតទ្រង់ទ្រាយធំនៅឆ្នាំនេះ លើមីស៊ីលចំនួន២ប្រភេទដែលបានផលិតរួច មីស៊ីលតម្រង់​គោលដៅបាញ់ពីលើដី Type 12 ដែលបានចេញគំរូដើម្បីដាក់គោលដៅលើនាវានៅសមុទ្រ​និង​មីស៊ីលល្បឿនលឿនជាងសំឡេង មានសមត្ថភាពបំពាក់ក្បាលគ្រាប់នុយក្លេអ៊ែរ ដែលបានចេញគំរូ​សម្រាប់ការពារដែនកោះ ។

ក្រសួងនេះក៏បាននិយាយផងដែរថា ការដាក់ពង្រាយអាវុធទាំងនោះ គ្រោងនឹងធ្វើឡើង​នៅឆ្នាំ២០២៦ និង២០២៧។ សេចក្ដីជូនដំណឹងរបស់ក្រសួងការពារជាតិ ពុំបាននិយាយថា​តើខ្លួនត្រូវការប្រភេទមីស៊ីលនីមួយៗ ប៉ុន្មានគ្រាប់នោះទេ៕