ភ្នំពេញ៖ ដោយគាំទ្រចំពោះការអំពាវនាវ ដ៏ដូចការស្នើសុំពីរាជរដ្ឋាភិបាលជារឿយៗ នៅក្នុងឱកាសបុណ្យជាតិធំៗ ពិសេសនៅអំឡុងថ្ងៃបុណ្យចូលឆ្នាំថ្មីនេះ ក្រុមហ៊ុនដឹកអ្នកដំណើរចំនួន២ បានប្រកាសថា ខ្លួននឹងមិនដំឡើងថ្លៃសេវាដឹកជញ្ជូនអ្នកដំណើរទេ ប៉ុន្តែទន្ទឹមនេះ មានអ្នករត់តាក់ស៊ីសាធរណៈមួយចំនួន ថាខ្លួនដំឡើងថ្លៃតិចតួច ក្នុងករណីម្ចាស់បេនដំឡើងដែរ។

ជាក់ស្តែងម្ចាស់រថយន្តឈ្នួលសាធរណៈ (តាក់ស៊ី) នៅម្តុំវត្តស្រះចករាជធានីភ្នំពេញ ដែលដឹកអ្នក​ដំណើរ​ទៅបណ្តាខេត្តនៅភាគឦសាន កាលពីថ្ងៃទី១២ ខែមេសា ឆ្នាំ២០២៣ បានលើកឡើងថា ការដឹកជញ្ជូនប្រជាពលរដ្ឋពីភ្នំពេញទៅស្រុកកំណើតឆ្នាំនេះ ពុំសូវមានច្រើនដូចបណ្តាឆ្នាំទេ រីឯតម្លៃប្រេងសាំងក៏មានតម្លៃខ្ពស់ជាងបណ្តាឆ្នាំដែរ ​ដូច្នេះ ការដឹកជញ្ជូនអ្នកដំណើរក្នុង​ឱកាសបុណ្យចូលឆ្នាំថ្មីនេះ ​ពួកគាត់នឹងដំឡើងថ្លៃតិចតួច (៥០០០រៀល) ក្នុងករណីម្ចាស់បេនដំឡើងដែរ។

ដោយឡែក ក្រុមហ៊ុនរថយន្តក្រុងដឹកអ្នកដំណើរចំនួន២ បានប្រកាសថាខ្លួននឹងមិនដំឡើងថ្លៃសេវា​ដឹកអ្នកដំណើរទេក្នុងឱកាសបុណ្យចូលឆ្នាំថ្មីនេះ ខណៈដែលរាជរដ្ឋាភិបាលក៏ផ្តល់រថយន្តជាច្រើន ជូនប្រជាពលរដ្ឋជិះដោយមិនគិតថ្លៃដែរ។ ក្រុមហ៊ុនចំនួន២ ដែលប្រកាសថាខ្លួនមិនដំឡើងថ្លៃនោះ រួមមាន៖ ក្រុមហ៊ុន NZC ដឹកអ្នកដំណើរ និងក្រុមហ៊ុនវីរៈប៊ុនថាំ។ នេះបើតាមការបញ្ជាក់របស់អ្នកតំណាងក្រុមហ៊ុន ដែលបានផ្តល់សម្ភាសន៍​ជាមួយទូរទស្សន៍​បានយ័ន នាថ្ងៃទី១២ ខែមេសា ឆ្នាំ២០២៣។

ចំណែកប្រជាពលរដ្ឋដែលធ្វើដំណើរទៅតាមបណ្តាខេត្ត កាលពីថ្ងៃទី១២​ ខែមេសា ឆ្នាំ២០២៣ បានលើកឡើងថា ​ពួកកាត់មានការពេញចិត្ត ចំពោះការមិនដំឡើងថ្លៃរបស់ក្រុមហ៊ុន​រថយន្តដឹកអ្នក​ដំណើរទាំងនេះ ​ហើយពួកគាត់យល់ថា ​តម្លៃធម្មតាដែលពួកគាតជិះរាល់ថ្ងៃនេះ គឺ​សមរម្យដែលអាចទទួលយកបាន​ និងសាកសមទៅនឹងតម្លៃប្រេងដែលឡើងខ្ពស់ ​នាពេលបច្ចុប្បន្ន។ ជាមួយគ្នានេះពួកគាត់ សូមអំពាវនាវដល់អ្នកបើកបរ មានការប្រុងប្រយ័ត្ន, អ្នកលេងល្បែងកម្សាន្ត​គួរគប្បីលេងល្បែងប្រជាប្រិយខ្មែរ រីឯអ្នកដើរកម្សាន្ត ​ឬបរិភោគអាហារសូមមានអនាម័យ និង​ជួយថែរក្សាបរិស្ថាន។

សូមបញ្ជាក់ដែរថា នាពេលកន្លងទៅ នៅរៀងរាល់ពេលមានពិធីបុណ្យប្រពៃណីធំៗម្តងៗ ក្រុមហ៊ុន​ដឹកអ្នកដំណើរ និងអ្នករត់តាក់ស៊ីមួយចំនួន តែងតែដំឡើងថ្លៃឈ្នួលរថយន្តខុសពីធម្មតា ដើម្បី​កេងចំណេញ​ពីអ្នកធ្វើដំណើរទៅលេងស្រុកកំណើត ​ទោះបីជារាជរដ្ឋាភិបាល ពិសេសប្រមុខថា្នក់​ដឹកនាំបានអំពាវនាវកុំដំឡើងថ្លៃក៏ដោយ។

ប៉ុន្តែទោះជាយ៉ាងណា ទន្ទឹមនោះក៏មានក្រុមហ៊ុនខ្លះមិនដំឡើងថ្លៃដែរ​ ដើម្បីបង្កលក្ខណៈងាយ​ស្រួលដល់អ្នកដំណើរ៕