ភ្នំពេញ៖ ខណៈពិធីបុណ្យចូលឆ្នាំប្រពៃណីជាតិខ្មែរ នឹងឈានមកស្អែកនេះ គេឃើញថាអាជីវកម្ម​មួយចំនួន​នៅរាជធានីភ្នំពេញ នឹងឈប់សម្រាកដើម្បីចូលរួមឆ្នាំថ្មី ​ដើរកម្សាន្ត ខណៈអាជីវកម្មមួយ​ចំនួនផ្សេងទៀត នៅតែបន្តបើកលក់ជាធម្មតា ។

ជារៀងរាល់ឆ្នាំ រាល់ពិធីបុណ្យទានធំៗ ក៏ដូចជាពិធីបុណ្យចូលឆ្នាំខ្មែរ ប្រជាពលរដ្ឋភាគច្រើនតែងតែ​ចាកចេញពីរាជធានីភ្នំពេញទៅជួបជុំក្រុមគ្រួសារនៅស្រុកកំណើត និងខ្លះទៀតធ្វើដំណើរកម្សាន្ត​ទាំងក្នុងនិងក្រៅប្រទេស និងមួយចំនួនផ្សេងទៀតបន្តស្នាក់នៅភ្នំពេញ ​ដោយស្នាក់នៅក្នុងផ្ទះ និងខ្លះទៀតបន្តបើកអាជីវកម្មធម្មតា។

អ្នកស្រី អមរា ម្ចាស់អាហារដ្ឋាន កាំពីតូល និងកញ្ញា រ៉េត មុន្នីរ័ត្ន អ្នកគ្រប់គ្រងនៅក្នុងហាងកាហ្វេ អាហ្រ្វិកកា (AFRICA) ស្ថិតនៅក្បែរសាលាបឋមសិក្សាព្រះនរោត្តម ​រាជធានីភ្នំពេញ បានប្រាប់​ទូរទស្សន៍ព័ត៌មាន ប៊ីធីវី ឲ្យដឹងថា ក្នុងអំឡុងថ្ងៃឈប់សម្រាកពិធីបុណ្យចូលឆ្នាំខ្មែរនេះ ពួកគាត់មិនមាន​គម្រោងដើរកម្សាន្តនៅទីណាទេ។

ដោយឡែក លោក គីម ឡុង អ្នកគ្រប់គ្រងទូទៅនៃភោជនីយដ្ឋាន Tonight បានឲ្យដឹងដែរថា សម្រាប់ឱកាសបុណ្យចូលឆ្នាំថ្មីនេះ ​ហាងលោកនឹងឈប់សម្រាករយៈពេល ៥ថ្ងៃ ​ចាប់ពីថ្ងៃទី១៣ ដល់ថ្ងៃទី១៨ ខែមេសា ​ទើបចាប់ផ្តើមបើកលក់ធម្មតាវិញ ដោយសារជាថ្ងៃបុណ្យ​ប្រពៃណីជាតិខ្មែរ​ដែលតម្រូវឲ្យក្រុមការងារ និងបុគ្គលិកទាំងអស់បានឈប់សម្រាក ​ដើម្បីជួបជុំក្រុមគ្រួសារ និងខ្លះទៀតបានទៅស្រុកកំណើត។

សូមជម្រាបជូនថា ក្នុងរយៈពេលប៉ុន្មានថ្ងៃមកនេះ បានសង្កេតឃើញនៅតាមបណ្តាផ្សាររដ្ឋ ​ឯកជន និងបណ្តាហាងនានាក្នុងរាជធានីភ្នំពេញ ​បានបិទទ្វារបណ្តើរៗហើយ ដើម្បីត្រៀមចូលរួមប្រារព្ធ​ពិធីបុណ្យចូលឆ្នាំប្រពៃណីជាតិខ្មែរ​នាពេលខាងមុខ។ ​បុណ្យចូលឆ្នាំខ្មែរ ឆ្នាំ២០២៣នេះ មានរយៈពេល ៣ថ្ងៃ ​ចាប់ពីថ្ងៃទី១៤ ដល់១៦ ខែមេសា៕