ភ្នំពេញ៖ នៅមុនមួយថ្ងៃ នៃថ្ងៃបុណ្យចូលឆ្នាំថ្មីប្រពៃណីខ្មែរ ឆ្នាំថោះ ព.ស ២៥៦៧ ពលរដ្ឋក្រុងតាខ្មៅខេត្តកណ្តាល បានចាប់ផ្តើមរៀបចំសំអាតផ្ទះសំបែង ទិញផ្លែឈើ ផ្កាភ្ញី ធូបទៀន រៀបចំរានរណ្តាប់ទទួលទេវតាឆ្នាំថ្មី ដែលនឹងឈានចូលមកដល់នៅថ្ងៃទី១៤ ខែមេសាស្អែកនេះ វេលាម៉ោង៤លា្ងច។

ពលរដ្ឋក្រុងតាខ្មៅថ្លែងប្រាប់ BTV នៅថ្ងៃទី១៣ ខែមេសានេះ ថា ​នៅថ្ងៃនេះ គេបាននាំគ្នាផ្សារច្រើន​កុះករ ទិញរបស់របរផ្លែឈើ នំ ផ្កា រៀបចំបាយសី និងរៀបចំបោសសំអាតផ្ទះ រៀបចំគ្រឿង​រណ្តាប់​ទទួលទេវតាថ្មី ហើយពលរដ្ឋខ្លះទៀត ​មានរៀបចំទីតាំង ​រៀបឆាកសង្ក្រាន្តឆ្នាំថ្មី ដើម្បីលេងល្បែង​កម្សាន្ត រាំ ច្រៀងជុំគ្នា ដើម្បីអបអរសាទរបុណ្យចូលឆ្នាំថ្មីប្រពៃណីជាតិខ្មែរ។

នៅក្នុងអំឡុងពេលនេះ ដែរ ​នៅតាមកេហដ្ឋានខ្លះ ​ក៏មានការនិមន្តព្រះសង្ឃ​សូត្រមន្តលើករាសី និងខ្លះទៀតរៀបចំពិធីស្រង់ព្រះ ​ជូនឳពុកម្តាយរបស់ពួកគាត់ ស្រោចទឹកមន្តរំដោះគ្រោះ​ឧបទ្រុឌនានា ​និងសុំសេរីសួស្តីឆ្នាំថ្មីផងដែរ។

បើតាមសៀវភៅមហាសង្ក្រាន្ត នៅមុនថ្ងៃបុណ្យចូលឆ្នាំខ្មែរ ​តាមផ្ទះនីមួយៗ គឺមានរៀបរណ្តាប់​ទទួល​ទេវតារៀងៗខ្លួន។ បើតាមទំនៀមទម្លាប់ពីបុរាណរៀងរហូតមក ​ចំពោះរណ្តាប់ទទួលទេវតា គឺត្រូវ​រៀបរានមួយនៅខាងមុខផ្ទះ ​សម្រាប់តាំងគ្រឿងពលីការផ្សេងៗ។

គួរបញ្ជាក់ថា ចូលឆ្នាំខ្មែរ ជាបុណ្យប្រពៃណីជាតិខ្មែរ ​ដែលត្រូវបានប្រារព្ធធ្វើឡើងជារៀងរាល់ឆ្នាំ រយៈពេល ៣ថ្ងៃ ដោយថ្ងៃទី១​ គឺជាថ្ងៃមហាសង្ក្រាន្ត, ថ្ងៃទី២​ ជាថ្ងៃ វនបត និងថ្ងៃទី៣ ជាថ្ងៃឡើងស័ក៕ អត្ថបទ ស៊ុម សុខជា