ភ្នំពេញ៖ វត្តអារាមនានា បានរៀបចំរួចរាល់ ដើម្បីត្រៀមសម្រាប់ទទួលស្វាគមន៍ប្រជាពុទ្ធបរិស័ទ មកសន្សំបុណ្យ និងកម្សាន្តល្បែងប្រជាប្រិយខ្មែរ នាឱកាសបុណ្យចូលឆ្នាំថ្មី ឆ្នាំថោះ ២០២៣។

ជាក់ស្តែងវត្តព្រែកប្រា បានរៀបចំរួចរាល់ទីតាំងទទួលពុទ្ធបរិស័ទ ​និងទីតាំងលេងកម្សាន្តល្បែង​ប្រជាប្រិយខ្មែរ ជូនប្រជាពុទ្ធបរិស័ទដែលរស់នៅក្នុងមូលដ្ឋានរាជធានីភ្នំពេញផង និងមកពី​បណ្តាខេត្តផ្សេងៗផង ដែលនឹងចូលមកដល់នាថ្ងៃទី១៤​ ខែមេសា ឆ្នាំ២០២៣ ស្អែកនេះ ជាមួយគ្នានោះដែរ ព្រះគ្រូពោធិមុនី ពេជ្រ សុធន ព្រះចៅអធិការវត្តព្រែកប្រា​ បានមានព្រះថេរដិកា ប្រាប់BTV ​ព័ត៌មាន នាព្រឹកថ្ងៃទី១៣ ខែមេសា ឆ្នាំ២០២៣នេះថា រហូតមកដល់ពេលនេះ តាមការ​ណែនាំរបស់ក្រសួងធម្មការ និងសាសនា​ ក៏ដូចជាអាជ្ញាធរមូលដ្ឋាន បានណែនាំអំពីការរៀបចំ​បុណ្យចូលឆ្នាំខ្មែរប្រពៃណីជាតិ គឺវត្តព្រែកប្រា បានរៀបចំចាត់ចែងរួចរាល់អស់ទៅហើយ។ ជាពិសេសក្នុងមហាសង្រ្កាន្ត មានអត្ថន័យណែនាំថា ឲ្យប្រជាពុទ្ធបរិស័ទទាំងអស់ ធ្វើទាន រក្សាសីល ចម្រើន​មេត្តា ភាវនា ជាចំនុចសំខាន់ណាស់។ ក្នុងមួយឆ្នាំជួនកាលយើងរវល់កិច្ចការងារ និងប្រកបអាជីវកម្មផ្សេងៗច្រើន ធ្វើឲ្យភ្លេចនូវអំពើជាកុសល។ ដូច្នេះក្នុងថ្ងៃបុណ្យចូលឆ្នាំ មានឱកាសធ្វើទាន ចែករំលែកដល់ព្រះសង្ឃ ដល់មាតា បិតា និងជនក្រីក្រ ហើយរក្សាសីល ដើម្បីឲ្យខ្លួនទទួលបានសេចកី្តសុខ សេចកី្តចម្រើន​ ហើយមនុស្សទូទៅក៏បានសេចកី្តផងដែរ។

នាឱកាសឆ្នាំថ្មី ព្រះគ្រូពោធិមុនី ពេជ្រ សុធន ព្រះចៅអធិការវត្តព្រែកប្រា សូមបួងសួងដល់គុណ​បុណ្យ​ព្រះរតនត្រ័យ មានព្រះពុទ្ធ ព្រះធម៌ ព្រះសង្ឃ ​និងទេវតាឆ្នាំថ្មីនេះ ជួយប្រសិទិ្ធពរ​ជ័យបវរមហាប្រសើរជូនដល់ប្រមុខដឹកនាំទាំងអស់ ​ជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត ​ដែលលោកបានដឹកនាំប្រទេសមានសុខសន្តិភាព ​សន្តិភាពផ្តល់ក្តីសង្ឃឹម និងស្នាមញញឹមដល់មនុស្សជាតិគ្រប់ៗរូប ​និងមន្រី្តរាជការ ​និងប្រជាពុទ្ធបរិស័ទខ្មែរទាំងអស់ សូម​ឲ្យមាននូវសេចកី្តសុខ ​សេចកី្តចម្រើន ទទួលបាននូវពុទ្ធពរទាំង៤ប្រការ៕អត្ថបទ រដ្ឋា