និស្សិតប្រទេសឈីលី បានប្រឈមមុខជាមួយនគរបាលកាលពីថ្ងៃពុធ ក្នុងអំឡុងពេលចេញដើរធ្វើបាតុកម្មប្រឆាំងច្បាប់ថ្មី ដែលអំពាវនាវឱ្យមានការដាក់ទោសកាន់តែធ្ងន់ធ្ងរ ចំពោះបទឧក្រិដ្ឋប្រឆាំងនគរបាល។

នៅក្នុងទីក្រុង Santiago ក្រុមអ្នកតវ៉ាបានគប់វត្ថុផ្សេងៗដាក់ទៅលើនគរបាលបង្ក្រាប​កុបកម្ម​ នៅពេលប្រឈមមុខជាមួយកាណុងបាញ់ទឹកជាច្រើន ដើម្បីបោសសម្អាតការធ្វើ​បាតុកម្មប្រឆាំងច្បាប់ «Nain-Retamal» ដែលបង្កើនការដាក់ពិន័យសម្រាប់​បទឧក្រិដ្ឋប្រឆាំងនគរបាល​ ខណៈផ្តល់អំណាចបន្ថែមទៀតដល់ពួកគេ។

ច្បាប់នេះត្រូវបានចេញផ្សាយជាសាធារណៈនៅសប្តាហ៍នេះ ​នៅក្នុងសារព័ត៌មាន Official Gazette របស់ប្រទេសឈីលី ហើយត្រូវបានរិះគន់ដោយក្រុមសិទ្ធិមនុស្ស។

អង្គការលើកលែងទោសអន្តរជាតិ បាននិយាយថា ​ច្បាប់នេះអាច បង្កើនការរំលោភបំពាន​និង​និទណ្ឌភាព​របស់នគរបាល ​ហើយជាជំហានដើរ​ ថយក្រោយយ៉ាងខ្លាំង ទាក់ទងនឹងការជំរុញ​កំណែទម្រង់នគរបាល។

កងកម្លាំងនគរបាលរបស់ប្រទេសឈីលី បានប្រឈមការចោទប្រកាន់ពីការរំលោភសិទ្ធិមនុស្ស​បន្ទាប់​ពីការបង្រ្កាបធ្ងន់ធ្ងរចំពោះការតវ៉ាដ៏ហិង្សាកាលពីឆ្នាំ ២០១៩ ប្រឆាំងវិសមភាព។