​ភ្នំពេញ៖ ក្នុងត្រីមាសទី១ ឆ្នាំ២០២៣នេះ អគ្គនាយកដ្ឋានពន្ធដារ ប្រមូលចំណូលប្រភេទពន្ធ-អាករគ្រប់ប្រភេទ បានចំនួនជាង ៥ ៤៤២ ប៊ីលានរៀល ត្រូវប្រមាណជាង ១ ៣៤៣លានដុល្លារ ស្មើជាង ៣៧,៦៣ភាគរយ នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។

ព្រឹត្តិបត្រព័ត៌មានប្រចាំសប្តាហ៍ ដែលចុះផ្សាយនៅថ្ងៃទី១៣ ខែមេសា ឆ្នាំ២០២៣នេះ បានបង្ហាញថា នៅក្នុងខែមីនា ឆ្នាំ២០២៣ ចំណូលពន្ធ-អាករគ្រប់ប្រភេទ ដែលអគ្គនាយកដ្ឋានពន្ធដារប្រមូលបានមានចំនួនជាង ៣ ២៥៨ប៊ីលានរៀល (ត្រូវប្រមាណជាង ៨០៤ លានដុល្លារ) ស្មើជាង ២២ ភាគរយ នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣, គឺមានកំណើនកើនឡើងគួរជាទីកត់សម្គាល់ ដែលសន្ទុះកើនឡើងខ្លាំងនេះ គឺដោយចំណូលពន្ធសម្រាប់ខែមីនា ឆ្នាំ២០២៣ ដែលជារៀងរាល់ឆ្នាំ ខែ មករា ដល់ខែមីនា គឺជាកាលបរិច្ឆេទនៃការប្រកាសនិងបង់ប្រាក់ពន្ធលើប្រាក់ចំណូលប្រចាំឆ្នាំ។

បើគិតសរុបរយៈពេល ៣ខែ ដើមឆ្នាំ ២០២៣ ឃើញថា អគ្គនាយកដ្ឋានពន្ធដារបានប្រមូលចំណូលពន្ធ-អាករសរុបចំនួន ៥ ៤៤២ប៊ីលានរៀល (ប្រមាណជាង ១ ៣៤៣ លានដុល្លារ)។

ជុំវិញការប្រមូលចំណូលនេះ, បើផ្អែកតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ រាជរដ្ឋាភិបាលបានកំណត់ឲ្យអគ្គនាយកដ្ឋានពន្ធដារ ត្រូវប្រមូលចំណូលពន្ធ (ពន្ធផ្ទៃក្នុង) សុរបចំនួនជាង ១៤ ៦៤៥ ប៊ីលានរៀល ត្រូវប្រមាណជាង ៣ ៥៧១លានដុល្លារ៕ អត្ថបទ៖ សុន រ៉ាឌី