ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជាបានផ្ដល់អនុសាសន៍ដល់កណកម្មការបំបែកកំណត់ត្រាពិភពលោក គួរបំបែកកំណត់ដោយកំណត់ជាភាគរយចំនួនប្រជាជនសម្រាប់ប្រទេសនីមួយៗ ដើម្បីផ្ដល់ភាពយុត្តិធម៌ដល់ប្រទេសដែលមានប្រជាជនតិច ប៉ុន្ដែអាចបំបែកកំណត់ត្រាពិភពលោកច្រើនជាងប្រទេសដែលមានប្រជាជនច្រើន។

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានមានប្រសាសន៍បែបនេះ ក្នុងឱកាសសម្ដេច និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានអញ្ជើញជាអធិបតីដ៏ខ្ពង់ខ្ពស់ពិធីបើកព្រឹត្តិការណ៍អង្គរសង្ក្រានឆ្នាំ២០២៣ នាព្រឹកថ្ងៃទី១៤ ខែមេសា ឆ្នាំ២០២៣ នេះ នៅបរិវេណប្រាសាទបាយ័ន ខេត្តសៀមរាប។

សម្តេចតេជោបញ្ជាក់ថា តាមរយៈការគ្រប់គ្រងកូវីដ-១៩ បានរបស់កម្ពុជា ធ្វើឱ្យពលរដ្ឋអាចមានឱកាសរៀបចំនូវព្រឹត្តិការណ៍នានាជាពិសេសព្រឹត្តិការណ៍អង្គរសង្ក្រាន្តឆ្នាំ២០២៣នេះ នៅគ្រប់រាជធានី-ខេត្ត សាលារៀន និងគ្រប់ក្រសួងស្ថាប័នហើយកម្ពុជាអាចទទួលបានទេសចរណ៍ជាតិ-អន្តរជាតិរាប់លាននាក់។ 

សូមបញ្ជាក់ថាសម្ដេតេជោបានចូលរួមអបអរសាទរចំពោះយុទ្ធនាការ Beyond The Games ដែលបានបំបែកកំណត់ត្រាឯតទគ្គកម្មពិភពលោក «បេះដូងច្រើនជាងគេលើពិភពលោក» ជាផ្លូវការពីស្ថាប័ន Guinness World Records ដែលកម្ពុជាបានបំបែកចំនួន ៣,៩១៧,៨០៥ បេះដូង។ សម្ដេចបានកោតសរសើរចំពោះការខិតខំប្រឹងប្រែង អត់ធ្មត់របស់ក្រុមការងារយុវជន និងប្រជាពលរដ្ឋគ្រប់ទិសទី ដែលដែលបានចូលរួមក្នុងកិច្ចការងារនេះដែលជាការបង្ហាញពី «ភាសាបេះដូង» សម្រាប់កម្ពុជា៕ អត្ថបទ៖ វ៉ន ដារ៉ា​