យោងតាមការរាយការណ៍ដោយប្រព័ន្ធផ្សព្វផ្សាយក្នុងតំបន់ បានឲ្យដឹងថា មនុស្ស ២នាក់បានស្លាប់ និង១៥នាក់ផ្សេងទៀតបានរងរបួស បន្ទាប់ពីស្ពានមួយកន្លែងបានបាក់ នៅខេត្ត Valle del Cauca ភាគខាងលិចប្រទេសកូឡំប៊ី។

បុគ្គលិកសង្គ្រោះ ត្រូវបានគេហៅទូរស័ព្ទមកកាន់កន្លែងកើតហេតុស្ពានបាក់ នៅលើដងទន្លេ La Vieja នៅក្នុងក្រុង La Tebaida ដែលតភ្ជាប់តំបន់ Quindio និង Valle del Cauca។

ជនរងគ្រោះ ២នាក់ដែលស្លាប់ ជាមន្ត្រីនគរបាល ដែលកំពុងធ្វើដំណើរជិះនៅលើរថយន្តមួយគ្រឿង ដែលបានជាប់នៅចន្លោះកំណាត់បេតុង ដែលបានបាក់ធ្លាក់ចូលទៅក្នុងទន្លេ។

រថយន្តដឹកទំនិញ ២គ្រឿងផ្សេងទៀត និងរថយន្តឯកជនមួយគ្រឿង ដែលកំពុងឆ្លងកាត់ស្ពានក៏ធ្លាក់ផងដែរ។ ជនរងគ្រោះមួយចំនួន បានត្រៀមគេចខ្លួនពីរថយន្តរបស់ពួកគេដោយបានរងរបួស។

ប្រព័ន្ធផ្សព្វផ្សាយក្នុងតំបន់ បានរាយការណ៍ថា អ្នករួចផុតជីវិត ត្រូវបានគេបញ្ជូនទៅកាន់មណ្ឌលវេជ្ជសាស្ត្រដែលនៅក្បែរនោះ។ ប្រព័ន្ធផ្សព្វផ្សាយ និយាយថា ស្ពាននេះ ត្រូវបានសាងសង់ក្នុងឆ្នំា១៩៨៤ ហើយត្រូវបានត្រួតពិនិត្យយ៉ាងទៀងទាត់ ដែលការពិនិត្យចុងក្រោយ ត្រូវបានធ្វើឡើងរយៈពេល៣ខែកន្លងទៅនេះ ដោយបានរាយការណ៍ថា គ្មានការបារម្ភជុំវិញប្រតិបត្តិការ និងសមត្ថភាពរបស់ស្ពាននេះឡើយ។