ភ្នំពេញ ៖ សម្រាប់ថ្ងៃទី១ នៃពិធីបុណ្យចូលឆ្នាំប្រពៃណីជាតិខ្មែរ ត្រូវនឹងថ្ងៃទី១៤ ខែមេសា ឆ្នាំ២០២៣ មានភ្ញៀវទេសចរដើរលេងកម្សាន្តនៅតំបន់ទេសចរណ៍ និងរមណីយដ្ឋានទេសចរណ៍នានានៅទូទាំងប្រទេសសរុបចំនួន ២.០៩៨.៥០១ នាក់។ នេះបើយោងតាមរបាយការណ៍របស់ក្រសួងទេសចរណ៍ ដែលបានបង្ហាញនៅព្រឹកថ្ងៃទី១៥ ខែមេសា ឆ្នាំ២០២៣។

របាយការណ៍ដដែលបានឲ្យដឹងទៀតថា ភ្ញៀវទេសចរដែលបានចេញដើរលេងកម្សាន្តនៅថ្ងៃទី១ នៃពិធីបុណ្យចូលឆ្នាំថ្មី នោះរួមមាន៖ ភ្ញៀវជាតិ ២.០៧៩.៦៧០នាក់ និងភ្ញៀវបរទេសផ្ទៃក្នុង ១៨.៨៣១នាក់។ ចំពោះគោលដៅទេសចរណ៍សំខាន់ៗ រួមមាន៖

− ខេត្តសៀមរាប ៤៣៦.៦៧៩ នាក់

− ខេត្តបាត់ដំបង ៣០៥.៦១៥ នាក់

− រាជធានីភ្នំពេញ ២៦៣.៥៤៩ នាក់

− ខេត្តស្វាយរៀង ១៤៤.៧៧៨ នាក់

− ខេត្តកណ្តាល ១២៨.៦៩១ នាក់

− ខេត្តបន្ទាយមានជ័យ ១០៨.៥១៤ នាក់

− ខេត្តកំពង់ឆ្នាំង ១០៣.៧៨៤ នាក់

− ខេត្តព្រះសីហនុ ១០២.០៩៦ នាក់

− ខេត្តកំពត ៩៥,៣៤៤ នាក់។

ក្រសួងទេសចរណ៍បានបញ្ជាក់ថា ចរន្តនៃការដើរកម្សាន្តនាថ្ងៃចូលឆ្នាំប្រពៃណីជាតិថ្ងៃទី១ ឆ្នាំ២០២៣នេះ មានសភាពផុសផុលខ្លាំងដោយមានការកើនឡើងប្រមាណ ១៤៣,១៩% ធៀបនឹងថ្ងៃចូលឆ្នាំទី១ ឆ្នាំ២០២២ ដែលភ្ញៀវសរុបមានត្រឹមតែប្រមាណ ៨៦ ម៉ឺននាក់ប៉ុណ្ណោះ។ ក្រសួងទេសចរណ៍ បានបញ្ជាក់បន្ថែមទៀតថា តួលេខខាងលើនេះ ជាចំនួនភ្ញៀវទេសចរដែល​ទៅ​កម្សាន្តនៅរមណីយដ្ឋាន និងគោលដៅទេសចរណ៍ និងចំនួនភ្ញៀវ និងបងប្អូនប្រជាពលរដ្ឋ​ដែល​ទៅកម្សាន្តនៅតាមកន្លែងសំខាន់ៗ​ប្រារព្ធ​សង្ក្រាន្ត​តែប៉ុណ្ណោះ ដោយមិនបានគិតដល់ចំនួន​ប្រជាពលរដ្ឋ​ដែលទៅលេងកម្សាន្តនៅតាមភូមិស្រុក ​ឬកម្មវិធីសង្រ្កាន្តជាលក្ខណៈឯកជន ឬក្នុងទ្រង់ទ្រាយតូច។

ដោយឡែកការរៀបចំព្រឹត្តិការណ៍អង្គរសង្រ្កាន្តនៅខេត្តសៀមរាបឆ្នាំ២០២៣​ ដែលជាខួប១០ឆ្នាំ ដែលបាន​ប្រារព្ធ​ពិធីបើកជាផ្លូវការក្រោមអធិបតីភាពដ៏ខ្ពង់ខ្ពស់ សម្តេចតេជោនាយករដ្ឋមន្រ្តី និង​សម្តេចកិត្តិព្រឹទ្ធិបណ្ឌិត នាថ្ងៃទី១៤ ខែមេសានេះ បានទាក់ទាញភ្ញៀវទេសចរ និងបងប្អូន​ប្រជាពលរដ្ឋ​យ៉ាងច្រើនកុះករ ​ដែលមានសកម្មភាពកម្សាន្តសប្បាយជាច្រើន បង្ហាញពីវប្បធម៌ ប្រពៃណី ពិសេសទិដ្ឋភាពនៃការបំបែកឯតទគ្គកម្មបេះដូង​ច្រើនជាងគេនៅ​លើពិភពលោក​នៅប្រាសាទអង្គរវត្ត។ រីឯនៅតាមបណ្តារាជធានីខេត្តផ្សេងៗ បានរៀបចំកម្មវិធីសង្រ្កាន្តនៅ​តាមទីប្រជុំជន ​ទីរួមខេត្ត ទីរួមស្រុក​ តំបន់គោលដៅទេសចរណ៍សំខាន់ៗ វត្តអារាម និងនៅតាមភូមិស្រុកនានា។

ក្រសួងទេសចរណ៍ បានបញ្ជាក់ថា ក្រៅតែពីការដើរកម្សាន្តនៅតាមគោលដៅទេសចរណ៍ និង​កម្មវិធីសង្រ្កាន្ត ក៏មានប្រជាពលរដ្ឋនៅតាមភូមិស្រុកនានា បាននាំគ្នាជួបជុំលេងល្បែងកម្សាន្ត ច្រៀងរាំសប្បាយ និងលេងល្បែងប្រជាប្រិយនានាដោយក្តីរីករាយ។

ទន្ទឹមនោះកងកម្លាំងមានសមត្ថកិច្ចទាំងនៅថ្នាក់ជាតិ និងគណៈបញ្ជាការឯកភាពរាជធានីខេត្ត បាន​ចាត់តាំងកម្លាំងប្រចំាការ និងសម្រួលចរាចរតាមដងផ្លូវជាតិ ទីកន្លែង​ប្រារព្ធ​កម្មវិធីសង្រ្កាន្ត និងគោលដៅសំខាន់ៗ។

ជារួមសភាពការណ៍សន្តិសុខ សណ្តាប់ធា្នប់ សុវត្ថិភាព ការគ្រប់គ្រងចរន្តភ្ញៀវ និងការគ្រប់គ្រង​គុណភាព និងតម្លៃសេវាទេសចរណ៍នានា មិនមានបញ្ហាធំដុំណាមួយកើតឡើង​ទេនៅថ្ងៃចូល​ឆ្នាំទី១នេះ ហើយចរន្តភ្ញៀវត្រូវបានរំពឹងថា នឹងមានសភាពកាន់តែ​ផុលផុស​នាថ្ងៃទី២នេះ ដោយ​សារប្រជាពលរដ្ឋមួយចំនួននៅចាំទទួលទេវតាកាលពីរសៀលថ្ងៃម្សិលមិញ៕