កំពត៖ ក្នុងឱកាសបុណ្យចូលឆ្នាំថ្មី ថ្ងៃទី១ ប្រជាពលរដ្ឋ ភ្ញៀវទេសចរជាតិ និងអន្តរជាតិ បានមកដើរលេងកម្សាន្តតាមរមណីយដ្ឋាន និងកំពតសង្ក្រាន្ត សរុបប្រមាណជិត​១០ម៉ឺននាក់។ ពិព័រណ៍នំខ្មែរថែវប្បធម៌ គេឃើញមានមនុស្សចាប់អារម្មណ៍ច្រើន ដោយសារនំប្រពៃណីខេត្តកំពត មានច្រើនមុខ មានរស់ជាតិឆ្ងាញ់ និងដាក់លក់ក្នុងតម្លៃទាបជាងទីផ្សារ។

ភ្ញៀវទេសចរមកដើរលេងកម្សាន្តក្មុងកម្មវិធីកំពតសង្ក្រាន្ត បានបញ្ជាក់ថា កម្មវិធីកំពតសង្ក្រាន្តឆ្នាំនេះ រៀបចំបានស្អាត ទេសចរមកដើរលេងច្រើន សន្តិសុខ សណ្តាប់ធ្នាប់ អនាម័យល្អបរិស្ថានល្អ។ និយាយដោយឡែក ពិព័រណ៍នំខ្មែរថែវប្បធម៌ គឺជាកម្មវិធីមួយដែលគួរឲ្យចាប់អារម្មណ៍បំផុត ព្រោះនៅ​ក្នុងពិព័រណ៍នេះ ​មានដាក់តាំងបង្ហាញ ​និងលក់នំបុរាណខ្មែរ​ ដែលធ្វើផ្ទាល់ដៃរបស់​បងប្អូនពលរដ្ឋខេត្តកំពត​ មានរស់ជាតិឆ្ងាញ់ ​និងលក់ក្នុងតម្លៃថោក។ ​ហើយតាមរយៈពិព័រណ៍នេះ វាក៏​បានបង្ហាញដល់ភ្ញៀវទេសចរ ​និងក្មេងៗជំនាន់ក្រោយ ​ឲ្យបានស្គាល់ប្រភេទនំប្រពៃណីខ្មែរ ដែលមានជាយូរលង់ណាស់មកហើយ។

ចំណែកអ្នកធ្វើនំមកពីស្រុកដងទង់ បានបង្ហាញអំពីសេចក្តីសប្បាយរីករាយរបស់ខ្លួនថា អ្នក​ស្រីពិតជាអរគុណដល់ឯកឧត្តម ម៉ៅ​ ធនិន អភិបាលខេត្តកំពត​ និងលោកជំទាវ ដែលមាន​គំនិត​ផ្តួចផ្តើម​រៀបចំកម្មវិធីនេះឡើង​ ដោយផ្តល់ដើមទុនទាំងអស់​ ដល់ប្រជាពលរដ្ឋធ្វើនំលក់ ដើម្បី​បានប្រាក់ចំណូលផង​ និងបានចូលរួមកម្សាន្តសប្បាយក្នុងពិធីកំពតសង្ក្រាន្តផង។ ចំណែកឯកការលក់នំវិញ ​គឺថោកជាងពាក់កណ្តាលនៃតម្លៃទីផ្សារ។

ប្រធានមន្ទីរទេសចរណ៍ខេត្ត លោកសយ ស៊ីណុល បានប្រាប់ឲ្យដឹងថា ក្នុងឱកាសបុណ្យចូលឆ្នាំថ្មី ថ្ងៃទី១ ​ភ្ញៀវទេសចរបានមកលេងខេត្តកំពត​ ប្រមាណជិត ១០ម៉ឺននាក់ ចំពោះស្ថានភាពទូទៅ​មាន​ភាពល្អប្រសើរ​ ពលរដ្ឋ ​និងភ្ញៀវទេសចរមានទឹកមុខសប្បាយរីករាយ ​ហើយសេវាម្ហូអាហារ និង​សេវាស្នាក់នៅគ្មានការតម្លើងថ្លៃទេ ​ពិសេសពិព័រណ៍នំខ្មែរថែវប្បធម៌ គឺទទួលបានការនិយម​គាំទ្រ​ច្រើនពីភ្ញៀវទេសចរជាតិ​ និងអន្តរជាតិ។

លោកប្រធានមន្ទីរក៏សូមអំពាវនាវ ​ដល់ភ្ញៀវទេសចរ អាជីវករទាំងអស់ សូមយកចិត្តទុកដាក់​ក្នុងការ​គ្រប់គ្រង់​កាសសំណល់ ​ពិសេសសំរាម សូមប្រមូលដាក់ក្នុងធុងសំរាមឲ្យបានត្រឹមត្រូវ ​ដើម្បីធានាថា មុនពេលកម្មវិធី ពេលកម្មវិធី ​និងក្រោយកម្មវិធីបុណ្យចូលឆ្នាំថ្មីចប់ ខេត្តកំពតនៅតែរក្សា​បាននូវបរិស្ថានអនាម័យស្អាត៕