អគ្គលេខាធិការអង្គការសហប្រជាជាតិ(UN)លោក Antonio Guterres បានសរសេរលិខិតផ្ញើទៅកាន់រុស្ស៊ី អ៊ុយក្រែន និងទួរគី ដើម្បីលើកឡើងពីក្តីបារម្ភចំពោះការអនុវត្តន៍កិច្ចព្រមព្រៀង ដែលអនុញ្ញាតឲ្យមានការនាំចេញគ្រាប់ធញ្ញជាតិដោយសុវត្ថិភាពអំឡុងសម័យសង្រ្គាម ចេញពីកំពង់ផែសមុទ្រខ្មៅជាច្រើនកន្លែងរបស់អ៊ុយក្រែន ។

UNនិយាយថា គ្មាននាវាណាមួយ ត្រូវបានគេត្រួតពិនិត្យនោះទេ កាលពីថ្ងៃអង្គារ ក្រោមកិច្ចព្រមព្រៀងដែលបានយល់ព្រមកាលពីខែកក្កដា ឆ្នាំមុន ហើយការត្រួតពិនិត្យ បានចាប់ផ្តើមឡើងវិញ កាលពីថ្ងៃពុធ ។

លោក Stephane Dujarric គឺជាអ្នកនាំពាក្យ UNនិយាយប្រាប់ក្រុមអ្នកសារព័ត៌មានថា លោកអគ្គលេខាធិការ បានសរសេរលិខិតផ្ញើទៅកាន់ភាគីពាក់ព័ន្ធ ហើយពួកយើងកំពុង​ធ្វើការយ៉ាងយកចិត្តទុកដាក់ ក្នុងការសម្របសម្រួលយ៉ាងជិតស្និត​ជាមួយទួរគី ដើម្បីរក្សាបន្តអនុវត្តន៍កិច្ចព្រមព្រៀងដ៏ចាំបាច់មួយនេះ ។

កិច្ចព្រមព្រៀងនេះ ត្រូវបានធ្វើអន្តរការីដោយ UN និងប្រទេសទួរគី ដើម្បីដោះស្រាយវិបត្តិ​ស្បៀងអាហារសកល ដែលក្រុមមន្រ្តី UNនិយាយថា វាបានធ្ងន់ធ្ងរខ្លាំងដោយសារ​តែ​សង្រ្គាមសម្លាប់មនុស្សច្រើនបំផុតនៅអឺរ៉ុប ​ចាប់តាំងពីសង្រ្គាមលោកលើកទី ២ ។

នាវាទាំងអស់ ត្រូវបានត្រួតពិនិត្យដោយក្រុមមន្រ្តីមកពីអ៊ុយក្រែន រុស្ស៊ី ទួរគី និង UNនៅក្នុងដែន​សមុទ្រជិតប្រទេសទួរគី ​នៅតាមផ្លូវចេញ-ចូលប្រទេសអ៊ុយក្រែន ។

UNនិយាយថា មាននូវនាវារាប់សិបគ្រឿង រង់ចាំគេត្រួតពិនិត្យ មុនពេលវាធ្វើដំណើរទៅកាន់​ប្រទេសអ៊ុយក្រែន ៕