ក្រុមអាជ្ញាធរ និយាយកាលពីថ្ងៃសុក្រថា ព្យុះស៊ីក្លូនត្រូពិក បានបោកបក់ទៅដល់តំបន់ឆ្នេរភាគពាយ័ព្យប្រទេសអូស្រ្តាលី ជាព្យុះប្រភេទទី៥ មានកម្លាំងខ្យល់បក់ខ្លាំងបំផុត ប៉ុន្តែពុំបណ្តាលឲ្យមានមនុស្សស្លាប់នៅតាមតំបន់មនុស្សរស់នៅច្រើននោះទេ ដែលរួមទាំងមជ្ឈមណ្ឌលផលិតដែកធំបំផុតរបស់ពិភពលោកនៅទីក្រុង Port Hedland ។

ព្យុះស៊ីក្លូន Ilsa បានបោកបក់ទៅដល់ដីគោកកាលពីព្រឹកថ្ងៃសុក្រ ជាមួយនឹងអាំងតង់ស៊ីតេព្យុះកម្រិតព្យុះទី ១ រហូតដល់កម្រិតព្យុះទី ៥ ហើយក្រោយមកវាបាន​បោកបក់​ចូលដីគោក ស្របពេលដែលក្រុមសង្រ្គោះបន្ទាន់ ជំរុញឲ្យសហគមន៍ដាច់ស្រយាល​ជាច្រើនកន្លែងនៅតាមផ្លូវព្យុះ ស្វែងរកទីជម្រក និងបន្តស្នាក់នៅក្នុងផ្ទះ

មន្ទីរឧតុនិយម​និយាយ​ថា ព្យុះ Ilsa បានបង្កើតកំណត់ត្រាខ្យល់បក់ខ្លាំងថ្មីរយៈពេល១០នាទី​នៅអូស្រ្តាលី ជាមួយនឹងល្បឿនខ្យល់បក់ ២១៨គ.មក្នុង១ម៉ោង នៅលើកោះ Bedout ដែលមាន​ចម្ងាយប្រហែល ៤០គ.មពីតំបន់ឆ្នេរ ពោលគឺបក់ខ្លាំងជាងព្យុះ Georgeកាលពីឆ្នាំ ២០០៧ ដែលបានបោកបក់ក្នុងល្បឿន ១៩៤គ.ម ក្នុង១ម៉ោងនៅលើទីតាំងតែមួយ ។

ព្យុះមួយនេះ ត្រូវបានមន្ទីរឧតុនិយមព្យាករណ៍ថា ​វានឹងថមថយកម្លាំងមកនៅកម្រិតព្យុះទី ៣វិញ នៅថ្ងៃសុក្រ ​ប៉ុន្តែក្រុមមន្រ្តី ​បានព្រមានថា ​វានៅតែអាចមានសន្ទុះខ្យល់បក់ប្រហែល ១៧០គ.ម ក្នុង១ម៉ោងដដែល ។

គេរំពឹងផងដែរថា ព្យុះ Ilsa នឹងថមថយកម្លាំងមកនៅកម្រិតទាបត្រឹមជាព្យុះ​កំបុតត្បូង​នៅ​យប់ថ្ងៃសុក្រ ហើយវានឹងបោកបក់ឆ្ពោះទៅកាន់តំបន់ភាគខាងត្បូង​ នៃដែនដី Northern Territory ។ ភ្លៀងធ្លាក់ខ្លាំង ​ដែលអាចបង្កឲ្យមានទឹកជំនន់ ​ត្រូវបានគេព្យាករថានឹងកើតមានផងដែរ ៕